Kebre Negest 88

፹፰፡ኀበ፡ዜነዋ፡ለእሙ፡ዘከመ፡አንገሥዎ።

ወሶበ፡አርመሙ፡እሉ፡ተንሥአ፡ካህን፡ዘይኤዝዘነ፡ዘምስለ፡ፍርሀተ፡እግዚአብሔር፡ወአንብዕ፡እንዘ፡ትርዕድ፡ከርሥነ፡ወትውኅዝ፡አንብዕነ፤ውስተ፡ልብነ፡በአማንኬ፡ወኢኮነ፡ሐሰተ፡ህልው፡እግዚአብሔር፡ወይነብር፡ውስተ፡ትእዛዙ፡ወነጊረ፡ትእዛዙ፡ኢያአትት፡እምእለ፡ያፈቅርዎ፡ወየዐቅቡ፡ትእዛዞ፡ይሄሉ፡ወትረ፡ምስሌሆሙ፡ወይእዜኒአ፡ስምዕዮሙአ፡እሉ፡መላህቅት፡ወደቂቀ፡ኀያላነ፡እስራኤል፡ዘአምጽኡ፡ኵነኔ፡ወፍትሐ፡ዘጸሐፉ፡በቅድመ፡ንጉሥ፡ሰሎሞን፡ወወሀቡነ፡ከመ፡ኢንትገሐሥ፡ኢለየማን፡ወኢለፀጋም፡እምዘ፡አዘዙነ፤ወካዕበ፡ይቤሉነ፡ወአለበዉነ፡ከመ፡ነሣእነ፡ሞተ፡ወሕይወተ፡ወከመ፡ብእሲ፡ዘቦቱ፡ውስተ፡ፀጋሙ፡እሳት፡ወውስተ፡የማኑ፡ማይ፡ወኀበ፡ይፈቅድ፡ይወዲ፡እዴሁ፤እስመ፡መቅሠፍት፡ወሕይወት፡ጽሑፍ፡ውስቴቱ፡ለእለ፡ገብርዋ፡ለእኪት፡መቅሠፍት፡ወለእለ፡ገብርዋ፡ለሠናይት፡ሕይወት፨ወአውፅኡ ፡ኤልምያስ፡ወአዛርያስ፡ይእቲ፡መጽሐፈ፡እንተ፡ተጽሕፈት፡በቅድመ፡እግዚአብሔር፡ወበቅድመ፡ንጉሠ፡እስራኤል፡ወአንበብዋ፡በቅድመ፡መክዳ፡ወበቅድመ፡ዐበይተ፡እስራኤል። ወሶበ፡ሰምዑ፡ዘንተ፡ቃላተ፡ሰገዲ፡ለእግዚአብሔር፡ኵሎሙ፡እለ፡ውስተ፡ዐውድ፡ንኡሶሙ፡ ወዐቢዮሙ፡ወገነዩ፡ወሰብሑ፡ለእግዚአብሔር፡ለዘ፡አስምዖሙ፡ዘንተ፡ቃለ፡ወወሀቦሙ፡ዘንተ፡ትእዛዘ፡ከመ፡ይግበሩ፡ፍትሐ፡ወኵነኔሁ፡ለእግዚአብሔር፤ወዓዲ፡ረሰዮሙ፡ሰብአ፡ቤቱ፡እስመ፡ሀለወት፡ጽዮን፡ማእከሌሆሙ፡ወማኅደረ፡ስብሐቲሁ፡ለእግዚአብሔር፡እንተ፡ታድኅኖሙ፡እምኵሉ፡እኩይ፡ወትባርክ፡ፍሬ፡ምድሮሙ፡ወታበዝኅ፡እንስሳሆሙ፡ወትባርክ፡አንቅዕተ፡ማያቲሆሙ፡ወትባርክ፡ተግባሮሙ፡ወፍሬ፡አትክልቲሆሙ፡ወታልህቅ፡ውሉዶሙ፡ወተዐቅብ፡ርሡኣኒሆሙ፡ወትከውኖሙ፡ፍጽመ፡ወኳላ፡ኀበ፡ኵሉ፡ዘኀደሩ፡ወይመውኡ፡ፀሮሙ፡በኵሉ፡ኀበ፡ሖሩ።