፴፬፡ዘከመ፡በጽሐ፡ብሔረ፡እሙ።
ወሶበ፡በጽሐ፡ሀገረ፡እሙ፡ተፈሥሐ፡በህየ፡በክብር፡ወበአምኃ፤ወሶበ፡ርእይዎ፡መሰሎሙ፡ፍጹመ፡ሰሎሞን፡ንጉሥ፡ወሰገዲ፡ሎቱ፡ወይቤልዎ፡ባሕ፡ሕየው፡አበ፡ነጋሢ፡ወያበውኡ፡ሎቱ፡አምኃ፡ወጋዳ፡ወመጋዝአ፡ወምሳሓተ፡ከመ፡ንጉሦሙ፤ወተሀውከት፡ኵላ፡ብሔረ፡ጋዛ፡እስከ፡ደወለ፡ይሁዳ፡እንዘ፡ይብሉ፡ዝንቱ፡ውእቱ፡ንጉሥ፡ሰሎሞን።ወቦ፡ዘይቤ፡ንጉሥሰ፡ሀለወ፡በኢየሩሳሌም፡የሐንጽ፡ቤቶ፤እስመ፡ፈጸመ፡ሐኒጸ፡ቤተ፡እግዚኣብሔር፤ወቦ፡እለ፡ይቤሉ፡ዝንቱ፡ውእቱ፡ሰሎሞን፡ንጉሥ፡ወልደ፡ዳዊት።ወተሀውኩ፡ወተጋአዙ፡ወፈነዉ፡መባርዲን፤ ሰብአ፡አፍራስ፤እለ፡የኀሥሥዎ፡ለንጉሥ፡ሰሎሞን፡እመ፡ጥዩቀ፡ህየ፡ሀሎ፡ወእመ፡ሀሎ፡ምስሌሆሙ።ወበጽሑ፡መባርዲን፡ዐቀብተ፡ሀገረ፡ኢየሩሳሌም፡ወረከብዎ፡ለሰሎሞን፡ንጉሥ፡ህየ፡ወሰገዲ፡ሎቱ፡ወይቤልዎ፤ባሕ፡ሕየው፡አበ፡ነጋሢ፡ሀገርሰ፡ተሀውከት፡በእንተ፡ዘመጽአ፡፩፡ነጋዲ፡ዘይመስል፡አርአያከ፡ወአምሳሊከ፡ዘእንበለ፡ሕፀት፡ወብዕድና፤ኪያከ፡ይመስል፡በጸዳል፡ወበሥን፡በቆም፡ወበኅይስና፡ዘእንበለ፡ጥልቀት፡ወተባዕዶ፤አዕይንቲሁ፡ፍሡሓት፡ከመዘ፡ሰክረ፡ወይነ፡ወአቊያጺሁኒ፡ቈጢጣን፡ወማኅፈደ፡ክሳዲኒ፡ከመ፡ማኅፈደ፡ዳዊት፡ አቡከ፡ወኪያከ፡ይመስል፡በኵሉ፡ፍጹም፡አባል፡ዘይትማሰለከ፨አውሥአ፡ንጉሥ፡ወይቤሎሙ፡አይቴኬ፡ውእቱ፡ይፈቅድ፡ሐዊረ።አውሥኡ፡ወይቤልዎ፡ለሊሁሰ፡ኢሐተትናሁ፡እስመ፡ግሩም፡ከማከ፤ወእሊአሁሰ፡ይቤሉ፡ሶበ፡ተስእልናሆሙ፡ወንቤሎሙ፡እምአይቴ፡መጻእክሙ፡ወአይቴ፡ተሐውሩ፡ወይቤሉነ፡መጻእነ፡እምአድያመ፡ህንደኬ፡ወኢትዮጵያ፡ወነሐውር፡ብሔረ፡ይሁዳ፡ኀበ፡ሰሎሞን፡ንጉሥ።ወሶበ፡ሰምዐ፡ዘንተ፡ንጉሥ፡ሰሎሞን፡ተሀውከ፡ልቡ፡ወተሐሠየ፡በመንፈሱ፡እስመ፡አልቦ፡ውሉደ፡በውእቱ፡መዋዕል፡ዘእንበለ፡ሕፃን፡ዘ፯፡ዓም፡ዘስሙ፡ኢዮርብዓም፤በከመ፡ዘከረ፡ጳውሎስ፡ወይቤ፡እስመ፡አእበዳ፡እግዚአብሔር፡ለጥበበ፡ዝዓለም፡ዘመከረ፡በጥበቡ።ወይቤ፡እም፲፻፡አንስት፡እወልድ፡፲፻፡ተባዕተ፡ወእወርስ፡አህጉረ፡ፀር፡ወኣመዘብር፡ጣዖታተ፤ወኢወሀቦ፡ዘእንበለ፡፫፡ደቂቅ፤ዘይልህቅ፡ወልዱ፡ንጉሠ፡ኢትዮጵያ፡ወልዳ፡ለንግሥተ፡ኢትዮጵያ፡በኵር፡ውእቱ፡ዘይቤ፡በትንቢት፡መሐለ፡እግዚኣብሔር፡ለዳዊት፡በጽድቅ፡ወኢይኔስሕ፡ከመ፡እምፍሬ፡ከርሥከ፡ኣነብር፡ዲበ፡መንበርከ፤ወወሀቦ፡እግዚአብሔር፡ሞገሰ፡በቅድሜሁ፡ለዳዊት፡ገብሩ፡ወወሀቦ፡ዘይነብር፡ዲበ፡መንበረ፡መለኮት፡እምዘርኡ፡በሥጋ፡እምድንግል፡ወይኴንን፡ሕያዋነ፡ወሙታነ፡ወይፈድዮ፡ለኵሉ፡በከመ፡ምግባሩ፡ዘሎቱ፡ይደሉ፡ስብሐት፡ለእግዚእነ፡ኢየሱስ፡ክርስቶስ፡ለዓለመ፡ዓለም፡አሜን፤ወበምድርኒ፡ወሀቦ፡ዘይከውን፡ንጉሠ፡ዲበ፡ታቦተ፡ሕጉ፡ጽዮን፡ቅድስት፡ሰማያዊት፡ዘውእቱ፡ንጉሠ፡ኢትዮጵያ፤ወእለሰ፡ይነግሡ፡እለ፡ኢኮኑ፡እስራኤል፡ተዐድዎ፡ሕግ፡ወትእዛዝ፡ዘኢሠምረ፡እግዚአብሔር፨ ፨ ፨