Kebre Negest 31

፴፩፡በእንተ፡ዘወሀባ፡ትእምርተ፡ለንግሥት።

ወተፈሥሐት፡ወወፅአት፡ከመ፡ትሖር፡ወአስተፋነዋ፡በብዙኅ፡ግርማ።ወአግሐሣ፡እንተ፡ባሕቲቶሙ፡ወአውፅአ፡ሕልቀተ፡እምአጽባዕቱ፡እንተ፡ትንእስ፡ወወሀባ፡ለንግሥት፡ወይበላ፡ንሥኢ፡ከመ፡ኢትርስዕኒ፡ወለእመቦ፡ዘረከብኩ፡እምውስቴትኪ፡ዘርአ፡ዝንቱ፡ይኩኖ፡ትእምርተ፤ወለእመ፡ኮነ፡ተባዕተ፡ይምጻእ፡ኀቤየ፤ወሰላመ፡እግዚኣብሔር፡የሀሉ፡ምስሌኪ፡ወእንዘ፡እነውም፡ምስሌኪ፡ርኢኩ፡ራእየ፡ብዙኀ፡በሕልም፡ከመ፡ሠሪቃ፡ፀሐይ፡በውስተ፡እስራኤል፡ተመሥጠት፡ወሰረረት፡ወአብርሀት፡ለብሔረ፡ኢትዮጵያ፤እንዳዒ፡ለእመ፡ብኪ፡ትትባረክ፡ሀግርኪ፡እግዚኣብሔር፡ያአምር።ወአንቲሰ፡ዕቀቢ፡ዘነገርኩኪ፡ከመ፡ታምልኪዮ፡ለእግዚኣብሔር፡በኵሉ፡ልብኪ፡ወትግበሪ፡ፈቃዶ፤እስመ፡ውእቱ፡ይቀሥፎሙ፡ለዕቡያን፡ወይሣሀሎሙ፡ለትሑታን፡ወይነሥት፡መናብርቲሆሙ፡ለኀያላን፡ወያከብሮሙ፡ለነዳያን፤እስመ፡ሞት፡ወሕይወት፡እምኀበሁ፡ወብዕል፡ወንዴት፡በፈቃዱ፡ይትወሀብ፡እስመ፡ኵሉ፡ሎቱ፡ወአልቦ፡ዘየአቢዮ፡ለትእዛዙ፡ወለኰነኔሁ፡በሰማይ፡ወበምድር፡በባሕር፡ወበቀላያት፤ ወእግዚኣብሔር፡የሀሉ፡ምስሌኪ፡ወሖሪ፡በሰላም።ወተፋነው፨ ፨ ፨