Biblia Etíope · Biblia Etíope en Ge'ez
Levítico 9
ኦሪት፡ዘሌዋውያን።1ወኮነ፡በሳምንት፡ዕለት፡ጸውዖሙ፡ሙሴ፡ለአሮን፡ወለደቂቁ፡ወለአእሩገ፡እስራኤል።
2ወይቤሎ፡ለአሮን፡ንሣእ፡ለከ፡ላህመ፡እምነ፡አልህምት፡ዘበእንተ፡ኀጢአት፡ወበግዐ፡ለመሥዋዕት፡ወአምጽኦሙ፡ቅድመ፡እግዚአብሔር።
3ወንግሮሙ፡ለአእሩገ፡እስራኤል፡ወበሎሙ፡ንሥኡ፡ሐርጌ፡አሐደ፡እምአጣሊ፡ዘበእንተ፡ኀጢአት፡ወበግዐ፡ወላህመ፡ወማሕስአ፡ዘዓመት፡ንጹሓነ፡ለመሥዋዕት።
4ወላህመኒ፡እምአልህምት፡ወበግዐኒ፡ለመሥዋዕተ፡መድኀኒት፡ቅድመ፡እግዚአብሔር፡ወስንዳሌ፡ዘልውስ፡በቅብእ፡እስመ፡ዮም፡ያስተርኢ፡ለክሙ፡እግዚአብሔር።
5ወነሥኡ፡በከመ፡አዘዞሙ፡ሙሴ፡ቅድመ፡ደብተራ፡ዘመርጡል፡ወመጽአ፡ኵሉ፡ተዓይን፡ወቆመ፡ቅድመ፡እግዚአብሔር።
6ወይቤሎሙ፡ሙሴ፡ዝንቱ፡ውእቱ፡ቃል፡ዘይቤለክሙ፡እግዚአብሔር፡ግበሩ፡ወያስተርኢ፡ለክሙ፡ስብሐተ፡እግዚአብሔር።
7ወይቤሎ፡ሙሴ፡ለአሮን፡ሑር፡ኀበ፡ምሥዋዕ፡ወግበር፡ዘበእንተ፡ኀጢአትከ፡ወዘመሥዋዕትከ፡ወአስተስሪ፡ለርእስከ፡ወለቤትከ፡ወእምዝ፡ግበር፡መሥዋዕተ፡ዘሕዝብ፡ወአስተስሪ፡ሎሙ፡በከመ፡አዘዘ፡እግዚአብሔር።
8ወሖረ፡አሮን፡ኀበ፡ምሥዋዕ፡ወጠብሐ፡ላህመ፡ዘበእንተ፡ኀጢአቱ።
9ወአምጽኡ፡ደቂቀ፡አሮን፡ደሞ፡ኀቤሁ፡ወጠምዐ፡አጽባዕቶ፡ውስተ፡ደሙ፡ወወደየ፡ውስተ፡አቅርንተ፡ምሥዋዕ፡ወከዐወ፡ደሞ፡ውስተ፡ምንባረ፡ምሥዋዕ።
10ወሥብሖሰ፡ወክልኤሆን፡ኵለያቲሁ፡ወከብዶ፡እንተ፡ትንእስ፡ዘበእንተ፡ኀጢአት፡ወደየ፡ውስተ፡ምሥዋዕ፡በከመ፡አዘዞ፡እግዚአብሔር፡ለሙሴ።
11ወሥጋሁሰ፡ወማእሶ፡አውዐዩ፡በእሳት፡አፍአ፡እምትዕይንት።
12ወጠብሐ፡ዘመሥዋዕትኒ፡ወአምጽኡ፡ደቂቀ፡አሮን፡ኀቤሁ፡ደሞ፡ወከዐዎ፡ዐውደ፡ምሥዋዕ።
13ወመሥዋዕቶኒ፡አምጽኡ፡ሎቱ፡በበመለያልይሁ፡ወርእሶኒ፡ወወደዮ፡ውስተ፡ምሥዋዕ።
14[ወኀፀበ፡ንዋየ፡ውስጡ፡ወእገሪሁ፡ወወደዮ፡ላዕለ፡ምሥዋዕ፡] ዲበ፡መሥዋዕት።
15ወእምዝ፡አብአ፡ቍርባኖ፡ለሕዝብ፡ወነሥኦ፡ለውእቱ፡ሐርጌ፡ዘበእንተ፡ኀጢአት፡ዘሕዝብ፡ወጠብሖ፡ወአንጽሖ፡ወመተሮ፡ከመ፡ዘቀዳሚ።
16ወአብአ፡መሥዋዕተ፡ወገብሮ፡በሕጉ።
17ወአምጽ[አ]፡መሥዋዕተ፡መልአ፡እዴሁ፡እምኔሁ፡ወወደዮ፡ውስተ፡ምሥዋዕ፡ዘእንበለ፡መሥዋዕት፡ዘነግህ።
18ወእምዝ፡ጠብሐ፡ላህመ፡ወበግዐ፡ዘመሥዋዕተ፡መድኀኒት፡ዘሕዝብ፡ወአምጽኡ፡ደቂቀ፡አሮን፡ደሞ፡ኀቤሁ፡ወከዐዎ፡ዐውደ፡ምሥዋዕ፤
19ወሥብሐ፡ዘላህምኒ፡ወዘበግዕኒ፡ወሐቌሁ፡ወሥብሐ፡ዘይገለብባ፡ለከርሡ፡ወክልኤሆን፡ኵለያቲሁ፡ወሥብሐ፡ዘላዕሌሆን፡ወከብዶ፡እንተ፡ትንእስ።
20ወአንበረ፡ሥብሖ፡ዲበ፡ተላዕ፡ወወደዮ፡ውስተ፡ምሥዋዕ።
21ወተላዐ፡ወአገዳ፡ዘየማን፡መተረ፡ለአሮን፡ሀብቱ፡ውእቱ፡ዘቅድመ፡እግዚአብሔር፡በከመ፡አዘዞ፡ለሙሴ።
22ወአልዐለ፡አሮን፡እዴሁ፡ላዕለ፡ሕዝብ፡ወባረኮሙ፡ወወረደ፡ገቢሮ፡ዘበእንተ፡ኀጢአት፡ወዘመሥዋዕት፡ወዘመድኀኒት።
23ወቦኡ፡ሙሴ፡ወአሮን፡ውስተ፡ደብተራ፡ዘመርጡል፡ወወፂኦሙ፡ባረክዎ፡ለኵሉ፡ሕዝብ፡ወአስተርአየ፡ስብሐተ፡እግዚአብሔር፡ለኵሉ፡ሕዝብ።
24ወወፅአት፡እሳት፡እምኀበ፡እግዚአብሔር፡ወበልዐት፡መሥዋዕቶ፡ዘውስተ፡ምሥዋዕ፡ወሥብሐኒ፡ወርእዮ፡ኵሉ፡ሕዝብ፡ወደንገፀ፡ወወድቁ፡በገጾሙ።