Kebre Negest 26

፳፮፡ኀበ፡ተናገረ፡ንጉሥ፡ምስለ፡ንግሥት።

ወትቤ፡ንግሥት፡ማክዳ፡ለንጉሥ፡ሰሎሞን፡ብፁዕ፡አንተ፡እግዚእየ፡ዘከመዝ፡ለከ፡ተውህበ፡ጥበብ፡ወአእምሮ፤አንሰ፡እምፈተውኩ፡እኩን፡ከመ፡አሐቲ፡እንተ፡ትንእስ፡እምአእማቲከ፡ከመእኅፅብ፡እገሪከ፡ወእስማዕ፡ጥበበከ፡ወእለቡ፡አእምሮተከ፡ወእግነይ፡ለመንግሥትከ፡ወእትሐሠይ፡በጥበብከ።ሚመጠነ፡አደመ፡አውሥኦትከ፡ወጣዕመ፡ቃልከ፡ወሠናየ፡ሑረትከ፡ወአዳም፡ንባብከ፡ወሣእሣአ፡ጣዕመ፡ቃልከ፡ወያስተፈሥሕ፡ልበ፡ወያጠልል፡አዕፅምተ፡ወይሜግብ፡ዓልባበ፡ወያጠአጥእ፡ወያሞግስ፡ከናፍረ፡ወያጸንዕ፡መከይደ።ወእሬእየከ፡ከመ፡ጥበብከ፡ ዘእንበለ፡መስፈርት፡ወልቡናከ፡ዘእንበለ፡ሕጸት፡ከመ፡ማኅቶት፡በውስተ፡ጽልመት፡ወከመ፡ሮማን፡በውስተ፡ገነት፡ወከመ፡ባሕርይ፡በውስተ፡ባሕር፡ወከመ፡ኮከበ፡ጽባሕ፡በውስተ፡ከዋክብት፡ወከመ፡ብርሃነ፡ወርኅ፡በውስተ፡ጊሜ፡ወከመ፡ጎሐ፡ጽባሕ፡ወሠርቀ፡ፀሐይ፡በውስተ፡ሰማይ።ወአንሰ፡ኣአኵቶ፡ለዘ፡አብጽሐኒ፡ወአርዓየኒ፡ኪያከ፡ወዘአኬደኒ፡ውስተ፡መድረከ፡ኆኃቲከ፡ወአስምዐኒ፡ቃለከ፨አውሥአ፡ንጉሥ፡ሰሎሞን፡ወይቤላ፡ጥበብሰ፡ወልቡና፡እምኔኪ፡ሠረጸት፤ሊተሰ፡በዘ፡ወሀበኒ፡አምላከ፡እስራኤል፡ዘሰአልኩ፡ወኀሠሥኩ፡በኀቤሁ፡ወአንቲሰ፡እንዘ፡ኢታአምሪ፡አምላከ፡እስራኤል፡ዘንተ፡ጥበበ፡ዘአሥረጽኪ፡እምልብኪ፡ከመ፡ትርዓዪ፡ኪያየ፡ትሑተ፡ገብሩ፡ለአምላኪየ፡ወቀዋሚሃ፡ለደብተራሁ፡ዘእቀውም፡ወእትለአክ፡ወኣንሶሱ፡ለእግዝእትየ፡ታቦተ፡ሕጉ፡ለአምላከ፡እስራኤል፡ጽዮን፡ቅድስት፡ሰማያዊት።አንሰ፡ገብሩ፡ለአምላኪየ፡ወኢኮንኩ፡አግዓዜ፡ወኢኮንኩ፡ዘእትለአክ፡በፈቃድየ፡አላ፡በፈቃዱ፤ወዓኮ፡ዘንተ፡ቃለ፡እምኀቤየ፡አላ፡ውእቱ፡ዘአንበበኒ፡እነብብ፤ውእቱ፡ዘአዘዘኒ፡እገብር፤ውእቱ፡ዘሠርሐኒ፡አሐውር፤ውእቱ፡ዘመሀረኒ፡እትናገር፤ውእቱ፡ዘአጥበበኒ፡እሌቡ፤እስመ፡እንዘ፡መሬት፡አነ፡ሥጋ፡ረሰየኒ፡ወእንዘ፡ማይ፡አነ፡ሰብአ፡ርጉዐ፡ረሰየኒ፡ወእንዘ፡ነጠብጣብ፡ንስቲት፡ምራቅ፡እንተ፡ትተፋእ፡ዲበ፡ምድር፡ወትየብስ፡መልዕልተ፡ምድር፡በአርአያሁ፡ለሐኰኒ፡ወበአምሳሊሁ ፡ገብረኒ፨ ፨ ፨