፶፫፡ኀበ፡ተውህበ፡ሰረገላ፡ለኢትዮጵያ።
ወበኀበ፡ኀደሩሰ፡ጋዛ፡ይእቲ፡ሀገረ፡እሙ፡ለንጉሥ፡ዘወሀባ፡ሶበ፡ትመጽእ፡ኀቤሁ፡ንጉሥ፡ሰሎሞን፡ለንግሥተ፡ ኢትዮጽያ።ወእምህየ፡በጽሑ፡በአሐቲ፡ዕለት፡ውስተ፡ደወለ፡ግብጽ፡እንተ፡ስማ፡ምስሪን፤ወሶበ፡ርእዩ፡ደቂቀ፡ኀያላነ፡እስራኤል፡ከመ፡በአሐቲ፡ዕለት፡በጽሑ፡ምሕዋረ፡፲ወ፫፡ዕለት፡ወኢደክሙ፡ወኢርኅቡ፡ወኢጸምኡ፡ኢሰብእ፡ወኢእንስሳ፡ወኵሎሙ፡ከመ፡ዘሶቤ፡ጸግቡ፡ወሰትዩ፡አእመሩ፡ወአምኑ፡እሙንቱ፡ደቂቀ፡ኀይል፡ከመ፡እምኀበ፡እግዚኣብሔር፡ኮነት፡ዛቲ፤ወይቤልዎ፡ለንጉሦሙ፡ናውርድ፡ሰረገላተ፡እስመ፡በጻሕነ፡ማየ፡ኢትዮጵያ፡ዛቲ፡ይእቲ፡ተከዚ፡እንተ፡ትወርድ፡እምኢትዮጵያ፡ወትሰቂ፡ፈለገ፡ግብጽ፤ ወአውረዱ፡ሰረገላቲሆሙ፡ህየ፡ወተከሉ፡ደባትሪሆሙ፨ወሖሩ፡ኅቡረ፡ደቂቀ፡ኀይል፡ወሰደዱ፡ኵሎ፡አሕዛበ፡ወይቤልዎ፡ለንጉሦሙ፡ንንግርከኑ፡ነገረ፡ለእመ፡ትክል፡ተዐግሦ፤ወይቤሎሙ፡እወ፡እክል፡ወለእመ፡ትቤሉኒ፡እስከ፡ዕለተ፡ሞትየ፡ኢያወፅእ፡ወኢያወሥእ።ወይቤልዎ፡ወረደት ፡ፀሐይ፡እምሰማይ፡ወተውህበት፡በሲና፡ለእስራኤል፡ወኮነት፡መድኀኒተ፡ለዘመደ፡አዳም፡እምነ ፡ሙሴ፡እስከ፡ዘርአ፡እሴይ፡ወነዋ፡ኀቤከ፡በፈቃደ፡እግዚአብሔር፤ወአኮ፡እምኀቤነ፡ዘተገብረ፡ዝንቱ፡አላ፡በፈቃደ፡እግዚአብሔር፡ወአኮ፡እምኀቤነ፡ዘተገብረ፡ዝንቱ፡አላ፡በፈቃደ፡ኬንያሃ፡ወገባሪሃ፡ኮነ፡ከመዝ፤ንሕነ፡ፈቀድነ፡ወእግዚአብሔር፡ፈጸመ፡ንሕነ፡ተሰናአውነ፡ወእግዚኣብሔር፡አሠነየ፡ንሕነ፡ተናገርነ፡ወእግዚኣብሔር፡ገብረ፡ንሕነ፡ኀለይነ፡ወእግዚኣብሔር ፡መከረ፡ንሕነ፡ንቤ፡ወእግዚኣብሔር፡ሠምረ፡ንሕነ፡አንጸርነ፡ወእግዚአብሔር፡አርትዐ፡ንሕነ፡ኀለይነ፡ወእግዚአብሔር፡አጽደቀ፤ወይእዜኒ፡ኪያከ፡ኀረየ፡እግዚአብሔር፡ወሀገርከ፡ሠምረ፡ከመ፡ትኩን፡ላእከ፡ለጽዮን፡ቅድስት፡ሰማያዊት፡ታቦተ፡ሕጉ፡ለእግዚአብሔር፡ወይእቲ፡ትኩንከ ፡መርሐ፡እስከ፡ለዓለም፡ለከ፡ወለዘርእከ፡እምድኅሬከ፡ለእመ፡ዐቀብከ፡ትእዛዞ፡ወገበርከ፡ፈቃዶ ፡ለእግዚአብሔር፡አምላክከ፤እስመ፡ኢትክል፡አንተ፡አግብኦታ፡ለእመ፡ፈቀድከ፡ወአቡከ፡ነሢኦታ፡ለእመ፡ፈቀደ፡እስመ፡ለሊሃ፡ተሐውር፡ኀበ፡ፈቀደት፡ወኢትትነሣእ፡እመንበራ፡ለእመ ፡ኢፈቀደት፡ለሊሃ፤ወነያ፡ይእቲ፡እግዝእትነ፡እምነ፡ወመድኀኒትነ፡ጸወንነ፡ወምስካይነ፡ክብርነ ፡ወመርሶ፡መድኀኒትነ፡ለእለ፡ናሰምክ፡ባቲ።ወቀጸቦ፡አዛርያስ፡ለኤልምያኖስ፡ወይቤሎ፡ሖር፡አሠንያ፡ወአልብሳ፡ለእግዝእትነ፡ከመ፡ይርአያ፡ንጉሥነ።ወዘንተ፡ሶበ፡ተናገረ፡አዛርያስ፡ደንገፀ፡ንጉሥ፡ዳዊት፡ወአንበረ፡ክልኤሆን፡እደዊሁ፡ውስተ፡ልቡ፡ወአስተንፈሰ፡ሠለስተ፡እስትንፋሰ፡ወይቤ፡አማንኑ፡እግዚኦ፡ትዜከረነ፡በሣህልከ፡ለግዱፋን፡እለ፡መነንከ፡ሕዝብ፡ከመ፡እርአያ፡ለማኅደርከ፡ንጽሕት፡እንተ፡በሰማያት፡ጽዮን፡ቅድስት፡ሰማያዊት፤ወምንተኑ፡ነዐስዮ፡ለእግዚአብሔር፡በእንተ፡ኵሉ፡ዘገብረ፡ለነ፡ሠናያተ፡እንዘወኢምንትኒ፡በኀቤሁ፡ክብረ፡ወስብሐተ፤ከለለነ፡በጸጋሁ፡ከመ፡ናእምር፡በምድር፡ስብሐቲሁ፡ወንግነይ፡ኵልነ፡ለዕበየ፡ዚአሁ፤እስመ፡ኄር፡ውእቱ፡ለኅሩያኒሁ፡ወሎቱ፡ስብሐት፡እስከ፡ለዓለም።ወተንሥአ፡ንጉሥ፡እንዘ፡ያንፈርዕፅ፡ከመ፡ማሕስአ፡በግዕ፡ወከመ፡ሐርጌ፡ጽጉበ፡ሐሊበ፡እሙ፤በከመ፡ፍሥሓ፡ዳዊት፡አበ፡አቡሁ፡በቅድመ፡ታቦተ፡ሕጉ፡ለእግዚአብሔር፤አጽሐሰ፡በእገሪሁ፡ወተሐሠየ፡በልቡ፡ወተሀለለ፡በአፉሁ።ወምንተ፡እብል፡ሚመጠነ፡ፍሥሓ፡ወሐሤት፡በውስተ፡ትዕይንተ፡ንጉሠ፡ኢትዮጵያ፤ይነግሮ፡፩፡ለካልኡ፡ወያንፈርዕፁ፡ኵሎሙ፡ከመ፡ጣዕዋ፡ላህም፡ወይጠፍሑ፡እደዊሆሙ፡ወያነክሩ፡ወይሰፍሑ፡እደዊሆሙ፡ውስተ፡ሰማይ፡ወይሰግዱ፡በገጾሙ፡ውስተ፡ምድር፡ወያአኵትዎ፡ለእግዚአብሔር፡በአልባቢሆሙ፨ ፨ ፨
