፷ወ፯፡በእንተ፡ብካየ፡ሰሎሞን።
ወዘከመሂ፡አዕረፈ፡እነግረክሙ፤ኮነ፡መዋዕሊሁ፡፷፡ወአኀዞ፡ሕማም፡ወበከመ፡መዋዕለ፡አቡሁሰ ፡ዳዊት፡ኢኮነ፡አላ፡፳፡ሐጸ፡እምኔሁ፡በእንተ፡ዘተአዘዘ፡ለአንስት፡ወሰገደ፡ለጣዖታት። ወመጽአ፡መልአከ፡ሞት፡ወዘበጦ፡እግሮ፡ወበከየ፡ወይቤ፡እግዚኦ፡አምላከ፡እስራኤል፡እስመ፡ሕገ፡መሬታዊ፡ተመዋእኩ፡እስመ፡አልቦ፡ንጹሐ፡እምርስሐት፡በቅድሜከ፡እግዚኦ፡ወአልቦ፡ዘይጸድቅ፡ወይጠብብ፡በቅድሜከ፡እግዚኦ፡እስመ፡አንተ፡ትሬኢ፡ወትፈትን፡ልበ፡ወአልቦ፡ዘይሴወር፡እምኔከ፡ኅቡኣተ፡ትሬኢ፡በክሡታት፡ወልበ፡ተሐትት፡መሐረኒ፡እግዚኦ፤ልበ፡ሰብእ፡ተኀሥሥ፡ወኵልያተ፡ትፈትን፡መሐረኒ፡እግዚኦ፤ዘልሑሳስ፡ወዘረዓም፡ትሰምዕ፡መሐረኒ፡እግዚኦ፤ወእመሰ፡መሐርኮሙ፡ለጻድቃን፡እለ፡ኢተዐደዉ፡እምትእዛዝከ፡ምንት፡መንክር፡ምሕረትከ፡መሐረኒ፡እግዚኦ፤አላ፡ሶበ፡ትምሕር፡ኪያየ፡ኃጥአ፡ውእቱኬ፡መንክር፡ወአዳም፡ምሕረትከ፡መሐረኒ፡እግዚኦ፤ሶበ፡አነ፡አበስኩ፡ተዘከር፡አብርሃም፡ወይስሐቅ፡ወያዕቆብ፡አበዊየ፡እለ፡ኢተዐደዉ፡እምትእዛዝከ፡መሐረኒ፡እግዚኦ፤እስመ፡መሓሪ፡ወሰራዪ፡አንተ፡እግዚኦ፡በእንተ፡ዳዊት ገብርከ፡መሐረኒ፡እግዚኦ፤አኃዜ፡ዓለም፡ወነገሥት፡ወመኳንንት ፡መሐረኒ፡እግዚኦ፤መጥበቤ፡አብዳን፡ወማእበዴ፡ጠቢባን፡መሐረኒ፡እግዚኦ፤መያጤ፡ኃጥኣን፡ወዐሳዬ፡ጻድቃን፡መሐረኒ፡እግዚኦ።ወዘንተ፡እንዘ፡ይብል፡ይውሕዝ፡አንብዑ፡ውስተ፡ገጹ፡ወየኀሥሥ፡በሰበኑ፨ወወረደ፡ኀቤሁ፡መልአከ፡እግዚአብሔር፡ወይቤሎ፡ስማዕ፡ዘእነግረከ፡ዘለአከኒ፡እግዚአብሔር፤እንዘ፡ጠቢብአ፡አብደ፡ረሰይከ፡ርእስከ፡ወእንዘ፡ባዕል፡አንደይከ፡ርእስከ፡ወእንዘ፡ንጉሥ፡አኅሰርከ፡ርእስከ፡በተዐድዎ፡ትእዛዘ፡እግዚአብሔር፤ወርእሳ፡ለእከይ፡በእንተ፡ዘአብዛኅከ፡አንስተ፡ተዐዲወከ፡ሕጎ፡ወፍትሖ፡ወሥርዐቶ፡ለእግዚአብሔር፡ዘጸሐፈ፡ ሙሴ፡ወወሀበክሙ፡ለእስራኤል፡ከመ፡ኢታውስቡ፡እምባዕደ፡ፍጥረት፡ዘእንበለ፡እምዘመድክሙ፡ወቤተ፡አቡክሙ፡ከመ፡ይኩኑ፡ንጹሓነ፡ወቅዱሳነ፡ዘርእክሙ፡ከመ፡ይኅድር፡እግዚአብሔር፡ምስሌክሙ፤ወአንተሰ፡አስተሐቀርከ፡ሕገ፡እግዚአብሔር፡እንዘ፡ይመስለከ፡ዘትጠበብ፡እምእግዚኣብሔር፡ወትረክብ፡ብዙኀ፡ደቂቀ፡ተባዕተ።ወእበዲ፡ለእግዚአብሔር፡ይጠብብ፡እምጥበቢሁ፡ለእጓለ፡እመሕያው፡ወኢወሀበከ፡ዘእንበለ፡፫፡ደቂቅ፡፩፡ዘነሥአ፡ክብርከ፡ለባዕድ፡ወረሰየ፡ማኅደሮ፡ለእግዚአብሔር፡ውስተ፡ብሔረ፡ኢትዮጵያ፤ወ፩፡ፅዉሰ፡እግር፡ ዘይከውን፡ዲበ፡መንበርከ፡ለነገደ፡እስራኤል፡ወልደ፡ዘመደ፡ዘመድከ፡ተርባነ፡እምቤተ፡ይሁዳ፤ወ፩፡ወልደ፡ሮማዊት፡አመት፡ዘበደኃሪ፡መዋዕል፡ይሤርዎ፡ለዮርብዓም፡ወለኵሉ፡ዘመድከ፡እስራኤል፡ወትከውን፡ሎቱ፡ዛቲ ፡ምድር፡እስመ፡ለሊሁ፡የአምን፡በዘ፡ይመጽእ፡መድኅን፤ወነገደ፡ዮርብዓምሰ፡ወእለ፡ተርፉ፡እስራኤል፡ይሰቅልዎ፡ለዘ፡ይመጽእ፡መድኅን፡ወይጠፍእ፡ዝክርክሙ፡እምነ፡ምድር፡እስመ፡ይኄልዩ፡ምክረ፡እንተ፡ኢይክሉ፡አቅሞ፡ወውእቱኒ፡ይትመዓዖሙ፡ወያጠፍእ፡ዝክሮሙ።ወለከሰ፡ይኩንከ፡ትእምርተ፡ዮሴፍ፡ወልደ፡ያዕቆብ፡እስመ፡ሤጥዎ፡አኀዊሁ፡ብሔረ፡ግብጽ፡እምሶርያ፡ሀገረ፡ላባ፡ወበርደቱ፡ብሔረ፡ግብጽ፡ኮነ፡ረኃብ፡ውስተ፡ሶርያ፡ወውስተ፡ኵሉ፡ዓለም፡ወበርደቱ፡ጸውዖሙ፡ለአዝማዲሁ፡ወአድኀኖሙ፡እምረኃብ፡ወወሀቦሙ፡ማኅደረ፡በምድረ፡ግብጽ፡እንተ፡ስማ፡ጌሤን፡እስመ፡ለሊሁ፡ንጉሥ፡እምታሕተ፡ፈርዖን፡ንጉሠ፡ግብጽ።ወከማሁ፡ዘይመጽእ፡መድኅን፡እምዘመድከ፡ይሰሪ፡ለከ፡በምጽአቱ፡ወያወፅአከ፡እምሲኦል፤ወእስከ፡ይመጽእ፡መድኅን፡ትሣቀይ፡በህየ፡ምስለ፡አበዊከ፡ወያወፅአከ፤እስመ፡እምዘርእከ፡ይመጽእ፡መድኅን፡ዘያድኅነክሙ፡ለከ፡ወለእለ፡እምቅድሜከ፡ወለእለ፡እምድኅሬከ፡እምአዳም፡እስከ፡ምጽአቱ፡በዘመደ፡ዘመድክሙ፡ወያወፅአክሙ፡እምሲኦል፤በከመ፡አውፅኦሙ፡ዮሴፍ፡ለአዝማዲሁ፡እምረኃብ፡እስመ፡ቀዳሚት ፡ሲኦል፡በምድረ፡ረኃብ፡ወከማሁ፡ያወፅአክሙ፡መድኅን፡እምሲኦል፡ለአዝማዲሁ፤ወበከመ፡ቀነይዎሙ፡ድኅረ፡ግብጻዊያን፡ከማሁ፡ቀነዩክሙ፡አጋንንት፡በስሕተተ፡ጣዖት፤ወበከመ፡አውፅኦሙ፡ሙሴ፡ለአዝማዲሁ፡እምግብርናት፡ከማሁ፡ያወፅአክሙ፡መድኅን፡እምግብርናተ፡ሲኦል፤ወበከመ፡ገብረ፡ሙሴ፡ዐሠርተ፡ተኣምራተ፡ወመቅሠፍታተ፡በቅድመ፡ፈርዖን፡ንጉሥ፡ከማሁ፡ዘይመጽእ፡መድኅን፡እምዘመድከ፡ይገብር፡፲፡ተኣምራተ፡ለሕይወት፡በቅድመ፡ሕዝብከ፤ወገቢሮ፡ትእምርታተ፡ሙሴ፡በከመ፡ዘበጠ፡ባሕረ፡ወአኅለፎሙ፡እንተ፡የብስ፡ከማሁ፡ዘይመጽእ፡መድኅን፡ይነስት፡አረፋቲሃ፡ለሲኦል፡ወያወ፡ፅአክሙ፤ወበከመ፡አስጠሞ፡ሙሴ፡ለፈርዖን፡ምስለ፡ግብጻዊያን፡ውስተ፡ባሕረ፡ኤርትራ፡ከማሁ፡ያሰጥሞሙ፡ለሰይጣን፡ወለአጋንንቲሁ፡መድኅን፡ውስተ፡ሲኦል፡እስመ፡ባሕር፡ትተረጐም፡በሲኦል፡ወፈርዖን፡ይተረጐም፡በሰይጣን፡ወሰራዊቱ፡ግብጻዊያን፡ይተረጐሙ፡በአጋንንት፤ወበከመ፡ሴሰዮሙ፡መና፡በገዳም፡ዘእንበለ፡ጻማ፡ከማሁ፡ይሴስየክሙ፡መድኅን፡መብልዐ፡ገነት፡ዘለዓለም ፡እምድኅረ፡አውፅአክሙ፡እምሲኦል፤ወበከመ፡አንበሮሙ፡በገዳም፡፵፡ዓመተ፡እንዘ፡ኢበልየ፡አልባሲሆሙ ፡ወኢነቅዐ፡ሰኰናሆሙ፡ከማሁ፡መድኅን፡ያነብረክሙ፡ዘእንበለ፡ጻማ፡እምድኅረ፡ትንሣኤ፤ ወበከመ፡አብኦሙ፡ኢየሱስ፡ምድረ፡ርስት፡ከማሁ፡ያበውአክሙ፡መድኅን፡ውስተ፡ገነተ፡ትፍሥሕት፤ወበከመ፡ቀተሎሙ፡ኢየሱስ፡ለ፯፡ነገሥተ፡ከነአን፡ከማሁ፡ይቀትሎሙ፡መድኅን፡ለሰብዐቱ፡አርእስተ፡አብሊስ፤ወከመ፡ሠረዎሙ፡ኢያሱ፡ለሕዝበ፡ከነኦን፡ከማሁ፡ይሤርዎሙ፡መድኅን፡ለኃጥኣን፡ወየኀትሞሙ፡ውስተ፡ማኅተመ፡ሲኦል፤ወበከመ፡አንተ፡ሐነጽከ፡ቤተ፡እግዚአብሔር፡ከማሁ፡ይትሐነጽ፡አብያተ፡እግዚኣብሔር፡ውስተ፡አርእስተ፡አድባር፨ ፨ ፨
