Biblia Etíope · Biblia Etíope en Ge'ez
Lucas 17
ወንጌል፡ዘሉቃስ።ዘከመ፡ይመጽእ፡መንሱት፡በግብር
1ወይቤሎሙ፡እግዚእ፡ኢየሱስ፡ለአርዳኢሁ፡ግብር፡ይመጽእ፡መንሱት፡ወባሕቱ፡አሌ፡ሎቱ፡ለዘያመጽኣ፡ለመንሱት።
2እምኀየሶ፡ይእስሩ፡በክሣዱ፡ማኅረጸ፡አድግ፡ወያሥጥምዎ፡ውስተ፡ቀላየ፡ባሕር፡እምያስሕቶ፡ለአሐዱ፡እምእሉ፡ንኡሳን።
3ዑቁ፡ርእሰክሙ፡ለእመ፡አበሰ፡ለከ፡እኁከ፡ገሥጾ፡በባሕቲትከ፡ወለእመሰ፡ነስሐ፡ኅድግ፡ሎቱ።
4ወእመኒ፡ስብዐ፡ለለዕለቱ፡አበሰ፡ወስብዐ፡ለለዕለቱ፡ተጋነየ፡ኅድግ፡ሎቱ።
በእንተ፡ኀይል፡ዘሃይማኖት
5ወይቤልዎ፡ሐዋርያት፡ለእግዚእነ፡ወስከነ፡ሃይማኖተ።
6ወይቤሎሙ፡እግዚእ፡ኢየሱስ፡እመ፡ብክሙ፡ሃይማኖት፡መጠነ፡ኅጠተ፡ሰናፔ፡ወትብልዋ፡ለዛቲ፡ሰግላ፡ተመልሒ፡እምሥርውኪ፡ወተተከሊ፡ውስተ፡ባሕር፡ትትኤዘዝ፡ለክሙ።
7መኑ፡እምኔክሙ፡ዘቦ፡ገብር፡ሐረሳዊ፡ወእመኒ፡ኖላዊ፡አቲዎ፡እምወፍሩ፡ይብሎኑ፡እግዚኡ፡ዕርግ፡ፍጡነ፡ወነዓ፡ርፍቅ፡ምስሌየ።
8አኮኑ፡ይብሎ፡አስተዳሉ፡ሊተ፡ዘእዴረር፡ወቅንት፡ወመጥወኒ፡እስከ፡እበልዕ፡ወእሰቲ፡ወእምዝ፡ብላዕ፡ወስተይ፡አንተሂ።
9ቦኑ፡እንጋ፡ምዝጋና፡ለውእቱ፡ገብር፡ለእመ፡ገብረ፡ግብሮ፡ዘአዘዞ፡እግዚኡ።
10ከማሁኬ፡አንትሙኒ፡ገቢረክሙ፡ኵሎ፡ዘአዘዝኩክሙ፡በሉ፡አግብርት፡ፅሩዓን፡ንሕነ፡ወዘይደልወነ፡ለገቢር፡ገበርነ።
በእንተ፡ዐሠርቱ፡እለ፡ለምጽ
11ወእምዝ፡እንዘ፡የሐውር፡ኢየሩሳሌም፡ኀለፈ፡ማእከለ፡ሰማርያ፡ወገሊላ።
12ወእንዘ፡ይበውእ፡አሐተ፡ሀገረ፡ተቀበልዎ፡ዐሠርቱ፡ዕደው፡እለ፡ለምጽ፡ወቆሙ፡እምርኁቅ።
13ወዐውየዉ፡ወይቤሉ፡ኢየሱስ፡ሊቅ፡ተሣሀለነ።
14ወርእዮሙ፡ወይቤሎሙ፡ሑሩ፡ኀበ፡ካህን፡ወአፍትኑ፡ርእሰክሙ፡ወእንዘ፡የሐውሩ፡ነጽሑ።
15ወርእዮ፡አሐዱ፡እምኔሆሙ፡ከመ፡ነጽሐ፡ተመይጠ፡እንዘ፡የአኵቶ፡ለእግዚአብሔር፡በዐቢይ፡ቃል።
16ወሰገደ፡ታሕተ፡እገሪሁ፡ለእግዚእ፡ኢየሱስ፡በገጹ፡ወአእኰቶ፡ወሳምራዊ፡ውእቱ፡ብእሲሁ።
17ወአውሥአ፡እግዚእ፡ኢየሱስ፡ወይቤሎ፡አኮኑ፡ዐሠርቱ፡እሙንቱ፡አንትሙ፡እለ፡ነጻሕክሙ፡አይቴኑ፡እንከ፡ተስዐቱ።
18ሎሙሰ፡ተስእኖሙኑ፡ተመይጦ፡ወአእኵቶቶ፡ለእግዚአብሔር፡ዘእንበለ፡ዝንቱ፡ዘካልእ፡ሕዝቡ።
