Biblia Etíope · Biblia Etíope en Ge'ez
Lucas 24
ወንጌል፡ዘሉቃስ።በእንተ፡ትንሣኤሁ፡ለእግዚእ፡ኢየሱስ
1ወበእሑድ፡ሰንበት፡በጽባሕ፡አሌለያ፡ገዪሠ፡ወሖራ፡ኀበ፡መቃብር፡ወወሰዳ፡ውእተ፡አፈዋተ፡ዘአስተዳለዋ፡ወካልኣትኒ፡አንስት፡ምስሌሆን።
2ወረከባሃ፡ለይእቲ፡እብን፡ኀበ፡አንኰርኰረት፡እምነ፡መቃብር።
3ወቦኣ፡ወኢረከባ፡ሥጋሁ፡ለእግዚእ፡ኢየሱስ።
4ወእንዘ፡ያነክራ፡ወየኀጥኣ፡በእንተ፡ዝንቱ፡አስተርአይዎን፡ክልኤቱ፡ዕደው፡ወቆሙ፡ኀቤሆን፡ወይበርቅ፡አልባሲሆሙ።
5ወፈርሃ፡ወአትሐታ፡ገጾን፡ውስተ፡ምድር፡ወይቤልዎን፡ምንተ፡ተኀሥሣሁ፡ለሕያው፡ምስለ፡ሙታን።
6ተንሥአ፡ኢሀሎ፡ዝየሰ፡ተዘከራ፡ቃሎ፡ዘይቤለክን፡በገሊላ።
7ሀለዎ፡ለወልደ፡ዕጓለ፡እመሕያው፡ይግባእ፡ውስተ፡ዕደ፡ሰብእ፡ኃጥኣን፡ወይሰቅልዎ፡ወይቀትልዎ፡ወይትነሣእ፡በሣልስት፡ዕለት።
8ወተዘከራ፡ቃሎ።
9ወአቲዎን፡እምኀበ፡መቃብር፡ነገራሆሙ፡ዘንተ፡ለዐሠርቱ፡ወአሐዱ፡ወለቢጾሙኒ፡ኵሎሙ።
10ወእማንቱሰ፡ማርያም፡መግደላዊት፡ወዮሐና፡ወማርያም፡እንተ፡ያዕቆብ፡ወቢጾንሂ፡እለ፡ምስሌሆን፡ነገራሆሙ፡ዘንተ፡ለሐዋርያት።
11ወኮነ፡ዝንቱ፡ነገር፡በቅድሜሆሙ፡ከመ፡ዝንጋዔ፡ወኢአምንዎን፡ወአክሐድዎን።
12ወተንሥአ፡ጴጥሮስ፡ወሮጸ፡ኀበ፡መቃብር፡ወሐወጸ፡ወርእየ፡መዋጥሐ፡ባሕቲቶ፡ንቡረ፡ወአተወ፡እንዘ፡ያነክር፡ዘኮነ።
ዘከመ፡ዘአስተርአዮሙ፡ለክልኤቱ፡አርድእት፡በፍኖተ፡ኤማኁስ
13ወይእተ፡ዕለተ፡እንዘ፡የሐውሩ፡ክልኤቱ፡እምውስቴቶሙ፡ሀገረ፡እንተ፡ርኅቅት፡እምኢየሩሳሌም፡መጠነ፡ስሳ፡ምዕራፍ፡እንተ፡ስማ፡ኤማኁስ።
14ወይትናገሩ፡በበይናቲሆሙ፡በእንተ፡ኵሉ፡ዘኮነ።
15ወእንዘ፡እሙንቱ፡ይትናገሩ፡ወይትኀሠሥዎ፡ለዝንቱ፡ቀርቦሙ፡እግዚእ፡ኢየሱስ፡ወሖረ፡ምስሌሆሙ።
16ወተእኅዛ፡አዕይንቲሆሙ፡ከመ፡ኢያእምርዎ።
17ወይቤሎሙ፡እግዚእነ፡ምንትኑ፡ዝንቱ፡ነገር፡ዘትትናገሩ፡በበይናቲክሙ፡እንዘ፡ተሐወሩ፡ትኩዛኒክሙ።
18ወአውሥአ፡አሐዱ፡እምኔሆሙ፡ዘስሙ፡ቀለዮጳ፡ወይቤሎ፡አንተኑ፡ባሕቲትከ፡ነግድ፡ለኢየሩሳሌም፡ወኢያእመርከኑ፡ዘኮነ፡በውስቴታ፡በዝንቱ፡መዋዕል።
