፺፡ኀበ፡ወደሳ፡አዛርያስ፡ለንግሥት፡ወለሀገራ።
ወተንሥአ፡አዛርያስ፡ወይቤላ፡ለንግሥት፡ኦእግዝእትነ፡በአማን፡አልቦ፡ዘይትማሰለኪ፡በጥበብ፡ወበአእምሮ፡ወተውህበ፡ለኪ፡እምኀበ፡እግዚአብሔር፡ዘእንበለ፡እግዚእየ፡ንጉሥ፡ዘአብጽሐነ፡ውስተ፡ዛቲ፡ምድር፡ምስለ፡እግዝእትነ፡ጽዮን፡ቅድስት፡ሰማያዊት፡ታቦተ፡ሕጉ፡ለእግዚአብሔር ።ንሕነሰ፡ወአበዊነ፡ቀደምት፡ንቤ፡አልቦ፡ዘኀረየ፡እግዚአብሔር፡ዘእንበለ፡ቤተ፡ያዕቆብ፡ኪያነ፡ኀረየ፡ወኪያነ፡አብዝኀ፡ወኪያነ፡ሠምረ፡ወአንገሠነ፡ወረሰየነ፡ሰብአ፡ቤቱ፡ወመማክርቲሁ፡ለስብሐቲሁ፡ወለታቦተ፡ኪዳኑ፡ወሀገርኒ፡ንብል፡አልቦ፡ዘኀረየ፡ዘእንበለ፡ሀገርነ፤ወይእዜሰ፡ርኢነ፡እንተ፡ትኄይስ፡ሀገረ፡ኢትዮጵያ፡እምብሔረ፡ይሁዳ፤ወእምከመ፡በጻሕነ፡ውስተ፡ ብሔርክሙ፡ሠነየነ፡ኵሉ፡ዘርኢነ፡ማይክሙኒ፡ሠናይ፡ወትሁቡ፡ዘእንበለ፡ሤጥ፡ወነፋስ፡ዘእንበለ፡መረዋሕት፡ወጸቃውዕ፡ከመ፡ጽንጒነ፡መርሕብ፡ወእንስሳ፡ከመ፡ኆጻ፡ባሕር፡ወእምዘ፡ርኢነ፡አልቦ፡ሕሱመ፡ወአልቦ፡ፀዋገ፡እምዘ፡ንሰምዕ፡ወእምዘ፡ንከይድ፡ወእምዘ፡ንገስስ፡ወእምዘ፡ንጥዕም፡በአፉነ፤ወባሕቱ፡እምእንተ፡ትኔጽር፡አሐቲ፡ሀለወት፡ኮንክሙ፡ጸሊማነ፡በገጽ፡ወዘንተ፡ዘእቤ፡በዘ፡ርኢኩ፡ወባሕቱ፡ለእመ፡አብርሀ፡እግዚአብሔር፡አልባቢክሙ፡አልቦ ፡ዘይነኪየክሙ።ወባሕቱ፡ተገሐሡ፡እማውታ፡ወደም፡ወብትክ፡ወዝሙት፡ወእምኵሉ፡ ዘይጸልእ፡እግዚአብሔር፡ከመ፡ንትፈሣሕ፡ብክሙ፡ሶበ፡ሬኢየክሙ፡እንዘ፡ትፈርሁ፡እግዚአብሔር፡ወእንዘ፡ትርዕዲ፡እምቃሉ፤በከመ፡አዘዞሙ፡እግዚአብሔር፡ለአበዊነ፡ወይቤሎ፡ለሙሴ፡አዝዞሙ፡በኵሉ፡ወንግሮሙ፡ከመ፡ይዕቀቡ፡ሕግየ፡ወሥርዐትየ፤ወኢትትገሐሡ፡ኢለየማን፡ወኢለፀጋም፡እምዘ፡ንኤዝዘክሙ፡ዮም፡ወይእዜኒ፡ከመ፡ታምልክዎ፡ለእግዚአብሔር፡ቅዱሰ፡እስራኤል፡ወትግበሩ፡ሥምረቶ፡እስመ፡መነኖሙ፡ለሕዝብነ፡በከመ፡ተነበዩ፡ነቢያቲነ፡ወኀረየ፡ኪያክሙ፤አኮኑ፡ለኵልክሙ፡እግዚአብሔር፡ፈጣሪክሙ፡ምንተ፡ይሰአኖ፡ ለእግዚአብሔር፡ለእመ፡አፍቀረ፡ኪያነ፡ወጸልአ፡ኪያሆሙ፡እስመ፡ኵሉ፡ሎቱ፡ወኵሉ፡ተግባሩ፡ወአልቦ፡ዘይሰአኖ፡ለእግዚአብሔር፡አምላከ፡እስራኤል።