፷፱፡በእንተ፡ስእለተ፡ሰሎሞን።
ወተመይጠ፡ወአንቃዕደወ፡ኀበ፡መልአክ፡ወሰፍሐ፡ክልኤሆን፡እደዊሁ፡ወይቤ፡እግዚኦ፡ቀርበኑ፡ምጽአቱ፡ለመድኅን፡ዘትቤ፡ወሚመ፡ርሑቅኑ፡አውሥአ፡መልአክ፡ወይቤሎ፡በ፵ወ፫፡ትውልድ፡እምዘመድከ፡ወእምዘርእከ፡ይመጽእ፡ወያድኅነክሙ፤ወእስራኤልሰ፡ይጸልኡ፡መድኀኒቶሙ፡ወይቀንኡ፡ላዕሌሁ፡በዘገብረ፡ተኣምረ፡ወመንክረ፡በቅድሜሆሙ፡ወይሰቅልዎ፡ወይቀትልዎ፡ወይትነሣእ፡ወያድኅነክሙ፤እስመ፡መሐሪ፡ውእቱ፡ለነሳሕያን፡ወኄር፡ለኅሩያኒሁ፤ወናሁ፡ነገርኩክሙ፡ጥዩቀ፡ከመ፡ኢየኀድገክሙ፡ውስተ፡ሲኦል፡ለዘመዲ፡እስራኤል፡እለ፡ተጸውረት፡ባሕርይ፡ኀቤክሙ፡ወዘንተ፡ብሂሎ፡መልአከ፡እግዚአብሔር፡ይቤሎ፡ሰላም፡ለከ።ወአውሥአ፡ሰሎሞን፡ወይቤሎ፡ብቊዐኒ፡እግዚእየ፡አሐተ፡እስአለከ፡ወኢትትሀየየኒ፡ገዓርየ።ወይቤሎ፡በል፡ ተሰአለኒ፡ወአነ፡ኣየድዐከ፡ዘሰማዕኩ፡ወዘርኢኩ።ወይቤሎ፡ሰሎሞን፡ባሕቱ፡አሐዝን፡በእንተ፡እስራኤል፡ሕዝቡ፡እለ፡ኀረየ፡እምኵሉ፡በትረ፡ርስቱ፡ቀዳሜ፡በኵሩ፤ትቤለኒ፡ይጠፍኡ፡እምድኅረ፡መጽአ፡መድኅን።ወካዕበ፡አውሥኦ፡መልአከ፡እግዚአብሔር፡ወይቤሎ፡እወ፡ነገርኩከ፡ከመ፡ይሰቅልዎ፡ለመድኅን፡ወሶበ፡ከዐዉ፡ደሞ፡በዲበ፡ዕፀ፡መስቀል፡ይከውኑ፡ዝርዋነ፡ውስተ፡ኵሉ፡ዓለም።ወይቤ፡ሰሎሞን፡እበክዮሙ፡ለሕዝብየ፤አሌሎሙ፡ ለሕዝብየ፡እለ፡ዘልፈ፡ያምዕዑ፡ፈጣሪሆሙ፡እምቀዳሚ፡ወእስከ፡ደኃሪ፡አነ፡ወእለ፡እምቅድሜየ፡ወኢይደሉ፡ከመ፡ይምሐሩነ፡በእንተ፡እከየ፡ምግባሪነ፡እስመ፡ትውልድ፡ዘአልብነ፡አሚነ፤ አሌሎሙ፡እለ፡ይክዕዉ፡ደመ፡ንጹሐ፡ወእለ፡ይጠቅሉ፡ጻድቀ፡ወይትካፈሉ፡በርበራቲሁ፡ወኢየአምኑ፡በቃሉ፡ወኢየሐውሩ፡በትእዛዙ፤ጽኑሕ፡ደይኖሙ፡ወንቡር፡ጌጋዮሙ፡ዐቢይ፡መቅሠፍቶሙ፡ወጽኑሕ፡ኀጢአቶሙ፡ወኢይሰሪ፡ሎሙ፡ወያዜክሩ፡ኀጢአተ፡አበዊሆሙ፡እስመ፡ምግባሮሙ፡ኀጢአት፡ወይትሀጐሉ፡በዘመከሩ፡ለሊሆሙ፤ወባሕቱሰ፡አሌላ፡ለነፍስየ፡እስመ፡ከበርኩ፡አኀስር፡በሞትየ፡ወተጠበብኩ፡በዲበ፡ምድር፡ወእከውን፡ሐመደ።