ወተፈሥሑ፡ኵሎሙ፡ሰብአ፡ኢትዮጵያ፨ወንግሥትኒ፡ትቤሎ፡ለወልዳ፡ወልድየ፡ ወሀበከ፡እግዚአብሔር፡ርትዐ፡ወሖር፡ባቲ፡ወኢትትገሐሥ፡ኢለየማን፡ወኢለፀጋም፤ወአፍቅር፡እግዚአብሔር፡ አምላክከ፡እስመ፡መሓሪ፡ውእቱ፡ለየዋሃን፡እስመ፡እምትእዛዙ፡ይትዐወቅ፡ፍኖቱ፡ወእምአምርሕተ፡ነገሩ፡ይትአመር፡ኂሩቱ።ወተመይጠት፡ኀቤሆሙ፡ለኤልምያስ፡ወአዛርያ፡ወለኵሎሙ፡ኀያላነ፡እስራኤል፤አንትሙ፡ዕቀብዎ፡ወመሀርዎ፡ፍኖተ፡ለመንግሥተ፡እግዚአብሔር፡ወአክብሮታ፡ለጽዮን፡እግዝእትነ፡ወለኵሉ፡ዘኢታፈቅር ፡እግዝእትነ፡ኢንግበር፡ንግሩነ፡በአስተጠናቅቆ፡ለዓለም፡ለትውልደ፡ትውልድ፡ከመ፡ኢትትመዐዐነ፡ለእመ፡ኢያሠነይነ፡ግብራ፡ወእግዚአብሔርኒ፡ከመ፡ይኅድር፡ምስሌነ፤ወአንተኒ፡ኦወልድየ፡ስማዕ፡ቃለ፡አበዊከ፡ወሖር፡በምክሮሙ፡ኢያእብድከ፡ስታይ፡ወኢአንስት፡ወኢአስተምክሖ፡አልባስ፡ወአልጒሞ፡አፍራስ፡ኢነጽሮ፡ንዋየ፡ሐቅል፡ዘቅድም፡ወዘድኅር፡አላ፡ይኩን፡ትውክልትከ፡በእግዚአብሔር፡ወበጽዮን፡ታቦተ፡ሕጉ፡ለእግዚአብሔር፡ፈጣሪከ፡ከመ፡ትማዕ፡ፀርከ፡ወይብዛኅ፡ዘርእከ፡በዲበ፡ምድር፡ወይግረሩ፡ጸላእትከ፡ወፀርከ፡ዘቅሩብ፡ወዘርሑቅ፨ ወእሙንቱኒ፡ደቂቀ፡ኀይል፡አውሥኡ፡በአሐዲ፡ቃል፡ወይቤሉ፡ንሕነሰ፡እግዝእትነ፡ምስሌክሙ፡ኵሎ፡ጊዜ፡ወንዜከሮ፡ለእግዚእ፡ንጉሥ፡ናሁ፡ዘጽሑፍ፡ወገቢርሰ፡እንዘ፡አምላከ፡እስራኤል፡ይከውኖ፡ረዳኤ፡ወነገረ፡እሙ፡ይሰምዕ፡ወንንግሮ፡ፍኖታ፡ለምግባረ፡ሠናይ፤እስመ፡አልቦ፡ዘይትረከብ፡በዝ፡መዋዕል፡በጥበብ፡ዘእንበለ፡እግዚእነ፡ንጉሥ፡ዘከማኪ፤ሰሐብክነ፡ዝየ፡ከመ፡አግብርትኪ፡ምስለ፡እግዝእትነ፡ጽዮን፡ሰማያዊት፡ታቦተ፡ሕጉ፡ለእግዚአብሔር፡አምላክነ፡በከመ፡ይስሕብዎ፡ለገመል፡ዘጽዑን፡ንዋየ፡ክብር፡በንስቲት፡ቀጢን፡ፈትለ፡ኢዊጥ፡እንተ፡ኢትትበተክ፡ዲበ፡አንፉ፡ዝማማት፤ወይእዜኒ፡ኢትትሀየዩነ፡ወኢትረስዩነ፡ከመ፡ነግድ፡ባዕድ፡አላ፡ረስዩነ፡ከመ፡አግብርቲክሙ፡እለ፡የኀፅቡ፡እገሪክሙ፡እስመ፡ንሕነሰ፡እመኒ፡ሞትነ፡ወእመኒ፡ሐየውነ፡ምስሌክሙ፡ወአልብነ፡ተስፋ፡ውስተ፡ብሔረ፡ሙላድነ፡ዘእንበለ፡ኀቤክሙ፡ወእግዝእትነ፡ጽዮን፡ቅድስት፡ሰማያዊት፡ማኅደረ፡ስብሐቲሁ፡ለእግዚአብሔር፨ ፨ ፨