Kebre Negest 93

፺፫፡በእንተ፡ዘአማሰኑ፡ሃይማኖተ፡ሮም።

ወእምድኅረ፡ነበሩ፡፫አውራኀ፡እስመ፡መጽአት፡ጽዮን፡ውስተ፡ብሔረ፡ኢትዮጵያ፡አመ፡ሠረቀ፡ቀዳሚ፡ወርኅ፡በነገረ፡ዕብራዊያን፡ወበጽርእ፡ታርሞን፡ወበግዕዝ፡ሚያዝያ፡አመ፡፮፡ወጸሐፍዎን፡ለእሉ፡ሕግ፡ወአስማት፡ወአንበርዎን፡ለተዝካር፡ለደኃሪ፡መዋዕል፡በዘ፡ይትገበር፡ሕግ፡ለደብተራ ፡ወበዘ፡ይትዐወቅ፡ክብረ፡ነገሥተ፡ኢትዮጵያ፡ወክብረ፡ነገሥተ፡ሮምያ፤እስመ፡አኀው፡እሙንቱ ፡ወበአሚነ፡ክርስቶስኒ፤ቀዳሚሰ፡ርቱዐ፡አምነ፡በስብከተ፡ሐዋርያት፡እስከ፡ቈስጠንጢኖስ፡ወእሌኒ፡ንግሥት፡ዘአውፅአት፡ዕፀ፡መስቀል፤ወነበሩ፡፻ወ፴፡ዓመት፡ወእምድኅሬሁ፡ተንሥአ፡ሰይጣን፡ዘእምትካት፡ዕድዉ፡ለሰብእ፡ወአስሐቶሙ፡ለሰብአ፡ብሔረ፡ሮሜ፡ወአሕሠምዋ፡ለሃይማኖተ፡ክርስቶስ፡ወአምጽኡ፡ኑፋቄ፡ላዕለ፡ቤተ፡ክርስቲያን፡ዘእግዚአብሔር፡በአፈ፡ ንስጥሮስ፤ወንስጥሮስ፡ወአርዮስ፡ወይባሶ፡እለ፡ወደየ፡ውስተ፡ልቦሙ፡ዘወደየ፡ቅንአተ፡ውስተ፡ልቡ፡ለቀየን፡ከመ፡ይቅትል፡እኁሁ፡አቤልሃ፤ወከማሁ፡ወደየ፡ውስተ፡ልቦሙ፡አቡሆሙ፡ዲያብሎስ፡ጸራ፡ለጽድቅ፡ወጸላኤ፡ሠናያት፤በከመ፡ይቤ፡ዳዊት፡ወነበቡ፡ዐመፃ፡ውስተ፡አርያም ፡ወአንበሩ፡ውስተ፡ሰማይ፡አፉሆሙ፡ወአንሶሰወ፡ውስተ፡ምድር፡ልሳኖሙ፡ዘለሊሆሙ፡ኢያእመሩ፡እምኀበ፡መጽኡ፡ወኢያእመሩ፡ኀበ፡የሐውሩ፡ለፈጣሪሆሙ፡በልሳኖሙ፡ይውሕኩ፡ወይፀርፉ፡ላዕለ፡ስብሐቲሁ፡እንዘ፡አምላክ፡ውእቱ፡ቃለ፡እግዚአብሔር፤ወረደ፡እመንበረ፡መለኮቱ፡ወለብሰ፡ሥጋ፡አዳም፡ወእግዚአብሔር፡ውእቱ፡ቃል፡ወበይእቲ፡ሥጋ፡ተሰቅለ፡ከመ፡ይቤዝዎ፡ለአዳም፡በዕልወቱ፡ወዐርገ፡ውስተ፡ሰማይ፡ወነበረ፡ዲበ፡መንበረ፡መለኮቱ፡በይእቲ፡ሥጋ፡እንተ፡ነሥአ፡ወካዕበ፡ይመጽእ፡በስብሐት፡ይኴንን፡ሕያዋነ፡ወሙታነ፡ወይፈድዮ፡ለኵሉ ፡በከመ፡ምግባሩ፡ለዓለመ፡ዓለም፡አሜን፡ወንሕነሰ፡ነአምን፡ከመዝ፡ወንገኒ፡ለቅድስት፡ሥላሴ፤ ወእለሰ፡ኢየአምኑ፡ከመዝ፡ውጉዛን፡እሙንቱ፡በቃለ፡እግዚአብሔር፡ንጉሠ፡ሰማያት፡ወምድር፡በዝ፡ዓለም፡ወበዘይመጽእ፡ዓለም፤ወንሕነሰ፡ጸናዕነ፡በርትዕት፡ሃይማኖት፡እንተ፡አበው፡ሐዋርያት፡ወአወፈዩነ፡ሃይማኖተ፡እንተ፡ቤተ፡ክርስቲያን፤ወከማሁ፡ትነብር፡ኢትዮጵያ፡ምስለ፡ሃይማኖታ፡እስከ፡ምጽአተ፡እግዚእነ፡ኢየሱስ፡ክርስቶስ፡ዘሎቱ፡ስብሐት፡ለዓለመ፡ዓለም፡አሜን፨ ፨ ፨