፸፡በእንተ፡ዘነግሠ፡ሮብዓም።
ወእምዝ፡ነሥኦ፡ሳዶቅ፡ካህን፡ወአንገሦ፡ወቀብኦ፡ወገብረ፡ሎቱ፡ዘበሕጉ፡ወአንበረ፡ዕፀ፡ዲበ፡ደብተራ፡ወረከቦ፡በስመ፡አቡሁ፡ሰሎሞን፡ወአጽዐንዎ፡ዲበ፡በቅለ፡ንጉሥ፡ወይቤልዎ፡ባሕ፡ሕያው፡አበ፡ነጋሢ፤ወደምፀት፡ሀገር፡ወተነፍሐ፡ቀርን።ወዘእንበለ፡ይግባእ፡ኀበ፡አቡሁ፡አዕረፈ ፡ሰሎሞን፤ወወሰክዎ፡ኀበ፡መቃብረ፡አቡሁ፡ዳዊት፡ወላሐውዎ፡ለሰሎሞን፡ዐቢየ፡ላሐ፡እስመ፡አልቦ፡ዘተረክበ፡ዘከማሁ፡በጥበብ፡በውእቱ፡መዋዕል፨ወእምድኅረ፡ኀለፈ፡ሰቡዐ፡መዋዕለ፡አንገፍዎ፡ላሐ፡አቡሁ፡ለዮርብዓም፤ወተጋብኡ፡ሕዝበ፡እስራኤል፡ኀበ፡ዮርብዓም፡ወይቤልዎ፡አቅልል፡ለነ፡ግብረ፡እስመ፡አቡከ፡አክበደ፡ለነ፡በሐጢበ፡ዕፅ፡ወበውቅረተ፡እብን፡ወበአቅሞ፡ሰረገላ፡ለአርውጾ፡ዕፅ፡ቄድሮስ።ወመከረ፡ምስለ፡መማክርት፡ወመላህቅት፡ዘቤተ፡ንጉሥ፡ወይቤልዎ፡አውሥኦሙ፡ሠናየ፡እስመ፡አንተ፡ይእዜ፡ከመ፡ሕፃን፡ዘኢያጽንዐ፡ሐቌሁ፡ለሐዊር፤ ወይእዜሰ፡ተናገሮሙ፡ሠናየ፡ወበሎሙ፡እገብር፡ለክሙ፡ኵሎ፡ዘትፈቅዱ፤ወእምከመ፡ጸንዐት፡እዴከ፡ላዕሌሆሙ፡ትገብር፡ሕዝበከ፡ዘፈቀድከ።ወአውፅኦሙ፡ለመላህቅቲሁ፡ወአብኦሙ፡ለዕደው፡ዕንቡዛን፡እለ፡ተሐፅኑ፡ምስሌሁ፡ወመከረ፡ምስሌሆሙ፡ወነገሮሙ፡ዘለአኩ፡ሎቱ፡ቤተ፡እስራኤል፡ወዘከመሂ፡አምከርዎ፡መላህቅተ፡ቤተ፡ንጉሥ።ወይቤልዎ፡እሙንቱ፡ዕንቡዛን፡አረጋዊ፡ይገብር፡ምክረ፡አእሩግ፡ወልሂቅ፡ይገብር፡ምክረ፡ልሂቃን፡ወርሡእሂ፡ይገብር፡ምክረ፡ርሡኣን፡ወወሬዛሰ፡ዘከማከ፡ይገብር፡ምክረ፡ወራዙት፡ዘከማሁ፡ወእሉኒ፡ርሡኣን፡ደክሙ፡ሐቌሆሙ፡ከመ፡ሕፃን፡ዘኢይክል፡ሐዊረ፤ወበዝንቱሰ፡ነገር፡ዘትብል፡መኑ፡የአቢ፡ትእዛዘ፡እግዚእነ፡ንጉሥ፤ወቦ፡እምኔሆሙ፡ዘይሰርር፡በቅድመ፡ዮርብዓም፡ወቦእምኔሆሙ፡ዘይመልኅ፡ሰይፎ፡ወቦእምኔሆሙ፡ዘይቀልብ፡ረምሖ፡ወቦ፡ዘይእኅዝ፡ቀስቶ፡ወምጒንጳሁ።