Kebre Negest 109

፻፱፡በእንተ፡ስቅለቱ።

ወካዕበ፡ተነበዩ፡ነቢያት፡በእንተ፡ስቅለቱ፡ለክርስቶስ፡ወበከመ፡ተነበየ፡ሙሴ፡ቊልዔሁ፡ለእግዚአብሔር፡ወይቤ፡ትሬእዩ፡መድኀኒትክሙ፡ስቁለ፡ዲበ፡ዕፅ፡ወኢተአምኑ፡ቦቱ።ወበከመ፡ተነበየ፡ዳዊት፡ወይቤ፡አኀዙኒ፡ከለባት፡ብዙኃን፡ወቀነዉኒ፡እደዊየ፡ወእገርየ፡ወኆለቁ፡ኵሎ፡አዕፅምትየ፡እሙንቱሰ፡ጠዪቆሙ፡ተዐወሩኒ፡ወተካፈሉ፡አልባስየ፡ለርእሶሙ፡ወተዓፀዉ፡ዲበ፡ዐራዝየ።ወበከመ፡ተነበየ፡ኢሳይያስ፡ነቢይ፡በእንተ፡ትስብእቱ፡ወስቅለቱ፡ለክርስቶስ፡ወይቤ፡እግዚኦ፡መኑ፡የአምነነ፡ቃልነ፡ወለመኑ፡ተከሥተ፡መዝራዕተ፡እግዚአብሔር፤ ወነገርነ፡ከመ፡ሕፃን፡በቅድሜሁ፡ወከመ፡ሥርው፡በውስተ፡ምድር፡ጽምእት፡አልቦ፡ላሕየ፡ወአልቦ፡ራእየ፡ ወራእዩሂ፡ምኑን፡ወትሑት፡እምኵሉ፡ሰብእ፤ብእሲሁ፡ቅሡፍ፡ውእቱ፡ወሕሙም፡እስመ፡ሜጠ፡ገጻ፡ወአስተሐቀርዎ፡ወኢተሓሰብዎ፡ወበከመ፡ተነበየ፡ሰሎሞን፡ወይቤ፡ንቅትሎ፡ለጻድቅ፡እስመ፡ክቡድ፡ለነ፡ይትቃወሞን፡ለምግባሪነ፡መዝለፌ፡ኮነነ፡ለኅሊናነ፡ወሰቆራረ፡ኮነ፡ሎቱ፡በኀጣውኢነ፤ወካዕበ፡ደገመ፡ወይቤ፡ወልድየ፡ኢያስሕቱከ፡ሰብእ፡ረሲዓን፡ለእመ፡ይቤሉከ፡ነዓ፡ምስሌነ፡ተሳተፍ፡ንድፍን፡ደመ፡ንጹሐ፡ወንንሣእ፡በርባሮ፡ወይኩነነ፡አሐደ፡ቊናመተ፡ለኵልነ ፤አግሕሥ፡ርእሰከ፡እምአሠሮሙ፡እስመ፡አኮ፡በከ፡ዘይረብቡ፡ለአዕዋፍ፡መሥገርተ። ወበከመ፡ተነበየ፡ዳዊት፡ወይቤ፡ወወደዩ፡ሐሞተ፡ውስተ፡መብልዕየ፡ወአስተዩኒ፡ብሒአ፡ለጽምእየ። ወበከመ፡ተነበየ፡ኢሳይያስ፡ነቢይ፡ወይቤ፡ውእቱ፡ነሥአ፡ደዌነ፡ወጾረ፡ሕማመነ፡ወበቊስለ፡ዚአሁ፡ሐየውነ፤ወርኢናሁ፡ሕሙመ፡ወቊሱለ፡በሕማም፡ወውእቱሰ፡ኢከሠተ፡አፉሁ፡በሕማሙ፡ወመጽአ፡ይጠባሕ፡ከመ፡በግዕ፡በቅድመ፡ዘይቀርጾ፡ከማሁ፡ኢከሠተ፡አፉሁ፡በሕማሙ፡እስከ፡ይነሥእዋ፡ለነፍሱ፤ወኢየአምርዋ፡ለልደቱ፤በኀጢአተ፡ሕዝብየ፡በጻሕኩ፡እስከ፡ለሞት፡ወበከመ፡ተነበየ፡ኤርምያስ፡ነቢይ፡ወይቤ፡ወነሣኡ፡ሤጦ፡ለክቡር፡፴፡ብሩረ፡ዘአክበርዎ፡እምደቂቀ፡እስራኤል፡ወይቤለኒ፡እግዚአብሔር፡ደዮ፡ውስተ፡ሕንቅርት፡ወፍትኖ፡ለእመ፡ኮነ፡ንጹሐ፡ወወህብዎ፡ለገራህተ፡ለብሓዊ፤በከመ፡አዘዘኒ፡እግዚአብሔር፡እንብብ፡ወበከመ፡ተነበየ፡ኢሳይያስ፡ነቢይ፡ወይቤ፡ኆለቊዎ፡ምስለ፡ኃጥኣን፡ወአግብእዎ፡ለሞት፡ወበከመ፡ተነበየ፡ዳዊት፡ነቢይ፡ወይቤ፡በዝኁ፡እለ፡ይጸልኡኒ፡በዐመፃ፡ወፈደዩኒ፡እኪተ፡ህየንተ ፡ሠናይት፡ወበከመ፡ተነበየ፡ዘካርያስ፡ነቢይ፡ወይቤ፡ወሀለዎሙ፡ይርአይዎ፡ለዘሰቀልዎ፡ወወግእዎ፨ወብዙኀ፡ዘእምተነግረ፡ወተዘመረ፡ትንቢተ፡ነቢያት፡በእንተ፡ምጽአቱ፡ወስቅለቱ፡ወሞቱ፡ወትንሣኤሁ፡ወዕርገቱ፡ወዳግም፡ምጽአቱ፡በስብሐት፤ወባሕቱ፡ኅዳጠ፡ዘከርነ፡ትንቢተ፡ነቢያት፡ለእለ፡ትሰምዑ፡ወተአምኑ፡ወትሌብዉ፡ንሕነ፡በበ፩፩፡ዘከርነ፤በከመ፡ተብህለ፡በሐዋርያት፡በወንጌል፡መራሕከነ፡ወበነቢያት፡ናዘዝከነ፤እስመ፡ነገረ፡ነቢያት፡ያረትዕ፡ሃይማኖተ ፡ኑፉቃን፨ ፨ ፨