1 Timoteo 1

1

1 ጳውሎስ፡ሐዋርያሁ፡ለኢየሱስ፡ክርስቶስ፡በትእዛዘ፡እግዚአብሔር፡መድኀኒነ፡ወኢየሱስ፡ክርስቶስ፡ተስፋነ።

2 ለጢሞቴዎስ፡ወልድየ፡ዘአፈቅር፡በሃይማኖት።ሰላም፡ለከ፡ወሣህል፡ወጸጋሁ፡ለእግዚአብሔር፡አቡነ፡ወእግዚእነ፡ኢየሱስ፡ክርስቶስ።

3 በከመ፡አሰተብቋዕኩከ፡ትንበር፡ኤፌሶን፡አመ፡አሐውር፡መቄዶንያ፡ከመ፡ትገሥጾሙ፡ከመ፡ኢያምጽኡ፡ካልአ፡ትምህርተ።

4 ወኢያምጽኡ፡መኃድምተ፡ወዘውዐ፡ነገር፡ዘይፈጥሩ፡በዘያስሕቱ፡ወያመጽኡ፡ተኃሥሦ፡ወየኀድጉ፡ሕገ፡እግዚአብሔር፡ዘበሃይማኖት።

5 ወማኅለቅቱሰ፡ለትእዛዝ፡ተፋቅሮ፡በንጹሕ፡ልብ፡ወበሠናይ፡ግዕዝ፡ወሃይማኖት፡ዘአልቦ፡ኑፋ፡

6 እስመቦ፡እለ፡አውከኩ፡ወገብኡ፡ውስተ፡ነገረ፡ከንቱ።

7 ወእንዘ፡ይፈቅዱ፡መምህራነ፡ይኩኑ፡ኢያአምሩ፡ዘለሊሆሙ፡ይነቡ።

በእንተ፡ሕግ

8 ናአምር፡ከመ፡ሠናይ፡ውእቱ፡ኦሪት፡ለዘይገብሮ፡በሕጉ።

9 ወናአምር፡ዘኒ፡ከመ፡አኮ፡ለጻድቃን፡ዘይሠራዕ፡ዘእንበለ፡ለኃጥኣን፡ወጽልሕዋን፡ወለዝሉፋን፡ወለውፁኣን፡እምጽድቅ፡ወለርኩሳነ፡ልብ።ወቀተልተ፡አበዊሆሙ፡ወእሞሙ፡ወቀተልተ፡ነፍስ።

10 ዘማውይን፡ወእለ፡የሐውሩ፡ዲቡ፡ብእሱ፡ሰረቅተ፡ሰብእ፡ሐሳውያን፡ወእለ፡ይምሕሉ፡በሐሰት።ወቦ፡ባዕድኒ፡ዓዲ፡በዘይትቃወምዋ፡ለትመህርተ፡ሕይወት ።

11 በከመ፡ወንጌለ፡ስብሐቲሁ፡ለብፁዕ፡እግዚአብሔር፡ዘአነ፡ተአመንኩ፡ቦቱ።

አኰቴት፡በእንተ፡ጽዋዔሁ

12 አአኵቶ፡ለዘተአመነኒ፡ወአጽንዐነ፡በክርስቶስ፡ኢየሱስ፡እግዚእነ፡እስመ፡ምእመነ፡ረስየኒ፡ለመልእክቱ።

13 እንዘ፡ቀዲሙ፡ፀራፊ፡አነ፡ወሰዳዲ፡ወጸኣሊ፡ወባሕቱ፡ተሣሀለነ፡እስመ፡በኢያእምሮ፡ገበርኩ፡በኢአሚን።

14 ወፈድፈደ፡ጸጋሁ፡ለእግዚአብሔር፡በላዕሌየ፡በሃይማኖቱ፡ወበፍቅሩ፡ለኢየሱስ፡ክርስቶስ፡እግዚእነ።

15 እሙን፡ነገሩ፡ወርቱዕ፡ይትወከፍዎ፡በኵሉ፡እስመ፡ኢየሱስ፡ክርስቶስ፤መጽአ፡ውስተ፡ዓለም፡ከመ፡ያድኅኖሙ፡ለኃጥኣን፡ዘአነ፡ቀዳሚሆሙ።

16 ወባሕቱ፡ተሣሀለ፡ከመ፡ያርኢ፡በላዕሌየ፡ኢየሱስ፡ክርስቶስ፡ብዝኀ፡ትዕግሥቱ፡ወእኩኖሙ፡አርለያ፡ለእለ፡ሀለዎሙ፡ይእመኑ፡ቦቱ፡ለሕይወት፡ዘለዓለም።

17 ንጉሥ፡ዘለዓለም፡ዘኢይመውት፡ወኢያስተርኢ፡አምለክ፡ባሕቲቱ፡ዘሎቱ፡ክብር፡ወስብሐት፡ለዓለመ፡ዓለም፡አሜን።

18 ዘንተ፡ትእዛዘ፡አማኅፀነከ፡ኦወልድየ፡ጢምቴዎስ፡በከመ፡ተነብዮ፡ዘላዕሌከ፡ከመ፡ትትጋደል፡ሠናየ፡ገድለ።

19 እንዘ፡ብከ፡ሃይማኖት፡ወሠናይ፡ግዕዝ፡እስመ፡ሀለዉ፡እለ፡አውከኩ፡እምሃይማኖት፡ወተሰብሩሂ።

20 ሄሜኔዎስ፡ወእለ፡እስከንድሮስ።እለ፡መጠውክዎሙ፡ለሰይጣን፡ይትኰነኑ፡ኢይልመዱ፡ፀሪፈ።