፻፲፬፡በእንተ፡ግብአታ፡ለጽዮን።
ወታቦተ፡ሕጉኒ፡ለእግዚአብሔር፡ጽዮን፡ቅድስት፡ትነብር፡ህየ፡እስከ፡ውእተ፡አሚረ፡አመ፡ይነብር፡እግዚእነ፡ውስተ፡ደብረ፡ጽዮን፤ወትመጽእ፡ጽዮን፡ወታስተርኢ፡ለኵሉ፡ድሉተ፡ወሕንጽታ፡በከመ፡ቀፈላ፡ሙሴ፡በ፫፡ማኅተም፤በከመ፡ይቤ፡በሕግ፡ዘብሉይ፡ወዘሐዲስ፡በስምዐ፡፪፡ወ፫፡ይቁም፡ኵሉ፡ነገር፡ወአሜሃ፡ይቤ፡ኢሳይያስ፡ነቢይ፡ምዉታን፡ይትነሥኡ፡ወየሐይዉ፡እለ፡ውስተ፡መቃብር፡እስመ፡ጠል፡ዘእምኀቤከ፡ሕይወቶሙ፡ውእቱ፤ወሶበ፡ተንሥኡ፡ምዉታን፡በጠለ፡ምሕረቱ፡ዘይሰቅያ፡ለምድር፡ይቀውሙ፡ቅድሜሁ፡ምስለ፡ምግባራቲሆሙ፡ዘገብሩ፤ወይመጽኡ፡ሄኖክ፡ወኤልያስ፡እንዘ፡ሕያዋን፡ከመ፡ይኩኑ፡ለስምዕ፡ወሙሴ፡ወአሮን፡እምነ፡ምዉታን፡ሐይዉ፡ምስለ፡ኵሉ፡ወይፈትሑ፡መዛግሒሃ፡ወያርእይዎሙ ፡ለአይሁድ፡ሰቃልያን፡ወይወቅሥዎሙ፡ወይዛለፍዎሙ፡በእንተ፡ኵሉ፡ዘዐለዉ፡ቃለ፡እግዚአብሔር፤ወይሬእዩ፡ዘጸሐፈ፡ሎሙ፡በእዴሁ፡ቃላተ፡ለትእዛዙ፡ወመና፡ዘከመ፡ሴሰዮሙ፡ዘእንበለ፡ጻማ፡ምስለ፡መስፈሩ፡ጎሞር፡ወመንፈሳዊት፡ጽዮን፡ለመድኀኒቶሙ፡ዘወረደት፡ወበትረ፡አሮን፡እንተ፡ሠረጸት፡በአምሳለ፡ማርያም፨ ፨ ፨