Kebre Negest 89

፹፱፡ኀበ፡ነገረቶሙ፡ንግሥት፡ለደቂቀ፡እስራኤል።

ወአውሥአት፡ንግሥት፡ወትቤሎሙ፡አኮ፡ከመ፡አግብርት፡ዘትብሉ፡አላ፡ንሬስየክሙ፡ከመ፡አብ፡ወከመ፡መምህር፤እስመ፡አንትሙ፡ዐቃብያነ፡ሕጉ፡ለእግዚአብሔር፡ወመራሕያነ፡ትእዛዙ ፡ለአምላከ፡እስራኤል፡ወሰብአ፡ቤቱ፡ለእግዚአብሔር፡ወዐቃብያኒሃ፡ለጽዮን፡ታቦተ፡ሕጉ፡ለእግዚአብሔር፡ወአልቦ፡ዘንትዐደው፡እምትእዛዝክሙ፡እስመ፡አንትሙ፡ትከውኑነ፡መርሐ፡በኀበ፡ፍኖተ፡እግዚአብሔር፡እምኵሉ፡እኩይ፤ንትገሐሥ፡በቃልክሙ፡እምዘኢይሠምር፡እግዚአብሔር፡ወንቅረብ፡ኀበ፡ኵሉ፡ሠናይ፡ዘሠምረ፡እግዚአብሔር፡በትእዛዘ፡ዚአክሙ፤ ወባሕቱ፡አይድዑ፡ለዝንቱ፡ኵሉ፡ሕዝብ፡ወመሀርዎሙ፡ቃላተ፡አእምሮ፡እስመ፡አልቦ፡አመ፡ሰምዑ፡ዘእንበለ፡ዮም፡ዘከመዝ፤ወባሕቱ፡ጥበብሰ፡ወአእምሮ፡ታበርህ፡ከመ፡ብርሃነ፡ፀሐይ፡ለእለ፡ቦሙ፡አእምሮ።ወአንሰ፡እስከ፡ይእዜሂ፡ኢረወይክዎ፡ለማየ፡አእምሮ፡እስመ፡ይጥዕም፡እምነ፡መዓር፡ወያረዊ፡እምነ፡ወይን፡ወያጸግብ፡ወያጐሥዕ፡ጥበበ፡ወያስዖዝዝ፡ልቡና፡ወያልሕስ፡ከመ፡ዘሰክረ፡ወያለጸልጽ፡ከመ፡ዘጐየ፡ወያሀፉ፡ከመ፡ዘጾረ፡ክቡደ፡በፍኖተ፡ዐቀብ፡በብሔረ፡ሐሩር፡ወላህበ፡ፀሐይ፤ሶበ፡ተከሥተ፡አልባቢሆሙ፡ለጠቢባን፡ለትንቢት፡ወለምህሮ፡ኢይፈርህዎ፡ለንጉሥ፡በእንተ፡ዕበየ፡ክብሩ፡ለእመ፡ተግሕሠ፡እምፍኖተ፡እግዚአብሔር። ነዋኬዝ፡ዘተነግረ፡ቃለ፡ሕግ፡ዘበአማን፡አእምሮ፡ለእለ፡ይፈቅድዎ፡ወይሰትይዎ፡ወይረውይዎ፤ አንሰ፡እጼሊ፡እግዚኦ፡አምላከ፡እስራኤል፡ቅዱሰ፡ቅዱሳን፡ሀበኒ፡ከመ፡እትልዋ፡ለጥበብ፡ወኢይትገደፍ፡ሀበኒ፡ከመ፡እጠቀም፡ባቲ፡ወኢይንኀ፡ሀበኒ፡ከመ፡እሣረር፡ባቲ፡ወኢያንቀልቅል ፡ሀበኒ፡ከመ፡እትዐመድ፡ባቲ፡ወኢይጽነን፡ሀበኒ፡ከመ፡እሰወር፡ባቲ፡ወኢይትቀላዕ፡ሀበኒ፡ከመ፡እትሐነጽ፡ባቲ፡ወኢይንሐድ፡ሀበኒ፡ከመ፡እትወርዘው፡ባቲ፡ወኢይድክም፡ሀበኒ፡ከመ፡እቁም፡ባቲ፡ወኢይደቅ፡ሀበኒ፡ከመ፡እትመርጐዝ፡ባቲ፡ወኢይተንትን፡ሀበኒ፡ከመ፡እሠአን፡ባቲ፡ወኢይድኀፅ፡ሀበኒ፡ከመ፡እትአኀዝ፡ባቲ፡ወኢይሰጠም፡ሀበኒ፡ከመ፡እጽናዕ፡ባቲ፡ወኢይሠረም፡ ሀበኒ፡ከመ፡እንበር፡ባቲ፡በስንኣሃ፡እጽገብ፡በማእዳ፡ወኢይሜጽራ፡እስትያ፡ወኢይረውያ፡እጽገባ፡ወኢይተፍኣ፤ሰከርኩ፡ባቲ፡ወኢተንተንኩ፡ተንተንኩ፡በእንቲ፡አሃ፡ወኢወደቁ፡ወደቁ፡በእንቲአሃ፡ወኢተሀጐልኩ፡ባቲ።