Kebre Negest 1

፩፡በእንተ፡ክብረ፡ነገሥት።

ፍካሬ፡ወዜና፡ዘ፫፻፲ወ፰፡ርቱዓነ፡ሃይማኖት፡በእንተ፡ክብር፡ወዕበይ፡ወተድላ፡ዘከመ፡ወሀበ፡እግዚአብሔር፡ለደቂቀ፡አዳም፤ወፈድፋደሰ፡ዘበእንተ፡ዕበያ፡ወክብራ፡ለጽዮን፡ታቦተ፡ሕጉ፡ለእግዚአብሔር፡እንተ፡ገባሪሃ፡ወኬንያሃ፡ለሊሁ፡በውስተ፡ጽርሐ፡መቅደሱ፡እምቅድመ፡ኵሉ፡ፍጥረት፡መላእክት፡ወሰብእ።እስመ፡በኅብረት፡ወበሥምረት፡ወበዕሪና፡ገብርዋ፡አብ፡ወወልድ፡ወመንፈስ፡ቅዱስ፡ለጽዮን፡ሰማያዊት፡ለማኅደረ፡ስብሐቲሆሙ።ወእምዝ፡ይቤ፡አብ፡ለወልድ፡ወለመንፈስ፡ቅዱስ፡ንግበር፡ሰብአ፡በአርአያነ፡ወበአምሳሊነ፤ወኀብሩ፡ወሠምሩ፡በዝ፡ምክር።ወይቤ፡ወልድ፡አነ፡እለብስ፡ሥጋሁ፡ለአዳም፤ወይቤ፡መንፈስ፡ቅዱስ፡አነ፡አኀድር፡ውስተ፡ልበ፡ነቢያት፡ወጻድቃን።ወዛቲ፡ኅብረት፡ወኪዳን፡ተገብረት፡በውስተ፡ጽዮን፡ማኅደረ፡ስብሐቲሆሙ።ወዳዊትኒ፡ይቤ፡ተዘከር፡ማኅበረከ፡ዘአቅደምከ፡ፈጢረ፡ለመድኀኒተ፡በትረ፡ርስትከ፡በደብረ፡ጽዮን፡ዘኀደርከ፡ውስቴታ፨ወገብሮ፡ለአዳም፡በዘዚአሁ፡አርአያ፡ወአምሳል፡ከመ፡ይንሥቶ፡ለሰይጣን፡በእንተ፡ትዕቢቱ፡ምስለ፡ሰራዊቱ፤ያቅሞ፡ለአዳም፡ተክለ፡ዚአሁ፡ምስለ፡ኄራን፡ደቂቁ፡ለስብሐቲሁ።እስመ፡ኅሉቅ፡ወምቱር፡ምክረ፡እግዚአብሔር፡እንተ፡ይቤ፡እከውን፡ሰብአ፡ወኣስተርኢ፡ለኵሉ፡ዘፈጠርኩ፡በሥጋ፡እትገሰስ፤ወበደኃሪ፡መዋዕል፡በሥምረቱ፡ተወልደ፡በሥጋ፡እምዳግማዊት፡ጽዮን፡ዳግማዊ፡አዳም፡ዝውእቱ፡መድኀኒነ፡ክርስቶስ፡ዛቲ፡ይእቲ፡ምክሕነ፡ወሃይማኖትነ፡ተስፋነ፡ወሕይወትነ፡ጽዮን፡ሰማያዊት፨ ፨ ፨