ወስምዑ፡እንግርክሙ፡ትእዛዞ፤፩፡ኢይትኀየል፡ካልኦ፡ወኢትሂዲ፡ንዋየ፡ቢጽክሙ፡ወኢትትሓመዩ፡ወኢትትዓመፁ፡ወኢትትላኰዩ፤ወለእመቦ፡ዘአተወ፡እንስሳ፡ምስለ፡ንዋይክሙ፡እምንዋየ፡ቢጽክሙ፡ኢትትዐወርዎ፡አላ፡አግብኡ፡ሎቱ፡ወለእመሰ፡ኢያእመርክሙ፡ባዕለ፡ንዋዩ፡አጽንዑ፡ሎቱ፡ወእምከመ፡ረከበ፡አግብኡ፡ሎቱ፡ንዋዮ፤ወእመቦ፡ዘወድቀ፡ንዋየ፡ቢጽክሙ፡ውስተ፡ግብ፡አው፡ ውስተ፡ዐዘቅት፡አው፡ውስተ፡ቀላይ፡አው፡ውስተ፡ጸድፍ፡ኢትትዐደዉ፡ወኢትትኀለፉ፡እስከ፡ትነግርዎ፡ወታስተላዕልዎ፤ወእመኒቦ፡ዘከረየ፡ዐዘቅተ፡ወዘሐነጸ፡ማኅፈደ፡ኢይኅድግ፡ዘእንበለ፡መክደን፡ወተድባብ፤ወለእመኒቦ፡ዘጾረ፡ጾረ፡ክቡደ፡አው፡ለእመኒ፡ቦዘጸዓነ፡ዘወድቆ፡ኢትኅልፉ ፡ዘእንበለ፡ታስተላዕልዎ፡ወታቅልሉ፡ሎቱ፡እስመ፡እኁክሙ፡ውእቱ፤ወኢታብስሉ፡እጐልተ፡በሐሊበ፡እሙ፤ወኢትግምጹ፡ፍትሐ፡ምስኪን፡ወእጓለ፡ማውታ፤ወኢታድልዉ፡ለገጽ፡ወኢትንሥኡ፡ሕልያነ፡ለገሚጸ፡ፍትሕ፡ወለስምዐ፡ሐሰት፤ወሶበ፡ትረክቡ፡ዖፈ፡በውስተ፡ምድርክሙ፡ምስለ፡አፍኅርቲሃ፡ታሕይዉ፡ኪያሃ፡ወኢትንሥኡ፡ደቂቃ፡ከመ፡ይኑኅ፡መዋዕሊክሙ፡በዲበ፡ምድር፡ወይትባረኩ፡ዘርእክሙ፡ለነዋኅ፡መዋዕል፤ወሶበ፡ተዐጽዲ፡ማእረረ፡እክልክሙ፡ኢትጠናቀቁ፡ዐጺደ፡ወዘወድቀሂ፡ኢትእርዩ፡ወዘረሳዕክሙ፡ክልስስተ፡ኅድጉ፡ተመዪጠክሙ፡ኢትንሥኡ፡አላ፡ኅድጉ፡ለግዩረ፡ሀገርክሙ፡ከመ፡ይባርክ፡እግዚአብሔር ፡ፍሬ፡ምድርክሙ፤ወኢትግበሩ፡ርኩሰ፡ወኢትፍትሑ፡በአድልዎ፡ወኢትግበሩ፡ዐመፃ፡በኵሉ፡ዘትትናገሩ፡ከመ፡ትትባረኩ፡ወከመ፡ይብዛኅ፡ፍሬ፡ምድርክሙ፡ወከመ፡ትድኀኑ፡እመርገመ፡ሕግ፡ዘአዘዘ፡እግዚአብሔር፡ከመ፡ይርግምዎ፡ለገባሬ፡እኪት፡ወጸሐፈ፡እንዘ፡ይብል፡ዘያስሕቶ፡ፍኖቶ፡ለዕዉር፡ርጉም፡ውእቱ፤ወዘይነግሮ፡ሕሡመ፡ለጽሙም፡ርጉም፡