19ወይቤሎ፡እግዚእ፡ኢየሱስ፡ምንትኑ፡ውእቱ፡ወይቤልዎ፡በእንተ፡ኢየሱስ፡ናዝራዊ፡ብእሲ፡ጻድቅ፡ወነቢይ፡ዘኮነ፡ከሃሌ፡በቃሉ፡ወበምግባሩ፡በቅድመ፡እግዚአብሔር፡ወበቅድመ፡ኵሉ፡ሰብእ።
20ወዘከመ፡አግብእዎ፡ሊቃነ፡ካህናት፡ወመኳንንቲነ፡ወኰነንዎ፡ለሞት፡ወሰቀልዎ።
21ወንሕነሰ፡ነአምን፡ቦቱ፡ከመ፡ውእቱ፡ዘሀለዎ፡ያድኅኖሙ፡ለእስራኤል፡ወምስለ፡ዝንቱ፡ኵሉ፡ሠሉስ፡ዮም፡እምዘኮነ፡ዝንቱ።
22ወቦ፡አንስትኒ፡እለ፡አንከራ፡ወነገራነ፡ለነ፡እለ፡ጌሣ፡ኀበ፡መቃብር።
23ወኢረከባ፡ሥጋሁ፡ወተሠውጣ፡ወነገራነ፡ከመ፡ርእያ፡ርእየተ፡መላእክት፡እለ፡ይቤልዎን፡ከመ፡ሐይወ።
24ወቦ፡እለ፡ሖሩ፡እምኔነሂ፡ኀበ፡መቃብር፡ወረከቡ፡ከማሁ፡በከመ፡ይቤላ፡አንስት፡ወሎቱሰ፡ኢረከብዎ።
25ወይቤሎሙ፡እግዚእ፡ኢየሱስ፡ኦ፡አብዳን፡ወጕንዱያነ፡ልብ፡ለኢአሚን፡በኵሉ፡ዘይቤሉ፡ነቢያት።
26አኮኑ፡ከመዝ፡ሀለዎ፡ለክርስቶስ፡ይትቀተል፡ወይባእ፡ውስተ፡ስብሓቲሁ።
27ወአኀዘ፡ይፈክር፡ሎሙ፡እምዘሙሴ፡ወዘነቢያት፡ወእምኵሉ፡መጻሕፍት፡ዘበእንቲኣሁ።
28ወቀርቡ፡ሀገረ፡ኀበ፡የሐውሩ፡ባቲ፡ወአኀዘ፡ይትራኀቆሙ፤
29ወአገበርዎ፡ወይቤልዎ፡ንበር፡ምስሌነ፡እስመ፡መስየ፡ወተቈልቈለ፡ፀሓይ፡ወቦአ፡ከመ፡ይኅድር፡ምስሌሆሙ።
30ወእምዝ፡እንዘ፡ይረፍቅ፡ምስሌሆሙ፡ነሥአ፡ኅብስተ፡ወባረከ፡ወፈተተ፡ወወሀቦሙ።
31ወተከሥታ፡አዕይንቲሆሙ፡ወአእመርዎ፡ወጠፍአ፡እምኔሆሙ፡ሶቤሃ፡ወኀጥእዎ።
32ወይቤሉ፡በበይናቲሆሙ፡አኮኑ፡ይነድደነ፡ልብነ፡ዘከመ፡ይነግረነ፡በፍኖት፡ወይፌክር፡ለነ፡መጻሕፍተ።
33ወተንሥኡ፡ሶቤሃ፡ይእተ፡ሰዓተ፡ወተሠውጡ፡ኢየሩሳሌም፡ወረከብዎሙ፡ለዐሠርቱ፡ወአሐዱ፡ጉቡኣኒሆሙ፡ወለእለሂ፡ምስሌሆሙ።
34እንዘ፡ይብሉ፡አማን፡ተንሥአ፡እግዚእነ፡ወአስተርአዮ፡ለስምዖን።
35ወነገርዎሙ፡እሙንቱሂ፡ዘበፍኖት፡ወዘከመሂ፡አእመርዎ፡ለእግዚእነ፡እንዘ፡ይፌትት፡ኅብስተ።
36ወእንዘ፡ዘንተ፡ይትናገሩ፡ቆመ፡ማእከሎሙ፡እግዚእ፡ኢየሱስ፡ወይቤሎሙ፡ሰላም፡ለክሙ፡ኢትፍርሁ፡አነ፡ውእቱ።