ተሰጠምኩ፡በእንቲአሃ፡ውስተ፡ዐቢይ፡ባሕር፡ወአኀዝኩ፡ባሕርየ፡በውስተ፡ልጐተ፡መዓምቅቲሃ፡በዘባቲ፡እብዕል፤ወረድኩ፡ከመ፡ዐቢይ፡መልሕቀ፡ኀጺን፡በዘ፡ይበይታ፡አሕማር፡ውስተ፡ዕመቀ፡ባሕር፡ወነሣእኩ፡ማኅቶተ፡እንተ፡ታበርህ፡ሊተ፡ወዐረጉ፡በአሕባለ፡ራግናቲሃ፡ለልቡና፤ኖምኩ፡ውስተ፡መዓምቅቲሃ፡ለባሕር፡ወዘእንበለ፡እትዐዘዝ፡በማይ፡ሐለምኩ፡ባቲ፡እንዘ፡ኮከብ፡ውስተ፡ሕፅንየ፡ወአንከርኩ፡ባቲ፡በእኂዞታ፡ ወአጽናዕክዋ፡ምስለ፡ጸዳለ፡ፀሐይ፡አኀዝክዋ፡ወኢየኀድጋ፡እስከ፡ለዓለም፤ቦእኩ፡ውስተ፡አናቅጸ፡መዛግብቲሃ፡ለጥበብ፡ወሔብኩ፡ሊተ፡ማየ፡አእምሮ፤ቦእኩ፡ውስተ፡ዋዕየ፡ነበልባለ፡ፀሐይ፡ወአብርሀተኒ፡በጸዳላ፡ወተወልተውኩ፡ባቲ፡ወድኅንኩ፡በተወክሎታ፤አኮ፡ሊተ፡ባሕቲትየ ፡አላ፡ለኵሎሙ፡እለ፡ሖሩ፡በአሠራ፡ለጥበብ፡አኮ፡ሊተ፡ለባሕቲትየ፡አላ፡ለኵሎሙ፡ሰብአ፡ሀገርየ፡መንግሥተ፡ኢትዮጵያ፡ወአኮ፡ሎሙ፡ለባሕቲቶሙ፡አላ፡ለእለ፡የሐውሩ፡በፍኖቶሙ፡አሕዛብ፡እለ፡ዐውዶሙ።እስመ፡እግዚአብሔር፡ወሀበነ፡ዘርአ፡በጽዮን፡ወማኅደረ፡በኢየሩሳሌም ፡ወዓዲ፡ኮነ፡ክፍለ፡ምስለ፡እለ፡ኀረየ፡ዘርአ፡ያዕቆብ፡እስመ፡ረሰያ፡ለማኅደሩ፡ትኅድር፡ምስሌነ ፤እሙንቱሰ፡እምይእዜ፡ተዐቅጹ፡ወንሕነሰ፡እምይእዜ፡ረታዕነ፡እሙንቱሰ፡እምይእዜ፡ኀስሩ፡ወተመነኑ፡ወንሕነሰ፡እምይእዜ፡ከበርነ፡ወተፈቀርነ፡እስከ፡ለዓለመ፡ዓለም፡ወለትውልደ፡ትውልድ፡ዘይመጽእ።ወአንትሙኒ፡መኳንንት፡ስምዑኒ፡ወጠይቅዋ፡ለመክሥተ፡አፉየ፡ወቃልየ፤ አፍቅርዋ፡ለርትዕ፡ወጽልእዋ፡ለሐሰት፡ርትዕሰ፡ጽድቅ፡ወሐሰትሰ፡ርእሰ፡ዐመፃ፡ወኢትትዓመፁ ፡በበይናቲክሙ፤እስመ፡እግዚአብሔር፡የኀድር፡ምስሌክሙ፡ወማኅደረ፡ስብሐቲሁ፡ማእከሌክሙ፡እስመ፡ሰብአ፡ቤቱ፡ኮንክሙ፡ወኅድጉ፡እምይእዜ፡ዘትካት፡ልማድክሙ፡ተጠይሮ ፡ወአጣዕዎ፡ሰገለ፡ወሥራየ፡ወቀስመ፡ወሐረሰ፤ወለእመቦ፡ዘተረክበ፡እምዮም፡በውስተ፡ዘትካት ፡ልማድ፡ይትበርበር፡ቤቱ፡ወይትኰነን፡ምስለ፡ብእሲቱ፡ወውሉዲ፡ወንዋዩ፨ወትቤሎ፡ለአዛርያስ ፡በል፡ንግር፡ዘከመ፡ታፈቅር፡እግዝእትነ፡ምስለ፡ንጉሥ፡ሰማያዊ፨ ፨ ፨