Biblia Etíope · Biblia Etíope en Ge'ez
Malaquías 1
ዘምልክያስ፡ነቢይ።1ተረፈ፡ቃለ፡እግዚአብሔር፡ላዕለ፡እስራኤል፡በእደ፡መልእኩ።ኀልይዎኬ፡በልብከሙ።
2አፍቀርኩክሙ፡ይቤ፡እግዚአብሔር፡ወትብሉኒ፡በበይነ፡ምንት፡አፍቀርከነ፡እግዚአ።አኮኑአ፡ዔሳው፡እኀሁ፡ለያዕቆብ፡ይቤ፡እግዚአብሔር፡ያዕቆብሃ፡አፍቀርኩ።
3ወዓሳውሃ፡ጸላእኩ፡ወአማሰንኩ፡በሓውርቲሁ፡ወመክፈልቶ፡ወረሰይክዎ፡በድወ።
4እስመ፡ይቤ፡ናሁ፡ወድቀት፡ኤዶምያስ፡ንትመየጥ፡ወንሕንጽ፡መዝብረ።ከመዝ፡ይቤ፡እግዚአብሔር፡ዘኵሎ፡ይመልክ፡አንትሙአ፡ተሐንጹ፡ወአነ፡እነሥት፡ወይሰመይ፡ብሔረ፡ዐመፃ።
5ወይሬእያአ፡እግዚአብሔር፡ሕዝበ፡ዘሠርዐ፡እግዚአብሔር፡እስከ፡ለዓለም፡ወትብሉ፡አንትሙ፡ዐቢይ፡እግዚኤብሔር፡መልዕልተ፡በሓውርተ፡እስራኤል።
6ወልድኒአ፡ያከብር፡አቡሁ፡ወገብርኒ፡ይፈርህ፡እግዚኦ።እመኬ፡አቡክሙ፡አነ፡አይቴኑ፡ዘአክባርክሙኒ፡ወእመኒ፡እግዚእከሙ፡አነ፡አይቴ፡ዘፈራህክሙኒ፡ይቤ፡እግዚአብሔር፡ዘኵሎ፡ይመልክ።እስመ፡አንትሙአ፡ካህናት፡አርኰስክሙ፡ስምየ፡ወትቤሉ፡በምንትኑ፡አርኰስና፡ስመከ።
7እስመ፡ወደይከሙ፡ውስተ፡መሥዋዕትየ፡ኅብስተ፡ርኩሰ፡ወትቤሉ፡ለምንትኑ፡እርኰስነ፡ስመከ።ናዑ፡እስመ፡ትቤሉ፡ማእደ፡እግዚአብሔር፡ንውር፡ውእቱ፡ወእክሉሂ፡ዘሥሩዕ፡ ውስቴቱ፡ምኑን፡ውእተ።
8እስመ፡ታመጽኡ፡ነቋረ፡ለመሥዋዕትየ፡ወኢኮነ፡ሠናየ፡ከማሁ፡ወእመሂ፡አምጻእክሙ፡ሐንካሰ፡ወድውየ፡ኢኮነ፡ሠናየ፤ስዶ፡እስኩ፡ለመልአክከ፡ለእመ፡ይትሜጠወከ፡ወለእመ፡ያደሉ፡ለገጽከ፡ይቤ፡እግዚአብሔር፡ ዘኵሎ፡ይመልከ።
9ወይእቤኒ፡ተጋነዩ፡ለገጸ፡እግዚአብሔር፡አምላክክሙ፡ወስብሕዎ፡እስመ፡በእዴክሙ፡ተገብረ፡ዝንቱ። ወትሬእዩ፡ለእመ፡ኣደሉ፡ለገጽክሙ፡ይቤ፡እግዚአብሔር፡ዘኵሎ፡ይመልከ።
10እስመ፡በእንቲአክሙ፡ተዐጽወ፡ኆኅት፡ወኢታንድዱ፡መሥዋዕትየ፡በከንቱ፡ኢእፈቅድክሙ፡ይቤ፡እግዚአብሔር፡ዘኵሎ፡ይመልክ፡ወኢይትሜጠው፡መሥዋዕተ፡እምእዴክሙ።
11እስመ፡እምሥራቀ፡ፀሓይ፡እስከ፡ዐረብ፡ይሴባሕ፡ስምየ፡በውስተ፡ኵሉ፡አሕዛብ፡ወእምኵሉ፡በሓውርት፡ያመጽኡ፡ዕጣነ፡ለስምየ፡ወመሥዋዕተ፡ንጹሐ፡ለስምየ፡ቅዱስ፡እስመ፡ዐቢይ፡ስምየ፡በውስተ፡ኵሉ፡አሕዛብ፡ይቤ፡እግዚአብሔር፡ዘኵሎ፡ይመልክ።
12ወአንትሙሰ፡ታረኵስዎ፡እስመ፡ትብሉ፡ማእደ፡እግዚአብሔር፡ንውር፡ውእቱ፡ወእክሉሂ፡ዘውስቴቱ፡ምኑን፡ውእቱ።
13ወትብሉ፡ዝንቱ፡እምእኩይ፡ሕማም፡ውእቱ፡ወነፋኅክዎ፡ይቤ፡እግዚእብሔር፡ዘኵሎ፡ይመልክ።እስመ፡ታበውኡ፡ዘሄድክሙ፡ወሐንካሰ፡ወድውየ፡ውስተ፡መሥዋዕትየ።ወእመኒ፡አምጻእክሙ፡መሥዋዕተ፡ኢእትሜጠዎ፡እምእዴክሙ፡ይቤ፡እግዚእብሔር፡ዘኵሎ፡ይመልክ።
14ርጉመ፡ለይኩን፡ዘቦ፡ውስተ፡መርዐይሁ፡ተባዕተ፡ዘቦ፡ብጽዓተ፡እንዘ፡ይትከሀሎ፡ይሠውዕ፡ለእግዚአብሔር፡ዘቦ፡ነውረ፡እስመ፡ዐቢይ፡ንጉሥ፡አነ፡ይቤ፡እግዚአብሔር፡ ዘኵሎ፡ይመልክ፡ ወይሰማዕ፡ስምየ፡በውስተ፡ኵሉ፡አሕዛብ።