ምንት፡ኅይስናሁ፡ለንጉሥ፡ለእመ፡ኢገብረ፡ሠናየ፡በዲበ፡ምድር፡ምስለ፡ነዳያን፤አሐቲ፡ድቀቶሙ፡ውስተ፡መቃብር፡ወአሐቲ፡ፍኖቶሙ፡ውስተ፡መዓምቅት፤ምንት፡በቊዔትነ፡ለሰብእ፡እስመ፡በከ፡ተፈጠርነ፡ወእምድኅረ፡ንስቲት፡ንከውን፡ከመዘ፡ኢተፈጠርነ፤እስመ፡ጢስ፡እስትንፋስነ፡ለእመ፡አርመመት፡ሕቀ፡ተኀልፍ፡ነፍስነ፡ወቃለ፡ቀለምጽጽ፡ልብነ፡ዘይትሐወስ፡ውስተ፡ኅሊናነ፡እምከመ፡ኀለፈት፡ንከውን፡ሐመደ፡ወያስቆርሩነ፡ፍቁራኒነ፡ወማኅፈርነ፤ወአእምሮ፡ኅሊናነ፡ዘመልዕልተ፡ርእስነ፡እምከመ፡ተክዕወት፡ነፍስነ፡ንከውን፡ዕፄ፡ወጺአተ፤ወሙቀተ፡ሥጋነ፡እምከመ፡ኀለፈት፡ከመ፡ወኢምንትኒ፡ንከውን፡ወከመ፡ሳሕወ፡ደመና፡ነኀልፍ።ምንተኬ፡አብዝኆ፡ነቢብኒ፡ኢይበቊዕ፡ወሥነ፡ላሕይኒ፡ይትሀጐል፡ወጽንዐ፡ነገሥትኒ፡ይጠፍእ፡ወኀይለ፡መኳንንትኒ፡ይትሀጐል፡ወኢይትረከብ፤ወኵልነ፡ከመ፡ጽላሎት፡ነኀልፍ፡ወእምድኅረ፡ኀለፍነ፡በሞት፡ይትረሳዕ፡ስምነ፡ወኢይትረከብ፡አሠርነ፤እምድኅረ፡፫፡ትውልደ፡ደቂቅነ፡አልቦ፡ዘይዜክር፡ስምነ።ወሶቤሃ፡አንጸረ፡ገጾ፡ኀበ፡ዮርብዓም፡ወልዱ፡ወይቤሎ፡ወልድየ፡ተዐገሳ፡ለእኪት፡ወግበራ፡ለሠናይት፡ከመ፡ትርከብ፡ብዙኀ፡መዋዕለ፡በዲበ፡ምድር፤ወኢትስግድ፡ለአማልክት፡ባዕድ፡ወኢታምልኮሙ፡አላ፡ባሕቱ፡እግዚአብሔር፡ፍራህ፡ወአክብሮ፡ከመ፡ትማእ ፡ፀረከ፡ወጸላእተከ፡ወበሰማያትኒ፡ከመ፡ትረስ፡ማኅደረ፡አበዊከ፡ወትረስ፡ሕይወተ፡ዘለዓለም። ወይቤ፡ጸሐፉ፡ሊተ፡ውስተ፡መጽሐፈ፡ጡማርወአንብራ፡ውስተ፡ቀማጥር።ወይቤሎ፡ለሳዶቅ፡ካህን፡ቅብኦ፡ወአንግሦ፡ለወልድየ፤በከመ፡አንገሠኒ፡አቡየ፡ዳዊት፡እግዚእየ፡እንዘ፡ሕያው፡አነሂ፡ኣነግሦ፡ለወልድየ፡ኢዮርብዓም፡ወይኩን፡ዘርኡ፡መድኀኒትየ፡ሊተ፡ወለአበውየ፡እስከ፡ለዓለም፡በከመ፡ነገረኒ፡መልአከ፡እግዚአብሔር፨ ፨ ፨