፳፭፡ዘከመ፡በጽሐት፡ኀበ፡ሰሎሞን፡ንጉሥ።
ወበጽሐት፡ኢየሩሳሌም፡ወአብአት፡አምኃ፡ለንጉሥ፡ብዙኀ፡ክብረ፡ዘይትፈቀድ፡ሎቱ፤ ወውእቱኒ፡አክበራ፡ወተፈሥሐ፡ወወሀባ፡ማኅደረ፡በታዕካ፡መንግሥት፡ዘቅሩብ፡ኀቤሁ። ወይፌኑ፡ላቲ፡ድራረ፡ወምሳሐ፡ለለ፡አሐቲ፡ጊዜ፡፲ወ፭፡በመስፈርተ፡ቆሪ፡ስንዳሌ፡ስሉቀ፡ብሱለ፡ምስለ፡ቅብእ፡ወመጣብቅ፡ብዙኅ፡ወ፴፡በመስፈርተ፡ቆሪ ፡ስንዳሌ፡ልቱመ፡በዘተገብረ፡ኅብስተ፡፫፻ወ፶፡ምስለ፡ጠቢቁ፡በዘባድው፤ወ፲፡መግዝአ፡ላህም፡ወ፭፡አስዋር፡ወ፶፡አባግዕ፡ዘእንበለ፡ወይጠል፡ወሀየል፡ወቶራ፡ወመግዝአ፡ዶርሆ፡ወጻሕበ፡ወይን፡፰፡መሳፍረ፡ግረት፡ወከራሚ፡፴፡ወእምነ፡መዛርያን፡ወመዛርያት፡በበ፳ወ፭፡ወጸቃውዐ፡ወመዓንጠ፡ወእምነ፡ሲሳዩ፡ዘይበልዕ፡ወእምነ፡ስታይ፡ዘይሰቲ።ወለለ፡ዕለት፡ያለብስ፡በበ፡፲ወ፩፡ዘየሀይድ፡አዕይንተ፤ ወየሐውር፡ኀቤሃ፡ወይትናዘዝ፡ወይእቲኒ፡ተሐውር፡ኀቤሁ፡ወትትናዘዝ፡ወትሬኢ፡ጥበቦ፡ወፍትሖ፡ወክብሮ፡ወሞገሶ፡ወጣዕመ፡ነገሩ፤ወታነክር፡በልባ፡ወታስተአድም፡በኅሊናሃ፡ወትጤይቅ፡በአእምሮ፡ወታስተሓይጽ፡በአዕይንቲሃ፡ዘከመ፡መፍትው፡ወታስተዐጽብ፡ፈድፋደ፡በእንተ፡ዘርእየት፡ወሰምዐት፡በኀቤሁ፤ከመፍጹም፡በስንኣ፡ወጠቢብ።በኅሊና፡ወፍሡሕ፡በጸጋ፡ ወላሕይ፡በግርማ፡ወቃሉኒ፡በጥይቅና፡ከናፍረሁኒ፡በሥእሥእና፡ወትእዛዙኒ፡በግርማ፡ወዘበሰላም፡ምስለ፡ፍርሀተ፡እግዚአብሐር፡አውሥኦቶ። ወዘንተ፡ኵሎ፡ትሬኢ፡ወታስተዐጽብ፡እምብዝኀ፡ጥበቡ፡ወአልቦ፡ወኢምንትኒ፡ንቱገ፡እምቃሉ፡ወእምነገሩ፡አላ፡ፍጹም፡ኴሉ፡ዘተናገረ፨ወይትጌበር፡ለሕንጻ፡ቤተ፡እግዚአብሔር፡ወይትነሣእ፡ወየሐውር፡ይምነ፡ወፅግመ፡ቅድመ ወድኅረ፡ወያርእዮሙ፡መሳፍረ፡ወመዳልወ፡ወመሳውረ፤ወለኬነተ፡ነሀብትኒ፡ይነግሮሙ ፡መሳፍለ፡ወመዋቅረ፡ወመጓንጵት፡ወለወቀርተ፡እብንኒ፡ያርእዮሙ፡መኣዝነ፡ወመንኰራኵረ፡ወመሳፍሐ።ወኴሉ፡ይትገበር፡በቃሉ፡ወአልቦ፡ዘይትዐደው፡እምቃሉ፤እስመ፡ከመ፡ማኅቶት፡በውስተ፡ጽልመት፡ብርሃነ፡ልቡ፡ወከመ፡ኆጻ፡ብዝኀ፡ጥበቡ፡ወአልቦ፡ዘይሰወሮ፡እምቃለ፡አራዊት፡ወአዕዋፍ፡ወለዓጋንንትኒ፡ቀነዮሙ፡በጥበቡ።ወኵሎ፡ይገብር፡በኪን፡ዘወሀቦ፡እግዚአብሔር፡ሶበ፡ሰአለ፡ኀቤሁ፤እስመ፡ኢሰአለ፡መዊአ፡ፀሩ፡ወኢሰአለ፡ብዕለ፡ወክብረ፡አላ፡ሰአለ፡ጥበበ፡ወአእምሮ፡ከመ፡የሀቦ፡በዘ፡ይኴንን፡ሕዝቦ፡ወበዘ፡የሐንጽ፡ቤቶ፡ወበዘ፡ያሤኒ፡ተግባሮ፡ለእግዚአብሔር፡በኵሉ፡ዘወሀቦ፡ጥበበ፡ወአእምሮ፨ ፨ ፨