Kebre Negest 33

፴ወ፫፡ዘከመ፡ወረደ፡ንጉሠ፡ኢትዮጵያ።

ወጸውዐቶ፡ለተምሪን፡ሊቀ፡ነጋድያኒሃ፡ወትበሎ፡ተደለው፡ለመንግድከ፡ወውስዶ፡ለዝንቱ፡ወልድ፡እስመ፡አጽሐበኒ፡ሌሊተ፡ወመዐልተ፡ፈድፋደ፡በሕቁ፤ወታበጽሖ፡ኀበ፡ንጉሥ፡ወታገብኦ፡በዳኅን፡ዝየ፡ለእመ፡ሠምረ፡እግዚአብሔር፡አምላከ፡እስራኤል።ወተደለወት፡ሥንቀ፡በከመ፡ብዕሎሙ፡ወክብሮሙ፡ወኵሎ፡ንዋየ፡ዘይትፈቀድ፡ለፍኖት፡ወዘይትወሀብ፡አምኃ፡ለንጉሥ፡ወዘይከውን፡ዕረፍተ፡ለፍኖት፤ወአስተዳለወት፡ኵሎ፡ከመ፡ትፈንዎ፡ወወሀበት፡ለመኳንንትኒ፡እለ፡የሐውሩ፡ምስሌሁ፡ወወሀበቶሙ፡ብዙኀ፡ንዋየ፡ዘይትፈቀድ፡ለፍኖት። ወአዘዘቶሙ፡ከመ፡ኢይኅድግዎ፡ህየ፡ለወልዳ፡አላ፡ባሕቱ፡ያገብርዎ፡ለንጉሥ፡ወያግብእዎ፡ኀቤሃ፡ወከመ፡ይሢም፡መንግሥተኒ፡ለብሔራ፨እስመ፡ኮነ፡ሥርዐታ፡ለብሔረ፡ኢትዮጵያ፡ትነግሥ፡ብእሲት፡ድንግል፡እንተ፡ኢያውሰበት፡ብእሴ፤ወትቤ፡እምይእዘሰአ፡ይንገሥአ፡ተባዕትአ፡እምዘመድከአ፡ወኢትንገሥአ፡ብእሲትአ፡ለዓለምአ፡ዘእንበለ፡ዝንቱ፡ዘመድከአ፡ወዘርኡ፡ለትውልደ፡ትውልድ፤ወትልክኣ፡ኀበ፡መጽሐፈ፡ጦማር፡ውስተ፡መጽሐፈ፡ነቢያቲሆሙ፡ዘብርት፡ወታነብራ፡ውስተ፡ቤተ፡እግዚአብሔር፡ዘተሐንጽ፡ለተዝካር፡ወለትንቢት ፡ለደኃሪ፡መዋዕል፤ወከመ፡ኢይስግዱ፡ለፀሐይ፡ወለሰርጐ፡ሰማይ፡ወኢለአድባር፡ወአዕዋም፡ወኢለአእባን፡ወለዕፀወ፡ገዳም፡ወኢለቀላያት፡ወለዘ፡ውስተ፡ማይ፡ወኢለግልፈዋት፡ወአምሳለ፡ወርቅ፡ወኢለአዕዋፍ፡ዘይሰርር፡ወኢይጠየሩ፡ቦሙ፡ወኢያምልክዎሙ፤ወትንበርአ፡ዛቲ፡ሥርዐት ፡ለዓለም፡ወለእመቦ፡ዘተዐደወ፡እምዛቲ፡ሥርዐት፡ለይኰንኖ፡ዘርእከ፡ለዝሉፉ።ወባሕቱ፡ሀበነ፡እምዘፈረ፡ልብሳ፡ዘንኤምኃ፡ለጽዮን፡ቅድስት፡ሰማያዊት፡ታቦተ፡ሕጉ፡ለእግዚአብሔር፤ሰላም፡ለጽንዐ፡መንግሣትከ፡ወለጥበብከ፡ብርህት፡ዘወሀበከ፡እግዚአብሔር፡አምላከ፡እስራኤል፡ፈጣሪነ፨ወአግሐሠቶ፡እንተ፡ባሕቲቱ፡ወወሀበቶ፡ይእቲ፡ትእምርተ፡ዘወሀባ፡ሰሎሞን፡ዘውስተ፡አጽባዕቱ፡ሕልቀተ፡ከመ፡ያእምሮ፡ለወልዲ፡ወከመ፡ይዘከር፡ነገራ፡ወኪዳና፡ዘተካየደት፡በኵሉ፡መዋዕለ፡ሕይወታ፡ከመ፡ታምልኮ፡ለእግዚአብሔር፡ይእቲ፡ወእለ፡እምታሕተ፡መንግሣታ፡በኵሉ፡ዘወሀባ፡እግዚአብሔር።ወእምዝ፡ፈነወቶ፡በሰላም፤ወአርትዑ፡ፍኖተ፡ወሖሩ፡ወበጽሑ፡ውስተ፡ብሔረ፡ደወለ፡ጋዛ፤ወይእቲ፡ሀገር፡ዘወሀባ፡ሰሎሞን፡ንጉሥ፡ለንግሥተ፡ኢትዮጵያ፤ ወበውስተ፡ግብረ፡ሐዋርያትሂ፡ጸሐፈ፡ሉቃስ፡ወንጌላዊ፡እንዘ፡ይብል፡መጋቢሃ፡ውእቱ፡ለኵሉ፡ብሔረ፡ጋዛ፡ኅጽዋ፡ለንግሥተ፡ህንደኬ፡ውእቱ፡ዘአምነ፡በቃለ፡ሉቃስ፡ሐዋርያ፨ ፨ ፨