ውእቱ፤ወዘአርኰሰ፡ምስካበ፡አቡሁ፡ርጉም፡ውእቱ፤ወዘይዘብጥ፡ቢጾ፡በጒሕሉት፡ርጉም፡ውእቱ፤ወዘይገምጽ፡ፍትሐ፡ግዩር፡ከመ፡ይቅትል፡ደመ፡ንጹሕ፡ርጉም፡ውእቱ፤ዘያስተአኪ፡አቡሁ፡ወእሞ፡ርጉም፡ውእቱ፤ወኵሉ፡ዘይገብር፡ግልፎ፡ወስብኮ፡ዘርኩስ፡ግብረ፡እደ፡ሰብእ፡ወይሠይሞ፡ወየኀብኦ፡ውስተ፡ቤቱ፡ወይሰግድ፡ሎቱ፡ከመ፡አምላክ፡ኢአሚኖ፡ከመ፡ እግዚአብሔር፡ፈጣሬ፡ሰማያት፡ወምድር፡ዘገብሮ፡ለአዳም፡በዘ፡ዚአሁ፡አርአያ፡ወአምሳል፡ወሤሞ፡ላዕለ፡ኵሉ፡ዘፈጠረ፡ወኵልነ፡ተግባሩ፡ንሕነ፡ዘንተ፡ዘኢየአምን፡ርጉመ፡ለይኩን፡አሜን፤ወዘይሰክብ፡ምስለ፡እንስሳ፡ርጉመ፡ለይኩን፤ወዘይሰክብ፡ምስለ፡ተባዕት፡ከመ፡ዘምስለ፡አንስት፡ርጉመ፡ለይኩን፤ዘይቀትል፡ነፍሰ፡ደመ፡ንጹሐ፡በዐመፃ፡ወበጒሕሉት፡ርጉመ፡ለይኩን፡ወእምኵሉሰ፡ኢታምልኩ፡ባዕደ፡አማልክተ፡እስመ፡ቀናኢ፡እግዚአብሔር፡ለእለ፡ይትዔወርዎ፡ወይገብሩ፡ከመዝ፡ወያቀውም፡ገጾ፡ላዕሌሆሙ፡እስከ፡ይሤርዎሙ፡እምድር፡ሕይወቶሙ፡ወያጠፍእ፡ዝክሮሙ፡እስከ፡ለዓለም ፤ብፁዓን፡እለ፡ይሰምዑ፡ቃለ፡እግዚአብሔር፡ወይገብሩ፡ወየዐቅቡ፡ወብፁዓን፡እለ፡ይትገሐሡ፡እምእለ፡ይገብሩ፡እኩየ፡ከመ፡ኢትርክቦሙ፡እምእንተ፡ትመጽእ፡መቅሠፍት፡ለኃጥኣን፤ ወለእመሰ፡ኮንከ፡ዘተዐቅብ፡ቃለ፡እግዚአብሔር፡ተገሐሥ፡እምፍኖተ፡ኃጥኣን፡ከመ፡ኢትዘበጥ፡በእንተ፡ተዘብጡ፡በበትር፤በከመ፡ይቤ፡ዳዊት፡አበ፡አቡሁ፡ለእግዚእነ፡ዳዊት፡እስመ፡ኢየኀድግ ፡እግዚአብሔር፡በትረ፡ኃጥኣን፡ዲበ፡መክፈልተ፡ጻድቃን፡ከመ፡ኢያንሥኡ፡እደዊሆሙ፡ጻድቃን፡በዐመፃ፤ለእመ፡ተክህሎ፡ለብእሲ፡ይግበር፡ሠናየ፡ለሊሁኒ፡ይዕቀብ፡ወለቢጹኒ፡ይንግር ፡ከመ፡ይኩን፡ባዕለ፡ክልኤ፡መካልይ፡ወይትወሰኮ፡ክልኤ፡መካልይ፡ወይከውን፡ትርብዕተ፡ዐስቡ፡በኀበ፡እግዚአብሔር፡እስመ፡ገብረ፡ለሊሁ፡ወመህረ፡ለቢጹ፡ወበእንተዝ፡ይፈደፍድ፡ዐስቡ፤ወካዕበ፡ብፁዓን፡ትከውኑ፡ለእመ፡ወሀብክሙ፡ንዋይክሙ፡ዘእንበለ፡ርዴ፡ወልቃሕ፨ ፨ ፨