Kebre Negest 37

፴፯፡ኀበ፡ተስእሎ፡ሰሎሞን፡ለወልዱ።

ወካዕበ፡ነገሮ፡እንተ፡ባሕቲቱ፡ሰሎሞን፡ወይቤሎ፡ለወልዱ፡ለምንት፡ትፈቅድ፡ከመ፡ትርሐቅ፡እምኔየ፡ምንተ፡ኀጣእከ፡ከመ፡ትሖርብሔረ፡አረሚ፡ወምንት፡አጽሀቀከ፡ከመ፡ትኅድግ፡መንግሥተ፡እስራኤል።አውሥአ፡ወልዱ፡ወይቤሎ፡ኢይከውነኒ፡እንበር፡ዝየ፡አላ፡እሖር፡ኀበ፡እምየእንዘ፡አንተ፡ትድኅረኒ፤እስመ፡ብከ፡ወልደ፡ዘይኄይስ፡እምኔየ፡ኢዮርብዓም፡ዘተወልደ፡በሕግ፡እምብእሲትከ፡ወእምየሰ፡ኢኮነት፡እንቲአከ፡ብእሲተ፡ዘበሕግ።አውሥኦ፡ንጉሥ፡ወይቤሎ፡ወለእመትቤ፡ከመዝ፡አነሂ፡ኢኮንኩ፡ዘበሕግ፡ውሉዶ፡ለአቡየ፡ዳዊት፡እስመ፡ነሥአ፡ብእሲተ፡ባዕድ፡ወአቅተሎ፡ኪያሁኒ፡በውስተ፡ፀብእ፡ወወለደኒ፡ኪያየ፡እምኔሃ፡እስመ፡እግዚአብሔር፡መሓሪ፡ሰረየ፡ሎቱ፤ወመኑ፡ዘየአኪ፡ወየአብድ፡እምነ፡እጓለ፡እመሕያው፡ወመኑ፡ዘይምሕር፡ወይጠብብ፡ከመ፡እግዚአብሔር፤ሊተኒ፡እምአቡየ፡ወለከኒ፡እምኔየ፡ገብረ፡እግዚአብሔር፡በከመ፡ፈቀደ።ወአንተሰ፡ኦወልድየ፡ፍርሆ፡ለእግዚአብሔር፡አምላክነ፡ኢትግፋዕ ፡ገጸ፡አቡከ፡ከመ፡ኢትርከብከ፡በደኃሪ፡ግፍዕ፡እምነ፡ዘይወፅእ፡እምነ፡ሐቌከ፡ወከመ፡ይሠኒ፡ዘርእከ፡በዲበ፡ምድር።ወውእቱሰ፡ኢዮርብዓም፡ሕፃን፡ዘ፮፡ዓም፡ወአንተ፡ቀዳሜ፡በኵርየ፡ወበጻሕከ፡ለነጊሥ፡ወአንሥኦ፡ኵናቶ፡ለዘ፡ወለደከ።ወአንሰ፡ነዋ፡፳ወ፱፡ዓመት፡እምዘ፡ነገሥኩ፡ወበሳብዕ፡ዓመተ፡መንግሥትየ፡መጽአት፡እምከ፡ኀቤየ፡ወለእመ፡ፈቀደ፡እግዚኣብሔር፡ያበጽሐኒ፡ኀበ፡አምጣነ፡መዋዕለ፡አቡየ፤ወእምከመ፡ተወሰኩ፡ኀበ፡አበዊየ፡ወትነብር፡አንተ፡ዲበ፡መንበርየ፡ወትነግሥ፡አንተ፡ህየንቴየ፡ወሊቃውንተ፡እስራኤልኒ፡ፈድፋደ፡ያፈቅሩከ፤ ወእገብር፡ለከ፡ከብካበ፡ወእሁበከ፡ንግሥታተ፡ወዕቁባተ፡መጠነ፡ፈቀድከ፤ወትትባረክ፡በዛቲ፡ምድረ፡ርስት፡ቡርክት፡እንተ፡ወሀበ፡እግዚኣብሔር፡ለአበዊነ፡በከመ፡ተካየደ፡ምስለ፡ኖሕ፡ገብሩ፡ወምስለ፡አብርሃም፡ፍቁሩ፡ወጻድቃን፡ደቂቆሙ፡እምድኅሬሆሙ፡እስከ፡ዳዊት፡አቡየ፤ ወትሬእየኒ፡አነ፡ድኩም፡ዲበ፡መንበሮሙ፡ለአበዊየ፡ወትከውን፡ከማየ፡እምድኅሬየ፡ወትኴንን፡አሕዛበ፡ዘአልቦ፡ኆልቈ፡ወአንጋደ፡ዘአልቦ፡መስፈርተ፤ወታቦተ፡አምላከ፡እስራኤልኒ፡ለከ፡ወለዘርእከ፡ውእቱ፡ኀበ፡ትገብር፡ምሥዋዐ፡ወታዐርግ፡ጸሎተ፡ወእግዚአብሔር፡የኀድር፡ውስቴታ፡ለዝሉፉ፡ወይሰምዕ፡ጸሎትከ፡በውስቴታ፡ወትገብር፡ሥምረቶ፡ለእግዚአብሔር፡በውስቴታ፡ወዝክርከኒ፡ለትውልደ፡ትውልድ፡በማእከላ፨ወአውሥአ፡ወልዱ፡ወይቤሎ፡ኦእግዚእየ፡ኢይከውነኒ፡እኅድግ፡ብሔርየ፡ወእምየ፡እስመ፡አምሕሎ፡አምሐለተኒ፡እምየ፡በአጥባቲሃ፡ከመ፡ኢይቁም፡ዝየ፡አላ፡እግባእ፡ኀቤሃ፡ፍጡነ፡ወበዝየኒ፡ኢያውስብ፡ብእሲተ፤ ወታቦተ፡አምላከ፡እስራኤልሂ፡ትባርከኒ፡በኀበ፡ሀለውኩ፡ወጸሎትከኒ፡ትትልወኒ፡በኀበ፡ሖርኩ፡እስመ፡ፈተውኩ፡እርአይ፡ገጸከ፡ወእስማዕ፡ቃለከ፡ወእንሣእ፡በረከትከ፡ወእሖር፡ኀበ፡እምየ፡በዳኅን፨ ፨ ፨