Kebre Negest 111

፻፲፩፡በእንተ፡ዕርገቱ፡ወዳግም፡ምጽአቱ።

ወበከመ፡ተነበዩ፡ነቢያት፡ኵሎሙ፡ወአበው፡ቀደምት፡ብዙኀ፡በእንተ፡ዕርገቱ፡ወዳግም፡ምጽአቱ፡ይኰንን፡ሕያዋነ፡ወሙታነ፡ወዳዊትኒ፡ይቤ፡በእንተ፡ዕርገቱ፡ዐረገ፡ውስተ፡አርያም፡ፄዊወከ፡ፄዋ፡ወወህብከ፡ጸጋከ፡ለእጓለ፡እመሕያው፤ወካዕበ፡ይቤ፡እግዚአብሔር፡ወፂእየ፡እገብእ፡ወእትመየጥ፡እንተ፡ቀላየ፡ባሕር፤ወካዕበ፡ይቤ፡ዘምሩ፡ለእግዚአብሔር፡ዘዐርገ፡ውስተ፡ሰማይ፤ሰማይ፡ዘመንገለ፡ጽባሕ።ወበከመ፡ተነበየ፡አሞጽ፡ነቢይ፡ወይቤ፡መሲሕ፡ዘይገብር፡ጊዜ፡በጽሐ፡ወይትሌዐል፡እምድር፡ውስተ፡አርያም፤ወእግዚአብሔር፡ስሙ፡ዘኵሎ፡ይመልክ፡ወበከመ፡ተነበየ፡ዳዊት፡ነቢይ፡ወይቤ፡ተለዐልከ፡እግዚኦ፡በኀይልከ፡ንሴብሕ፡ወንዜምር፡ለጽንዕከ፡ወበከመ፡ተነበየ፡ዘካርያስ፡ነቢይ፡ወይቤ፡ወይቀውማ፡እገሪሁ፡ውስተ፡ደብረ፡ዘይት፡ጽባሒሃ፡ለኢየሩሳሌም፡ወተጽዕነ፡ላዕለ፡ኪሩቤል፡ወሰረረ፡በክነፈ፡ነፋስ፡ወበከመ፡ይቤ፡ዳዊት፡አርኅዉ፡ኆኃተ፡መኳንንት፡ወይትረኀዋ፡ኆኃት፡እለ፡እምፍጥረት፡ወይባእ፡ንጉሠ፡ስብሐት፤ መኑ፡ውእቱ፡ዝንቱ፡ንጉሠ፡ስብሐት፤እግዚአብሔር፡ኀያል፡ወጽኑዕ፡እግዚአብሔር፡ኀያል፡በውስተ፡ፀብእ፤ወካዕበ፡አጠየቀ፡ወይቤ፡አርኅዉ፡ኆኃተ፡መኳንንት፡ወይትረኀዋ ፡ኆኃት፡እለ፡እምፍጥረት፡ወይባእ፡ንጉሠ፡ስብሐት፤መኑ፡ውእቱ፡ዝንቱ፡ንጉሠ፡ስብሐት፤እግዚአብሔር ፡አምላከ፡ኀያላን፡ውእቱ፡ዝንቱ፡ንጉሠ፡ስብሐት።ወበእንተ፡ምጽአቱ፡ዳግመ፡ይኴንን፡ሕያዋነ፡ወሙታነ፡ዘሎቱ፡ስብሐት፡ለዓለመ፡ዓለም፡አሜን፤ወበከመ፡ተነበየ፡ዘካርያስ፡ነቢይ፡ውእተ፡አሚረ፡ይመጽእ፡እግዚአብሔር፡አምላኪየ፡ወኵሎሙ፡ቅዱሳኒሁ፡ምስሌሁ።ወበከመ፡ተነበየ፡ዳዊት፡ነቢይ፡ወይቤ፡ምዕረ፡ነበበ፡እግዚአብሔር፡ወዘንተ፡ክመ፡ሰማዕኩ፤እስመ፡ዘእግዚአብሔር ፡ሣህል፡ወዚአከ፡እግዚኦ፡ኀይል፡እስመ፡አንተ፡ትፈድዮ፡ለኵሉ፡በከመ፡ምግባሩ፡ወበከመ፡ተነበየ፡ዳንኤል፡ነቢይ፡ወይቤ፡ርኢኩ፡በራእየ፡ሌሊት፡ወናሁ፡መጽአ፡ከመ፡ወልደ፡እጓለ፡እመሕያው፡ኀበ፡ብሉየ፡መዋዕል፡ወተውህበ፡ሎቱ፡ምኵናን፡ወክብር፡ወመንግሥት፡ወኵሎሙ፡አሕዛብ፡ወነገድ፡ወበሓውርት፡ተቀንዩ፡ሎቱ፡ወምኵናኑኒ፡ዘአልቦ፡ማኅለቅተ፡እስከ፡ለዓለመ፡ዓለም፡አሜን፨ወኵሎሙ፡ነቢያት፡ተነበዩ፡ወአልቦ፡ዘኮነ፡ዘእንበለ፡ትንቢተ፡ነቢያት፡ወኵሉ፡ነገሩ፡ዘኮነ፡ወዘይከውን፡ዘተገብረ፡ወዘይትገበር፡ዘቀዳሚ፡ወዘደኃሪ፡ወእስከ፡ዳግም፡ምጽአቱ፤ ወአኮ፡በቃል፡ባሕቲቱ፡ዘተነበዩ፡ወዘተናገሩ፡አላ፡በሥጋሆሙኒ፡አርአዩ፡ዘምስለ፡ትንቢት፡ወኮነ ፡ረኃብ፡ምድረ፡ኮናአን፡ወወረደ፡አቡነ፡አብርሃም፡ግብጸ፡ወገብአ፡ምስለ፡ብዙኅ፡ብዕል፡ወክብር፡ዘእንበለ፡ጥልቀት፤ወከማሁ፡ወረደ፡መድኀኒነ፡ወአድኀነ፡ቤተ፡ክርስቲያኑ፡ማኅበረ፡አሕዛብ፡ወዐርገ፡ነሢኦ፡ክብረ፡ወስብሐተ፨ ፨ ፨