19ወይቤሎ፡ተንሥእ፡ወሑር፡ሃይማኖትከ፡አሕየወተከ።
በእንተ፡ምጽአተ፡መንግሥተ፡እግዚአብሔር
20ወተስእልዎ፡ፈሪሳውያን፡ወይቤልዎ፡ማእዜ፡ትመጽእ፡መንግሥተ፡እግዚአብሔር፡ወአውሥአ፡ወይቤሎሙ፡ኢትመጽእ፡መንግሥተ፡እግዚአብሔር፡በተዐቅቦ።
21ወኢይብልዋ፡ነያ፡ዝየ፡ወነያ፡ከሃክ፡መንግሥተ፡እግዚአብሔርሰ፡ነያ፡ማእከሌክሙ፡ይእቲ።
22ወይቤሎሙ፡ለአርዳኢሁ፡ይመጽእ፡መዋዕል፡አመ፡ትፈትዉ፡ትርአዩ፡አሐተ፡እምነ፡መዋዕሊሁ፡ለወልደ፡ዕጓለ፡እመሕያው፡ወኢትሬእዩ።
23ወለእመ፡ይብሉክሙ፡ነዋ፡ዝየ፡ወነዋ፡ከሃክ፡ኢትፃኡ፡ወኢትዴግኑ።
24እስመ፡ከመ፡መብረቅ፡ዘይበርቅ፡ወያበርህ፡እምአጽናፈ፡ሰማይ፡እስከ፡አጽናፈ፡ሰማይ፡ከማሁ፡ውእቱ፡ምጽአቱ፡ለወልደ፡ዕጓለ፡እመሕያው።
25ወባሕቱ፡እምቅድመ፡ዝንቱ፡ኵሉ፡ብዙኀ፡የሐምም፡ወታሜክሮ፡ዛቲ፡ትውልድ።
26ወበከመ፡ኮነ፡በመዋዕሊሁ፡ለኖኅ፡ከማሁ፡ይከውን፡በምጽአቱ፡ለወልደ፡ዕጓለ፡እመሕያው።
27እንዘ፡ይበልዑ፡ወይሰትዩ፡ወያወስቡ፡ወይትዋሰቡ፡እስከ፡አመ፡ቦአ፡ኖኅ፡ውስተ፡ንፍቀ፡ታቦት፡ወመጽአ፡ማየ፡አይኅ፡ወአጥፍአ፡ኵሎ፡ኅቡረ።
28ወበከመ፡ኮነ፡በመዋዕሊሁ፡ለሎጥ፡እንዘ፡ይበልዑ፡ወይሰትዩ፡ወየሐንጹ፡ወይተክሉ፡ወይሠይጡ፡ወይሣየጡ።
29እስከ፡አመ፡ዕለተ፡ወፅአ፡ሎጥ፡እምሰዶም፡ወአዝነመ፡እግዚአብሔር፡እሳተ፡ወተየ፡እምሰማይ፡ወአጥፍአ፡ኵሎ።
30ከማሁ፡ውእቱ፡ምጽአቱ፡ለወልደ፡ዕጓለ፡እመሕያው፡ወኢይትዐወቅ።
31ይእተ፡አሚረ፡ዘሀሎ፡ውስተ፡ናሕስ፡ወንዋዩ፡ውስተ፡ቤት፡ኢይረድ፡ይንሣእ፡ወዘሂ፡ገዳመ፡ሀሎ፡ኢይግባእ፡ድኅሬሁ።
32ተዘከርዋ፡ለብእሲተ፡ሎጥ።
33እስመ፡ዘይፈቅድ፡ያድኅና፡ለነፍሱ፡ይገድፋ፡ወዘሰ፡ገደፋ፡ለነፍሱ፡በእንቲኣየ፡ያሐይዋ።
34እብለክሙ፡በይእቲ፡ሌሊት፡ክልኤቱ፡ይሰክቡ፡ውስተ፡አሐዱ፡ዐራት፡አሐደ፡ይነሥኡ፡ወካልኦ፡የኀድጉ።
35ወክልኤቲ፡የሐርጻ፡በአሐቲ፡ማሕረጽ፡አሐተ፡ይነሥኡ፡ወካልእታ፡የኀድጉ።
36ወክልኤቱ፡ይሄልዉ፡ውስተ፡አሐዱ፡ገራህት፡አሐደ፡ይነሥኡ፡ወካልኦ፡የኀድጉ።
37ወአውሥኡ፡ወይቤልዎኀ፡በአይቴኑ፡እግዚኦ፡ወይቤሎሙ፡ኀበ፡ሀሎ፡ገደላ፡ህየ፡ይትጋብኡ፡አንስርት።