Kebre Negest 113

፻፲፫፡በእንተ፡ሰረገላ፡ወመግረሬ፡ፀር።

አውሥኡ፡ወይቤልዎ፡ሊቃነ፡ጳጳሳት፡ለጎርጎርዮስ፡ገባሬ፡መንክር፡ናሁኬ፡ጠየቅነ፡ወአለበውከነ፡ከመ፡ከብሩ፡ወዐብዩ፡ነገሥተ፡ኢትዮጵያ፡በእንተ፡ጽዮን፤ወካዕበ፡ዐብዩ፡ነገሥተ፡ሮም፡በእንተ፡ቅንዋት፡ዘገብረት፡ልጓመ፡እሌኒ፡ወኮኖ፡መግረሬ፡ፀር፡ለንጉሠ፡ሮም፡ወለንጉሠ፡ኢትዮጵያ፡ኮኖ፡ሰረገላ፡ወውእቱኒ፡ሞአ፡ፀሮ፤ወካዕበ፡ንግረነ፡እስከ፡ማእዜኑ፡ይነብር፡መግረሬ፡ፀር፡ኀበ፡ንጉሠ፡ሮም፡ወሰረገላ፡ምስለ፡ጽዮን፡ኀበ፡ንጉሠ፡ኢትዮጵያ፤ንግረነ፡እስመ፡ከሠተ፡ለከ፡እግዚአብሔር፡ዘኮነ፡ወዘይከውን፡ራእየ፡ወትንቢተ፡ከመ፡ሙሴ፡ወኤልያስ።አውሥአ፡ወይቤሎሙ፡አነ፡እከሥት፡ለክሙ፡ለንጉሠ፡ሮም፡ሶበ፡ተዐደወ፡ወአምዐዖ፡ለእግዚአብሔር፡በውስተ፡ሃይማኖት፡ዛቲ፡እንተ፡ሠራዕነ፡ሃይማኖተ፡ሀሎ፡ይትዐደዋ፡ዘይመጽእ፡ንጉሥ፡በሮሜ፡ወየኀብር፡ምስሌሁ፡፩፡ሊቀ፡ጳጵሳት፡ወይዌልጥዋ፡ወይገፈትእዋ፡ለነገረ፡፲ወ፪፡ሐዋርያት፡ወያፈልስዎ፡ውስተ፡ፍትወተ፡ልቦሙ፡ወይሜህሩ፡በፈቃዶሙ፡ወይመይጥዎ፡ለመጽሐፍ፡ውስተ፡ግዕዞሙ፤በከመ፡ይቤ፡ሐዋርያ፡በዘ፡ለሊሆሙ፡አትከሉ፡ርእሶሙ፡ከመ፡ሰዶም፡ወገሞራ ፤ወእግዚእነሂ፡ይቤሎሙ፡በወንጌል፡ለአርዳኢሁ፡ተዐቅቡ፡እምእለ፡ይመጽኡ፡ኀቤክሙ፡በአልባሰ፡አባግዕ፡ወእንተ፡ውስጦሙሰ፡ተኵላት፡ወመሠጥ።ወሶበ፡አዕለውዋ፡ለሃይማኖት፡ትትሀየድ፡እምኔሆሙ፡መግረሬ፡ፀር፡ወመንበረ፡ጴጥሮስኒ፡አልቦ፡ዘይነብር፡ዲቤሃ፡እለ፡ወለጡ፡ሃይማኖትነ፤እስመ፡ይትዐረቅ፡አማዑቲሆሙ፡ለሊቃነ፡ጳጳሳቲሆሙ፡ለእመ፡ነበሩ፡በሕሡም፡ሃይማኖት፡ዲቤሃ፤እስመ፡ይትኤዝዝ፡መልአከ፡እግዚአብሔር፡ዘየዐቅባ፡ለመንበረ፡ጴጥሮስ፡በሮሜ፡ወመግረሬ፡ፀርኒ፡የሀይዳ፡እግዚአብሔር፡እምኔሁ፡ለንጉሥ፡ዘኢየዐቅብ፡ሃይማኖተ፡ይፀብእዎ፡ፋርስ፡ወስሙ፡ይመስለኒ፡መርቅያኖስ፡ዕልወ፡ሃይማኖት፤ወይከብቶ፡ንጉሠ፡ፋርስ፡ዘስሙ፡ሃሬኔዎስ፡ወይነሥኦ፡ምስለ፡ፈረሱ፡ንጉሥ፤ወበፈቃደ፡እግዚአብሔር፡ይትሀወክ፡ፈረስ፡ዘቦቱ፡መግረሬ፡ፀር፡ወይበውእ፡ውስተ፡ባሕር፡ወየኀልቅ፡በህየ፤ወቅንዋትሰ፡ታበርህ፡ህየ፡በውስተ፡ባሕር፡እስከ፡ይመጽእ፡ክርስቶስ፡ዳግመ፡በዐቢይ፡ስብሐት፡በደመና፡ሰማይ፡ምስለ፡ኀይል፡ዘንተኬ፡አርአየኒ፡እግዚአብሔር፡በውስተ፡ግብ፤ወበእንተ፡ንጉሠ፡ኢትዮጵያ፡ወጽዮን፡መርዓተ፡ሰማይ፡ወሰረገላ፡በዘ፡ይረውጹ፡አነ፡እነግረክሙ፡ዘከሠተ፡ሊተ፡አምላኪየ፡ወአለበወኒ ፤ትነብር፡በርትዕት፡ሃይማኖት፡እስከ፡ምጽአተ፡እግዚእነ፡ወአልቦ፡ዘትጸንን፡እምቃለ፡ሐዋርያት ፡ወንሕነ፡በከመ፡ሠራዕነ፡ትሄሉ፡እስከ፡ኅልቀተ፡ዓለም፨ወአውሥእዎ፡ለገባሬ፡መንክር፡ወይቤልዎ፡አመኬ፡ይመጽእ፡ሰማልያል፡ይትኀበልኑ፡ውሕኮ፡ሃይማኖቶሙ፡ለኢትዮጵያ፡ዘውእቱ፡ሐሳዌ፡መሲሕ፡አውሥአ፡ወይቤ፡አልቦ፡አኮኑ፡ተነበየ፡ዳዊት፡ወይቤ፡ኢትዮጵያ፡ታበጽሕ፡እደዊሃ፡ኀበ፡እግዚአብሔር፤ወዘንተ፡ዘይቤ፡ኢየዐልዉ፡ወኢይዌልጡ፡ዘንተ፡ሃይማኖት፡ወሥርዐትነ፡ወዘእለ፡እምቅድሜነ፡መምህራነ፡ሕግ፡ሐዋርያት፨ ፨ ፨