ወሶበ፡ፈጸሙ፡ተውኔቶሙ፡አምከርዎ፡ወይቤልዎ፡እግዚእነ፡እንዘ፡ንሕነ፡ምስሌከ፡ወአንተ፡ምስሌነ፤ወአቡከኒ፡ በጥበብ፡ወሀበከ፡ኪያነ፡ደቂቀ፡ምሁራነ፡ፀብእ፡እስራኤል፡ከመ፡ንልሀቅ፡ምስሌከ፡ወከመ፡ትጽናዕ፡መንግሥትከ፡እምድኅሬሁ፤ወአንተሰ፡እግዚእነ፡ኢታርእዮሙ፡ገጸ፡ሕመቅ፡ለእሙንቱ ፡ሕዝብ፡ከመ፡ኢያምስሉ፡ድኩመ፡ወዘኢትክል፡ገቢረ፡ፀብእ፡ላዕሌሆሙ፡ወላዕለ፡ፀርከ፡ወእመሰ፡ርእዩ፡ለነ፡ገጸ፡ድካም፡በቃል፡ወበምግባር፡ ንከውን፡ሕቁራነ፡እምኔሆሙ፡ወኢይሁቡነ፡አምኃ፡ወጋዳ፡ወኢገብረ፡ወኢጸባሕተ፡ወትማስን፡መንግሥትከ፤ አላ፡በሎሙ፡በጽኑዕ፡ቃል፡ወበገንሕ፡ተናገሮሙ፡እንዘ፡ትብል፡አቡየሰ፡ትቤልዎ፡በዕፅ፡ወበእብን፡ወአንሰ፡ እቀንየክሙ፡በጋጋት፡ወበዐቃርብት፡እስመ፡እምግዝፈ፡አቡየ፡ይጸንዕ፡ቊጠጠ፡ዚአየ፡ወእምክሩ፡ለአቡየ፡ለዘወለደኒ፡የዐቢ፡ምክረ፡ዚአየ፡አልቦ፡ዘኣነትግ፡ለክሙ፡ግብረ፡ወገብጋበ፡ዘእንበለ፡ዘኣፈደፍድ፡ለክሙ፡በኵሉ፤ወለእመኒ፡ኢሰማዕክሙ፡ቃልየ፡ወኢገበርክሙ፡ትእዛዝየ፡እገብር፡እንስሳክሙ፡ሕብልያ፡ወደቂቅክሙ፡ይከውኑ፡ፄዋወለክሙኒ፡መጥባኅትየ፡ትበልዐክሙ፡ወእነሥእ፡አህጉሪክሙ፡ወአዕጻዲክሙ፡ወአትክልቲክሙ፡ወዐዘቃቲክሙ፡ወገራውሂክሙ፡ወአዕጻዳተ፡ወፍርክሙ፤ወለክቡራኒክሙ፡በእደ፡ሰናስለ፡ኀጺን፡ወለአብዕልቲክሙኒ፡ሲሳየ፡አግብርትየ፡ወአንስትያክሙኒ፡ሰርጐ፡ለቤተ፡ክቡራንየ፤ወዘንተ፡ቃልየ፡ኢያፀርዓ፡ ወኢያሐጽጻ፡ወኢይሜቊሳ፡ወኢያበጥላ፡ወእገብራ፡ፍጡነ፡ወእከትባ፡ለዓለም፤እስመ፡ኵላ፡ዘይእቲ፡ምድር፡ ተውህበት፡መንግሥት፡ለአበ፡አቡየ፡ዳዊት፡ወለአቡየ፡ሰሎሞን፡እምድኅሬሁ፡ወሊተኒ፡እምድኅረ፡አቡየ፡ወሀበኒ፡ከማሆሙ፡ወእቀንየክሙ፡አነኒ፡ከማሆሙ፡ወይእዜኒ፡ምክሩ፡ወተአዘዙ፡ሊተ፨ወነገሮሙ፡ከመዝ፡ለሊቃውንተ፡እስራኤል።ወተንሥኡ፡ኵሎሙ፡ኅቡረ፡በምልኦሙ፡ወይቤሉ፡እቱ፡ቤተከ፡እስራኤል፤አልብነኑ፡ ዘናነግሥ፡ዘእንበለ፡በቤተ፡ይሁዳ፡ወበቤተ፡ብንያሚ፤አበይናሆሙ፡ለቤቶሙ፡ወለሕዝበ፡ክልኤሆሙ፡ወናነግሥ፡ዘፈቀድነ፡ለርእስነ ፡ወለዘሠምረት፡ነፍስነ።