፺፰፡በእንተ፡በትረ፡ሙሴ፡ወአሮን።
ወነገሮሙ፡ሙሴ፡ዘንተ፡ወአምጽኡ፡በበአብያተ፡አበዊሆሙ፡እለ፡ኀረዩ፡ለንጽሕ፡ወኮነ፡፲፡ወ፪፡አብትረ፤ወጸሐፈ፡ሙሴ፡አብትሪሆሙ፡በአስማተ፡አበዊሆሙ፤በትረ፡አሮን፡ተጽሕፈት፡በሌዊ፡ወበትረ፡ከርሚን፡ተጽሕፈ፡በይሁዳ፡ወበትረ፡አዶንያስ፡ተጽሕፈት፡በሮቤል፡ወኵሉ፡ቤተ፡እስራኤል፡ከማሁ፡ተጽሕፉ፡አብትሪሆሙ፡በበአስማተ፡አበዊሆሙ።ወይቤሎ፡እግዚአብሔር፡ውግር፡ኀበ፡ጽዮን፡ኀበ፡ደብተራ፡ዘመርጡል፡ወዕጸው፡ህየ፡እስከ፡ነግህ፡ወንሥኦን፡በቅድሜሆሙ፡ወሀቦሙ፡ለለ፡በትሮሙ፡ለለ፡አብያተ፡አበዊሆሙ፡ለለ፡አስማቲሆሙ፡ዘጽሑፍ፡ውስተ፡በትሩ፡ወዘተረክበ፡ትእምርት፡በውስተ፡በትሩ፡ውእቱ፡ኀረይኩ፡ይኩነኒ፡ካህነ። ወነገሮሙ፡ሙሴ፡ዘንተ፡ነገረ፡ወገብሩ፡ከመ፡አዘዞሙ፡እግዚአብሔር።ወእምዝ፡ሶበ፡ጸብሐ፡ነሥአ፡ወመጽኡ፡ኵሉ፡አእሩገ፡እስራኤል፡ወአሮን፤ወቦአ፡ሙሴ፡በቅድሜሆሙ፡ወአልዐሎን፡ለአብትር፡ወአምጽኦን፡ቅድመ፡ኵሉ፡ሕዝብ፡ወተረክበት፡በትረ፡አሮን፡ምስለ፡ፍሬ፡ወጽጌ፡ከርካዕ፡እንተ፡ትምዕዝ፡ሠናየ፡መዐዛ፤ወይቤሎሙ፡ሙሴ፡ርእዩኬ፡ዛቲ፡በትር፡ዘኀረየ፡እግዚአብሔር፡አምላክክሙ፡ኪያሁ፡ፍርሁ፡ወተቀነዩ፡ሎቱ፤ወሰገዲ፡ኵሉ፡ሕዝብ፡ለእግዚአብሔር።በትርኬ፡ይእቲ፡ማርያም፡ወዘእንበለ፡ትስተይ፡ማየ፡ዘሠረጸት፡ጽጌ፡ዘእንበለ፡ዘርአ፡ብእሲ፡ዘተወልደ፡እምኔሃ፡ቃለ፡እግዚአብሔር፤ወዘይቤ፡ኀረይኩ፡ኣርኢ፡ትእምርተ፡ወይኩነኒ፡ካህነ ውእቱ፡እግዚአብሔር፡ኀረያ፡ለማርያም፡እምኵሉ፡ተዓይነ፡እስራኤል፤በከመ፡ተነበየ፡ዳዊት፡አቡሃ፡ያበድሮን፡እግዚአብሔር፡ለአናቅጸ፡ጽዮን፡እምኵሉ፡ተዓይኒሁ፡ለያዕቆብ፤ ወመትልው፡ይቤ፡ነኪር፡ነገሩ፡በእንቲአኪ፡ሀገረ፡እግዚአብሔር፤እምኵሉ፡ትዕይንተ፡እስራኤል፡ወአናቅጺሃ፡ሶበ፡ይብል፡አርምሞ፡አፉሃ፡ወንጽሐ፡ከናፍሪሃ፡ወስብሐት፡ዘይወፅእ፡እምአፉሃ፡ከመ፡ጸቃውዕ፡ዘይውሕዝ፡እምከናፍሪሃ፡ወንጽሐ፡ድንግልናሃ፡ዘእንበለ፡ጥልቀት፡ወዘእንበለ፡ሙስና፡ወርኵስ፡እምቅድመ፡ትለድኒ፤ወእምድኅረ፡ወለደትኒ፡ንጽሕትኒ፡ ወቅድስትኒ፡ወከማሁ፡ከመኒ፡እስከ፡ለዓለም፤ወበሰማያትኒ፡ንጽሕት፡ምስለ፡መላእክት፡ታንሶሱ፡ወይእቲ፡በትረ፡አሮን፡ህሉት፡ይእቲ፡ውስተ፡ጽዮን፡ምስለ፡ጎሞር፡መና፡ምልእት፡ወምስለ፡ክልኤ፡ጽላት፡እለ፡ተጽሕፋ፡በአጽባዕተ፡እግዚአብሔር፡ወጽዮን፡ሰማያዊት፡መንፈሳዊት፡መልዕልቴሆሙ፡ጽዮን፡እንተ፡ግብራ፡ወኅብራ፡ነኪር፡እንተ፡ለሊሁ፡ገባሪሃ፡ወኬንያሃ፡ለማኅደረ፡ስብሐቲሁ፨ወይቤሎ፡ለሙሴ፡ግበር፡ታቦተ፡እምዕፅ፡ዘኢይነቅዝ፡ወትለብጦ፡በወርቅ፡ጽሩይ፡እንተ፡ኵለንታሁ፤ወርቅሰ፡ጽርየተ፡መለኮት፡ዘወረደ፡እምሰማያት፡ እስመ፡መለኮት፡ይእኅዝ፡ኵሎ፡ሰማያተ፡ወምድረ፡ወከማሁ፡በወርቅ፡ተለብጠት፡ታቦት፡ማኅደራ፡ለጽዮን፡ሰማያዊት፡ወታቦት፡ትተረጐም፡ማርያም፡ወዕፅ፡ዘኢይነቅዝ፡ይተረጐም፡ክርስቶስ፡መድኀኒነ፡ወጎሞር፡እንተ፡ይእቲ፡መሶበ፡ወርቅ፡እንተ፡ውስተ፡ታቦት፡ትተረጐም፡ይእቲ፡ማርያም፡ወመና፡ዘውስተ፡መሶብ፡ሥጋሁ፡ለክርስቶስ፡ይተረጐም፡ዘወረደ፡እምሰማያት ፡ወቃለ፡እግዚአብሔር፡ዘተጽሕፈ፡ውስተ፡ክልኤ፡ጽላት፡ይተረጐም፡ክርስቶስ፡ወልደ፡እግዚአብሔር፡ወጽዮን፡መንፈሳዊት፡ትተረጐም፡ብርሃነ፡መለኮት፤መንፈሳዊት፡ባሕርይ፡እንተ፡ተገምረት፡ውስተ፡ታቦት፡በከመ፡ዕንቈ፡ባሕርይ፡እንተ፡ተኀቱ፡ዘብዙኅ፡ሤጣ፡ወይእኅዛ፡ ዘአጥረያ፡ውስተ፡እዴሁ፡ወይፀብጣ፡ወያገምራ፡ውስተ፡እዴሁ፡ወእንዘ፡ሀለወት፡ውስተ፡እዴሁ ፡ቦአ፡ወተገምረ፡ውስቴታ፤ወባሕርይ፡ዘአጥረያ፡ይተረጐም፡ቃለ፡እግዚአብሔር፡ክርስቶስ፡ወእንተ፡ተእኅዘት፡ባሕርይ፡መንፈሳዊት፡ትተረጐም፡ማርያም፡ወላዲተ፡ብርሃን፡ዘእምኔሃ፡ተሠገወ፡አክራጦስ፡ዘአልቦቱ፡ቱስሕት፤በውስቴታ፡ገብረ፡ማኅፈደ፡ለርእሱ፡እምሥጋሃ፡ንጹሕ፡ወተወልደ፡እምኔሃ፡ብርሃን፡ዘእምብርሃን፡አምላክ፡ዘእምአምላክ፡ዘተወልደ፡በፈቃዲ፡ወኢተገብረ፡በእደ፡ካልእ፡አላ፡ለርእሱ፡ገብረ፡ማኅፈደ፡በእንተ፡ኢትትረከብ፡ጥበብ፡እንተ፡ዕዲት፡እምኅሊና፡ሰብእ፨ወካዕበ፡አመ፡አውፅኦሙ፡እግዚአብሔር፡ለእስራኤል፡እምግብጽ፡ጸምኡ፡ማየ፡በቃዴስ፡ወአንጐርጐሩ፡ወበከዩ፡ኀበ፡ሙሴ፡ወሖረ፡ሙሴ፡ኀበ፡እግዚአብሔር፡ ወአይድዖ፡ዘንተ፡ለእግዚአብሔር፤ወይቤሎ፡እግዚአብሔር፡ንሣእ፡በትረከ፡ወዝብጣ፡ለይእቲ፡እዝኅ፡ወዘበጣ፡ሙሴ፡ኑኃ፡ወግድማ፡በአርአያ፡ትእምርተ፡መስቀል፡ወውሕዘት፡ማየ፲ወ፪፡አፍላግ፡ወሰትዩ፡እምኔሃ፡ወረ፡ወዩ፡ሰብኦሙ፡ወእንስሳሆሙ፡ወሰቲዮሙ፡ተለወቶሙ፡ይእቲ፡ኰኵሕ፡ወኰኵሕሰ፡ይተረጐም፡በክርስቶስ፡ወአፍላግ፡ሐዋርያት፡ወዘሰትዩ፡ትምህርተ፡ሐዋርያት፡ወበትርኒ፡ዕፀ፡መስቀል፤ወኰኵሕሰ፡በከመ፡ይቤ፡በወንጌል፡ዘሣረረ፡ዲበ፡ኰኵሕ፡ኢይትሀወክ፡እምአጋንንት፤ወካዕበ፡ይቤ፡አነ፡አንቀጽ፤ወካዕበ፡ይቤ፡አነ፡ዴዴ፤ወርእዩሂ፡ዘከመ ፡ከፈሎሙ፡ለአርዳኢሁ፡እንዘ፡ይብል፡ወለእለ፡እምድኅሬሆሙ፡ጳጳሳት፡ወማኅበረ፡ክርስቲያን፤ አንተ፡ኰኵሕ፡ይቤሎ፡ለጴጥሮስ፡ወላዕሌከ፡አሐንጾሙ፡ለሕዝበ፡ክርስቲያን፤ወዓዲ፡ይቤ፡አነ፡ኖላዌ፡አባግዕ፡ወሎቱኒ፡ይቤሎ፡ሥልሰ፡ረዐይኬ፡አባግዕየ፤ወካዕበ፡ይቤ፡አነ፡ጒንደ፡ዐጸደ፡ወይን፤ወሎሙኒ፡ይቤሎሙ፡አንትሙ፡አዕጹቂሁ፡ወአሕሩጊሁ።ወበትረ፡ሙሴኒ፡እንተ፡ባቲ፡በዘገብረ፡ተኣምረ፡ትተረጐም፡ዕፀ፡መስቀል፡በዘአድኀኖ፡ለአዳም፡ወለደቂቁ፡እምሥቃየ፡አጋንንት፤ወበከመ፡ሙሴ፡ዘበጠ፡ባቲ፡ማየ፡ተከዜ፡ወረሰያ፡ደመ፡ወቀተለ፡ዓሣቲሆሙ፡ከማሁ፡ክርስቶስኒ፡በመስቀሉ፡ቀተሎ፡ለሞት፡ወአውፅኦሙ፡እምውስተ፡ሲኦል፤ወበከመ፡ሙሴ፡ዘበጠ፡በበትሩ፡ውስተ፡ነፋሳት፡ወጸልመ፡ኵላ፡ምድረ፡ግብጽ፡እስከ፡፫፡ዕለት፡ወ፫፡ሌሊት፡ጽልመት፡ዘያርመሰምስ፡እስከ፡ኢይትነሥኡ፡እምስካቢሆሙ፡ወከማሁ፡ክርስቶስኒ፡ተሰቂሎ፡ዲበ፡ዕፅ፡አብርህ፡ጽልመተ፡አልባበ፡ሰብእ፡ወተንሥአ፡እምዉታን፡በሣልስት፡ዕለት፡ወሣልስት፡ሌሊት፤ ወበከመ፡በትረ፡ሙሴ፡ኮነ፡ሚጦተ፡ወወልጦተ፡በቃለ፡እግዚአብሔር፡እንዘ፡ይብስት፡ኮነት፡ዘነፍስ፡ወካዕበ፡እንዘ፡ነፍስ፡ኮነት፡ይብስተ፡ወከማሁ፡ክርስቶስኒ፡በዕፀ፡መስቀሉ፡ረሰየ፡ሕይወተ ፡ለሕዝበ፡ክርስቲያን፡ለእለ፡አምኑ፡ቦቱ፤ረሰየ፡በትእምርተ፡መስቀል፡ከመ፡ይሰደዲ፡መንፈሰ፡አጋንንት፡እስመ፡ተውላጠ፡ኮኑ፡አጋንንት፡ወክርስቲያን፤እሙንቱ፡እንዘ፡መንፈሳዊያን፡ኮኑ፡ኅሱራነ፡በተዐድዎ፡ትእዛዘ፡እግዚኦሙ፡ኮኑ፡ስዲዳነ፡በኀይለ፡መስቀሉ፡ወንሕነኒ፡ኮነ፡መንፈሳዊያነ፡በነሢአ፡ሥጋሁ፡ወደሙ፡ህየንቴሆሙ፡ለእለ፡ተሰዲ፡መንፈሳዊያን፡ወኮነ፡ንሕነ፡ሰባሕያነ፡እለ፡አመነ፡በመስቀሉ፡ወበትንሣኤሁ፡ቅድስት፤ወበከመ፡ሙሴ፡ዘበጠ፡አድባረ፡ወአምጽአ፡መቅሠፍተ፡በትእዛዘ፡እግዚአብሔር፡ሰፊሖ፡እዴሁ፡ምስለ፡በትሩ፡ከማሁ፡ክርስቶስኒ ፡አውፅኦሙ፡ለአጋንንት፡እምላዕለ፡ሰብእ፡በኀይለ፡መስቀሉ፡ሰፊሖ፡እዴሁ፡ዲበ፡ዕፀ፡መስቀል ፤ሶበ፡ይቤሎ፡እግዚአብሔር፡ለሙሴ፡ዝብጥ፡በበትርከ፡ዘንተ፡ብሂል፡ዕትብ፡በማዕተበ፡መስቀሉ፡ለክርስቶስ፡ብሂል፤ወሶበ፡ይቤሎ፡እግዚአብሔር፡ለሙሴ፡ስፋሕ፡እዴከ፡ዝኒ፡ብሂል፡ከመ፡በስፍሐተ፡እዴሁ፡አድኀነነ፡ክርስቶስ፡እምተቀንዮ፡ለጸላኢ፡ወወሀበነ፡ሕይወተ፡እንቲአሁ ፡በስፍሐተ፡እዴሁ፡በዲበ፡ዕፀ፡መስቀል፡ብሂል።ወአመኒ፡ይጸብኡ፡ዐማልቅ፡ምስለ፡እስራኤል፡ዐርገ፡ሙሴ፡ውስተ፡ደብር፡ወአሮን፡ምስሌሁ፡ዐርጉ፡ከመ፡ይጸልዩ፡እስመ፡ተኀየሉ፡ዐማሌቅ፡ወአዘዞ፡እግዚአብሔር፡ለሙሴ፡ወይቤሎ፡ስፋሕ፡እዴከ፡እስከ፡ይረክቡ፡ኀይለ፡እስራኤል፤ ወይቤ፡በውስተ፡ኦሪት፡ኮና፡ርቡባተ፡እዴሁ፡ለሙሴ፡እስከ፡ዕርበተ፡ፀሐይ፡አላ፡ባሕቱ፡ክቡዳት፡እደዊሁ፡ለሙሴ፡ወሶበ፡የዐፅቦ፡አውረደ፡እዴሁ፡እምዘ፡ሰፍሐ፡ይትዌጽዑ፡እስራኤል፡ወይመውእዎሙ፡ፀሮሙ፤ወሶበ፡ያሌዕል፡እዴሁ፡ወይሰፍሕ፡በርቱዕ፡ይትመውኡ፡ዐማሌቅ፡ወይሰድድዎሙ፡እስራኤል፡ወይመው፡እዎሙ፡ለፀሮሙ፡ዓማሌቅ፤ወዘንተ፡ሶበ፡ርእዩ፡አሮን፡ወሆር፡ነደቁ፡እብነ፡በየማኑ፡ወበፀጋሙ፡ለሙሴ፡ወአፅግዑ፡እደወ፡ሙሴ፡ላዕለ፡አእባን፡ዘነደቁ፡አሮን፡እንተ፡የማኑ፡ወሆር፡እንተ፡ፀጋሙ፡ወአኀዝዎ፡ዲበ፡መታክፍቲሆሙ፡ከመ፡ኢያግብእ፡እዴሁ፡እምዘሰፍሖ።