Kebre Negest 50

፶፡ኀበ፡ተፋነዉ፡ምስለ፡አቡሁ፡ወላሐወት፡ሀገር።

ወተፋነዉ፡ወሖሩ፤ወአቅደሙ፡ጽዒኖታ፡ለጽዮን፡በሌሊት፡ውስተ፡ሰረገላ፡በኅሱራት፡ንዋያት፡ወርሱሓት፡አልባስ፡ምስለ፡ንዋይ፡ቊስቋሳት፡ወተጽዕኑ፡ኵሉ፡ሰረገላት።ወተንሡ፡ሊቃናት፡ወተነፍሐ፡ቀርን፡ወደምፀት፡ሀገር፡ወወውዑ፡መሐዛት፡ወከለላ፡ግርማ፡ወዖዳ፡ጸጋ፤አውየዉ፡ርሡኣን፡ወከልሑ፡ሕፃናት፡ወበከያ፡አቤራት፡ወላሐዋ፡ደናግል፡በእንተ፡ዘተንሥኡ፡ደቂቀ፡መኳንን፡ቲሆሙ፡ለኀያላነ፡እስራኤል።ወአኮ፡ባሕቲቶሙ፡በእንቲአሆሙ፡ዘትበኪ፡ሀገር፡አላ፡እስመ፡ተሀይደ፡ግርማሃ፡ለሀገር፡ምስሌሆሙ፤ወሶበኒ፡ኢያእመሩ፡ገሃደ፡ከመ፡ተነሥአት፡ጽዮን፡እምኔሆሙ፡በልቦሙሰ፡ኢስሕቱ፡ወይበክዩ፡መሪረ፡ከመ፡አመ፡ቀተለ፡እግዚአብሔር፡ በኵሮሙ፡ለግብጽ፡ከማሁ፡ኮኑ፡ወአልቦ፡ቤተ፡ኀበ፡አልቦ፡አውያተ፡እምሰብእ፡እስከ፡እንስሳ፡ከለባትኒ፡የአውይዉ፡ወአእዱግኒ፡ይንህቁ፡ወኵሎሙ፡ኅቡረ፡ያውሕዙ፡አንብዖሙ፡እለ፡ተረፉ፡ህየ፤ከመ፡ዘዐገትዋ፡መላእክተ፡ፀር፡ጽኑዓን፡ለዐባይ፡ሀገር፡ወሮድዋ፡ወማህረክዋ፡ወፄወውዋ፡ወቀተልዋ፡በአ፡ኀጺን፡ከማሁ፡ኮነት፡ሀገር፡ጽዮን፡ይእቲ፡እየሩሳሌም፨ወደንገፀ፡ንጉሥኒ፡ሰሎሞን፡በእንተ፡ብካይ፡ወጽራኀ፡ሀገር፡ወሐወጸ፡እንተ፡ታዕካ፡ቤተ፡መንግሥት፡ቀልዐ፡ዘቤተ፡ንጉሥ፡ወርእየ፡ኵላ፡ሀገር፡እንዘ፡ትበኪ፡ተትልዎሙ፤ከመ፡ሕፃን፡ዘ፡አኅደገቶ፡ጥበ፡እሙ፡ወጐየት፡እምኔሁ፡ወይተሉ፡አሠረ፡እሙ፡እንዘ፡ይጸርኅ፡ወይበኪ፡ከማሁ፡ኮኑ፡ይጸርኁ፡ወይበክዩ፡ወይወድዩ፡ሐመደ፡ዲበ፡ርእሶሙ፡ወያስሕዙ፡አንብዐ፡እምአዕይንቲሆሙ። ወሰሎሞንሂ፡ተሀውከ፡ወርዕደ፡ሶበ፡ርእየ፡ግርማሆሙ፡ሰእለ፡ሖሩ፡ወተሀውከ፡አማዕዋቲሁ፡ወአንብዑ፡ታንጠበጥብ፡ዲበ፡ልብሱ፤ወይቤ፡ሴልየ፡እስመ፡ኀለፈት፡ክብርየ፡ወወድቀት፡አክሊለ፡ምክሕየ፡ወውዕየት፡ከርሥየ፡በእንተ፡ዘሖረ፡ዝንቱ፡ወልድየ፡ወነሠተ፡ግርማሃ፡ለህገርየ፡ወግዕዙ፡ደቂቀ፡ኀይልየ፤ወእምይእዜሰ፡ኀለፈት፡ክብርነ፡ወተሀይደት፡መንግሥትነ፡ውስተ፡ሕዝብ፡ነቢር፡እለ፡ኢያአምርዎ፡ለእግዚአብሔር፤በከመ፡ይቤ፡ነቢይ፡ሕዝብ፡እለ፡ኢኀሠሡኒ፡ረከቡኒ፡እምይእዜሰ፡ይትወሀቦሙ፡ሕግ፡ወጥበብ፡ወአእምሮ፤ወአቡየኒ፡ተነበየ፡በእንቲአሆሙ፡እንዘ፡ይብል፡ይገንዩ፡ቅድሜሁ፡ኢትዮጵያ፡ወጸላእቱሂ፡ሐመደ፡ይቀምሑ፤ወበካልእኒ፡ይብል፡ኢትዮጵያ፡ትሜጥዎ፡እደዊሃ፡ለእግዚአብሔር፡ወውእቱኒ፡ይትሜጠዋ፡በክብር፡ወነገሥተ፡ምድርኒ፡ይሴብሕዎ፡ለእግዚአብሔር፤ወበሣልስኒ፡ይቤ፡ናሁ፡ኢሎፍሊ፡ወጢሮስ፡ወሕዝበ፡ኢትዮጵያ፡እለ፡ተወልዱ፡ዘእንበለ፡ሕግ፡ይትወሀቦሙ፡ሕግ፡ወይብልዋ፡ለጽዮን፡እምነ፡በእንተ ፡ብእሲ፡ዘተወልደ፤በእንተ፡ዝንቱኑ፡ወልድየ፡እንጋ፡ዘተወልደ፡እምኔየ፨ ፨ ፨