37ወደንገፁ፡ወፈርሁ፡ወመሰሎሙ፡ከመ፡ዘመንፈሰ፡ይሬእዩ።
38ወይቤሎሙ፡ምንትኑ፡ያደነግፀክሙ፡ወለምንት፡የዐርግ፡ዘከመዝ፡ኅሊና፡ውስተ፡ልብክሙ።
39ርእዩ፡እደውየ፡ወእገርየ፡ከመ፡አነ፡ውእቱ፡ወግሥሡኒ፡ወአእምሩ፡እስመ፡ለመንፈስሰ፡አልቦቱ፡ሥጋ፡ወዐፅም፡በከመ፡ትሬእዩ፡ብየ።
40ወዘንተ፡ብሂሎ፡አርአዮሙ፡እደዊሁ፡ወእገሪሁ።
41ወእንዘ፡ዓዲ፡ኢአምኑ፡እምድንጋፄ፡ወእንዘ፡ያነክሩ፡በትፍሥሕት፡ይቤሎሙ፡ደቂቅየ፡ቦኑ፡ብክሙ፡ዝየ፡ዘንበልዕ።
42ወወሀብዎ፡መክፈልተ፡ዓሣ፡ጥቡሰ፡ወእምጸቃውዐ፡መዓር።
43ወበልዐ፡በቅድሜሆሙ፡ወነሥአ፡ዘተርፈ፡ወወሀቦሙ።
44ወይቤሎሙ፡አኮኑ፡ዝንቱ፡ነገርየ፡ዘእቤለክሙ፡እንዘ፡ሀለውኩ፡ምስሌክሙ፡ከመ፡ሀለዎ፡ይብጻሕ፡ዘይቤ፡ኦሪተ፡ሙሴ፡ወነቢያት፡ወመዝሙር፡በእንቲኣየ።
45ወእምዝ፡ከሠተ፡ልቦሙ፡ከመ፡ይለብዉ፡መጻሕፍተ፡ወለበዉ።
46ወይቤሎሙ፡ከማሁ፡ጽሑፍ፡ከመ፡ይትቀተል፡ክርስቶስ፡ወይትነሣእ፡እምነ፡ምውታን፡በሣልስት፡ዕለት፤
47ወይስብኩ፡በስሙ፡ለንስሓ፡ወለኅደገተ፡ኀጢአት፡ለኵሉ፡አሕዛብ፡እኂዞሙ፡እም፡ኢየሩሳሌም።
48ወአንትሙሰ፡ሰማዕቱ፡ለዝንቱ፡ነገር።
49ወናሁ፡አነ፡እፌኑ፡ተስፋሁ፡ለአቡየ፡ላዕሌክሙ፡ወአንትሙሰ፡ንበሩ፡ሀገረ፡ኢየሩሳሌም፡እስከ፡ትለብሱ፡ኀይለ፡እምአርያም።
በእንተ፡ዕርገቱ፡ለእግዚእነ
50ወእምዝ፡አውፅኦሙ፡አፍኣ፡እስከ፡ቢታንያ፡ወአንሥአ፡እደዊሁ፡ወአንበረ፡ላዕሌሆሙ፡ወባረኮሙ።
51ወእንዘ፡ይባርኮሙ፡ተረኀቆሙ፡ወዐርገ፡ሰማየ።
52ወእሙንቱሰ፡ሰገዱ፡ሎቱ፡ወተሠውጡ፡ኢየሩሳሌም፡በዐቢይ፡ፍሥሓ።
53ወነበሩ፡በቤተ፡መቅደስ፡ዘልፈ፡እንዘ፡ይባርክዎ፡ወይሴብሕዎ፡ለእግዚአብሔር፡አሜን።
መልአ፡ጽሕፈተ፡ብሥራቱ፡ለሉቃስ፡ረድእ፡አሐዱ፡እም፡ሰብዓ፡ወክልኤቱ፡አርድእት፡ወኮነ፡ዘጸሐፎ፡በልሳነ፡ዮናኒ፡ለሰብአ፡ሀገረ፡መቄዶንያ፡እምድኅረ፡ዕርገቱ፡ለእግዚእነ፡ኢየሱስ፡ውስተ፡ሰማይ፡በሥጋ፡በዕሥራ፡ወአሐዱ፡ዓመት፡ወአመ፡ዐሠርቱ፡ወአርባዕቱ፡ዓመተ፡መንግሥቱ፡ለቀላውዴዎስ፡ወስብሐት፡ለእግዚአብሔር። አሜን።