፳፩፡በእንተ፡ንግሥተ፡አዜብ።
ወዘከመ፡ተወልደሂ፡ውእቱ፡ረከብኩ፡ጽሑፍ፡ውስቴቱ፡ለውእቱ፡መጽሐፍ፤እስመ፡ከመዝ፡ዘከርዋ፡ወንጌላዊያን፡ለይእቲ፡ብእሲት፤ወእግዚእነሂ፡ኢየሱስ፡ክርስቶስ፡ይቤ፡እንዘ፡ይወቅሦሙ፡ለሕዝበ፡አይሁድ፡ሰቃልያን፡እለ፡አሜሃ፡ትውልድ፡እንዘ፡ይብል፤ንግሥተ፡አዜብ፡ትትነሣእ፡አመ፡ዕለተ፡ኰነኔ፡ወትትዋቀሦሙ፡ወትትፋትሖሙ፡ወትመውኦሙ፡ለዛቲ፡ትውልድ፡እለ፡ኢሰምዑ፡ስብከተ፡ቃልየ፤እስመ፡ለሊሃ፡መጽአት፡እምአጽናፈ፡ምድር፡ ከመ፡ትስማዕ፡ጥበቢሁ፡ለሰሎሞን፡ወዘይቤ፡ንግሥተ፡አዜብ፡ንግሥተ፡ኢትዮጵያ፡ይእቲ፤ወአጽናፈ፡ምድርሰ፡ዘተብህለ፡በእንተ፡ድካመ፡ፍጥረት፡ዘአንስት፡ወበእንተ፡ርሕቀ፡ፍኖት፡ወላህበ፡ፀሐይ፡ወበእንተ፡ረኃበ፡ፍኖት፡ወጽምአ፡ማይ፨ወይእቲሰ፡ንግሥተ፡አዜብ፡ሠናይት፡ጥቀ፡በራእያኒ፡በላሕያኒ፡ወበአእምሮ፡ወልቡና፡ዘወሀባ፡ እግዚኣብሔር፡ከመ፡ትሖር፡ኢየሩሳሌም፡ከመ፡ትስማዕ፡ጥበቢሁ፡ለሰሎሞን፤እስመ፡በፈቃደ፡እግዚአብሔር፡ተገብረ፡ዝንቱ፡ወኮነ፡ሥምረቱ፡ወይእቲሰ፡ባዕልት፡ጥቀ፡በዘ፡ወህባ፡እግዚኣብሔር፡ክብረ፡ወብዕለ፡ወርቀ፡ወብሩረ፡ወአልባሰ፡ክቡረ፡ወአግማለ፡ወአግብርተ፡ወነጋድያነ፡ወይነግዱ፡ላቲ፡ባሕረ፡ወየብሰ፡ወህንደኬ፡ወአስዋነ፨ ፨ ፨