ወዘንተ፡እፌክር፡ለክሙ፤ፀብአ፡ዐማሌቅሰ፡ምስለ፡እስራኤል፡ፀብአ፡መሀይምናን፡ምስለ፡አጋንንት፡ውእቱ፡ወዘእንበለ፡ይሰቀል፡ክርስቶስ፡ሞእዎሙ፡ለቀደምት፤ ወሶበ፡ሰፍሐ፡እዴሁ፡ዲበ፡ዕፀ፡መስቀል፡በእንተ፡ኀጢአተ፡አዳም፡ወደቂቁ፡ወሶበ፡ሰፍሐ፡እዴሁ፡ወተቀነወ፡እራኁ፡ሞእዎሙ፡እለ፡ይትዐተቡ፡በመስቀሉ፡ለክርስቶስ፤ስፍሐ፡እዴሁ፡ለሙሴ፡ይተረጐም፡ስቅለቱ፡ለክርስቶስ፡ወዘነደቁ፡አእባን፡አሮን፡ወሆር፡ይተረጐም፡ዕፀ፡መስቀል፡ወቅንዋት፤ወአሮን፡ይተረጐም፡በፈያታዊ፡ዘየማን፡ወሆር፡በፈያታዊ፡ዘፀጋም፡ወዐማሌቅ፡ይተረጐም፡በአጋንንት፡ወንጉሦሙ፡ለዐማሌቅ፡ይተረጐም፡በሰይጣን፤ወአሜሃ፡ዘተመውኡ፡ውእቶሙ፡በትንሣኤሁ፡ለክርስቶስ፡ወበመስቀሉ፡ሞእናሆሙ፡ለአጋንንት፡ወለሰይጣን፡ወካዕበ፡አመ፡ይወፅኡ፡እስራኤል፡እምግብጽ፡ወፅኡ፡ውስተ፡ማይ፡መሪር፡ወኀጥኡ፡ዘይሰትዩ፡እምረተ፡ማዩ፡ወቀዳሚ፡ነጐርጓር፡አንጐርጐሩ፡በእንተ፡ምረተ፡ማይ፤ ወይቤሎ፡እግዚአብሔር፡ለሙሴ፡ንሣእ፡በትረከ፡ወደይ፡ውስቴቱ፡ወዕተቦ፡ይምነ፡ወፅግመ፤ ወርኢ፡በዝንቱ፡ሶበ፡ይቤሎ፡እግዚአብሔር፡ይኩን፡ጥዑመ፡እመ፡ኢኮነኑ፡ጥዑመ፤ወባሕቱ፡ያርኢ፡ከመ፡በትእምርተ፡መስቀል፡ይሤኒ፡ኵሉ፡ወማይ፡መሪር፡ይከውን፡ጥዑመ፡ወኵሉ፡ዘማሰነ፡በኀይለ፡መስቀሉ፡ለኢየሱስ፡ክርስቶስ፡ይከውን፡ሠናየ፡ወአዳመ።ወባዕድኒ፡በዘ፡እነግረከ ፡እምካልኣን፡ነቢያት፡በእንተ፡ስቅለቱ፤ይቤ፡ዳዊት፡ቀነዉኒ፡እደውየ፡ወእገርየ፡ዝኒ፡ገሃደ፡አርአየ፡በእንተ፡ቅንዋተ፡እደዊሁ፡ወእገሪሁ፤ወካዕበ፡ይቤ፡አስተዩኒ፡ብሒአ፡ለጽምእየ፡ዘኒ፡ገሃደ፡አርአየ፡ከመ፡ሰረበ፡ብሒአ፡በእንተ፡ስሕተቱ፡ለአዳም፤መንፈሰ፡ሕይወት፡ዘነፍሐ፡ላዕሌሁ፡ለአዳም፡ሰረበ፡ብሒአ፡ወእድ፡እንተ፡ሣረረታ፡ለምድር፡ተቀነወት፡በእንቲአሁ፡ለአዳም፡ተትሒቶ፡ተወልደ፡አያያተ፡ገብር፡ነሢኦ፨ ፨ ፨