ወጾሩ፡ንዋየ፡ሐቅሎሙ፡ወጐዩ፡በምልኦሙ፡ወበጽሑ፡ሀገረ፡ሰማርያ፡ ዘቤተ፡ኤፍራታ፤ወበህየ፡መከሩ፡ወአንገለጉ፡ወተዓፀዉ፡ቤተ፡እስራኤል፡ከመ፡ያንግሡ፡ዘኀረዩ፡እምኔሆሙ፡ለዘ፡ረከቡ፡ዕፃ፡በውስተቤተ፡አቡሁ፤ወበጽሐ፡ዕፃ፡ኀበ፡ቤተ፡ኤፍሬም፡ወልደ፡ናባጥ፡ወኀረዩ፡በውስተ፡ቤተ፡አቡሁ፡ወአንገሥዎ፡ለኢዮርብዓም፤ወከመዝ፡ተከፍለት፡መንግሥት፡እምኀበ፡ዮርብዓም፡ወልደ፡ሰሎሞን፡ወኢተርፎ፡ዘእንበለ፡ቤተ፡ብንያሚ፡ወቤተ፡ይሁዳ፡አቡሁ፨ወቃለ፡እግዚአብሔር፡ኢተሐሰወ፡ዘይቤሎ፡ለዳዊት፡ገብሩ፡እምፍሬ፡ከርሥከ፡ኣነብር፡ዲበ፡መንበርከ፤ወካዕበ፡ይቤ፡ሥሩዕ፡ከመ፡ወርኅ፡ለዓለም፤ወካዕበ፡ይቤ፡መሐለ፡እግዚአብሔር፡ለዳዊት፡በጽድቅ፡ወኢይኔስሕ።ዘነግሠ፡ዲበ፡መንበረ፡ዳዊት፡አቡሁ፡ውእቱ፡ ኢየሱስ፡ክርስቶስ፡ዘመዱ፡በሥጋ፡እምድንግል፡ዘነበረ፡ዲበ፡መንበረ፡መለኮቱ፤ወበምድርኒ፡ወሀቦ፡ዘይነግሥ፡ዲበ፡መንበሩ፡ንጉሠ፡ኢትዮጵያ፡በኵሩ፡ለሰሎሞን፤ወለዮርበዓምሰ፡ኢወሀቦ፡እግዚአብሔር፡ዘእንበለ፡፪፡በትር፤ወንጉሠ፡ሮምሂ፡ወልዱ፡ለሰሎሞን፡ዘይንእስ።ወዘንተ፡ዘገብረ ፡እግዚአብሔር፡ከመ፡ኢይበሉነ፡አብዳን፡ሕዝበ፡አይሁድ፡በእንተ፡ሰሎሞን፡ወበእንተ፡ዮርብዓም፡ወልዱ፡እስመ፡ማእምረ፡ልብ፡እግዚአብሔር፡ከመ፡ኢያምስሉ ፡ዘንተ፡ገብረ። ወለዮርብዓምኒ፡ሰመይዎ፡ንጉሠ፡ይሁዳ፡ወለንጉሠ፡ሰማርያ፡ሰመይዎ፡ንጉሠ፡እስራኤል። ወእምትውልደ፡ኢዮርብዓም፡ኮነት፡ትውልድ፡እስከ፡ኢያቄም፡፵ወ፩፡ወአሜሃ፡ተወልዱ፡ለመልኪ፡ክልኤ፡ደቂቅ፡ሌዊ፡ወሴም፡ወላዴ፡ሆናሴ፤ወሆናሴ፡ወለደ፡ቀላምዮስ፡ወቀላምዮስ፡ወለደ፡ኢየቄምወኢያቄምኒ፡ወለዳ፡ለማርያም፡ወለተ፡ዳዊት፤ወካዕበ፡ኢሊ፡ወለደ፡መልኪ፡ወሜልኪ፡ወለዶ፡ለማቲ፡ወማቴ፡ወለዶሙ፡ለኤሊ፡ወለያዕቆብ፡ወለሐና፡ብእሲተ፡ኢያቄም፤ ወአውሰበ፡ኤሊ፡ብእሲተ፡ወሞተ፡እንዘ፡አልቦ፡ውሉደ፡ወአውሰባ፡ያዕቆብ፡ለብእሲተ፡ኤሊ፡ዮሐዳ፡ወወለደ፡ላቲ፡ዮሴፍ፡ጸራቤ፡ዘፈኀራ፡ለማርያም።ወዮሴፍሰ፡ወልደ፡ያዕቆብ፡በሥጋ፡ወወልደ፡ኤሊ፡በሕገ፡ኦሪት፡በከመ፡አዘዞ፡እግዚአብሔር፡ለሙሴ፡ከመ፡ይትዋሰቡ፡ምስለ፡ዘመዶሙ፡በበ፡አብያተ፡አበዊሆሙ፡ወኢይትዋሰቡ፡እምባዕድ፡ዘመድ፨ ፨ ፨