፲፩፡ኀበ፡ኀብሩ፡፫፻፲ወ፰ርቱዓነ፡ሃይማኖት። / ኀበ፡ኀብሩ፡በእንተ፡ጽዮን፡፫፻፲ወ፰ርቱዓነ፡ሃይማኖት።
ወአውሥእዎ፡ወይቤሉ፡እወ፡አማን፡ቀደመት፡ተፈጥሮ፡ታቦተ፡ኪዳን፡ወአልቦ፡ሐሰት፡ውስተ፡ቃልከ፡እሙን፡ ወርቱዕ፡ወጽድቅ፡ውእቱ፡ወአልቦ፡ተውላጥ፤አቅዲሙሰ፡ለጽዮን፡ፈጠራ፡ለማኅደረ፡ስብሐቲሁ፡ወምክረ፡ኪዳኑሰ፡ዘይቤ፡እለብስ፡ሥጋ፡አዳም፡መሬታዊተ፡ወኣስተርኢ፡ለኵሉ፡ዘፈጠርኩ፡በእዴየ፡ወበቃልየ።ወሶበሰ፡ኢወረደት፡ጽዮን፡ሰማያዊት፡ወሶበኒ፡ኢለብሰ፡ሥጋ፡አዳም፡እመ፡ኢተርእየ፡እግዚአብሔር፡ቃል፡ወእመ፡ኢኮነ፡መድኀኒተነ፤ስምዑ፡በአምሳል፤ጽዮንሰ፡ሰማያዊት፡ተመሰለታ፡ለወላዳተ፡መድኅን፡ማርያም፤እስመ፡ሕንጽት፡ጽዮን፡ወንቡር፡ውስቴታ፡፲ቃላት፡ዘሕግ፡እለ፡ጽሑፋት፡በእደዊሁ፡ወውስተ፡ከርሠ፡ማርያም፡ኀደረ፡ለሊሁ፡ፈጣሪ፡ዘበእንቲአሁ፡ኵሉ፡ኮነ፨ ፨ ፨
