Biblia Etíope · Biblia Etíope en Ge'ez
Josué 16
ኦሪት፡ዘኢየሱስ።1ወኮነ፡ደወሎሙ፡ለደቂቀ፡ዮሴፍ፡እምነ፡ዮርዳንስ፡ዘመንገለ፡ኢያሪኮ፡እምነ፡ጽባሒሁ፡ወየዐርግ፡እምነ፡ኢያሪኮ፡ላዕለ፡አድባር፡ዘውስተ፡ገዳም፡ውስተ፡ቤቴል፡ሉዛ።
2ወይወፅእ፡ውስተ፡ቤቴል፡ወየኀልፍ፡ላዕለ፡ደወለ፡ከሮንቲ።
3ወየኀልፍ፡ላዕለ፡ደወሎሙ፡ሰብዐቱ፡አፍላግ፡በውስተ፡ደወሎሙ፡ለቤቶሮን፡ዘታሕትየ፡ወይከውን፡ሞጻእቶሙ፡ላዕለ፡ባሕር።
4ወተወርሱ፡ደቂቀ፡ዮሴፍ፡ኤፍሬም፡ወምናሴ።
5ወኮነ፡ደወሎሙ፡ለኤፍሬምኒ፡በበ፡ሕዘቢሆሙ፡ወኮነ፡ደወለ፡ርስቶሙ፡እምነ፡ጽባሒሃ፡ለአጣሮት፡ወኤሮኅ፡ወቤቶሮን፡እንተ፡ላዕሉ፡ወጋዛራ።
6ወየኀልፍ፡ደወሎሙ፡ላዕለ፡ባሕር፡እምነ፡መስዓ፡ለቴርማ፡ወየኀልፍ፡ላዕለ፡ጽባሕ፡ዲበ፡ቴናታ፡ወውስተ፡ኤላስ፡ወየኅልፍ፡እምነ፡ጽባሕ፡ውስተ፡ኢያኖከ።
7ወውስተ፡መራኮ፡ወአጣሮት፡ወአዕጻዳቲሆን፡ወይበውእ፡ዲበ፡ኢያሪኮ፡ወይወፅእ፡ዲበ፡ዮርዳንስ።
8ወእምነ፡[ጣ]ፉ፡የሐውር፡ደወሎሙ፡ላዕለ፡ባሕር፡ዲበ፡ኬልቃና፡ወይከውን፡ሞጻእቶሙ፡ዲበ፡ባሕር፡ወዝንቱ፡ውእቱ፡ርስቶሙ፡ለሕዝበ፡ኤፍሬም፡በበ፡ሕዘቢሆሙ።
9ወአህጉርኒ፡እለ፡ፈለጡ፡ለደቂቀ፡ኤፍሬም፡በውስተ፡ማእከለ፡ርስቶሙ፡ለደቂቀ፡መናሴ፡ኵሉ፡አህጉሪሆሙ፡ወአዕጻዳቲሆሙ።
10ወኢያጥፍኦሙ፡ኤፍሬም፡ለከናኔዎን፡እለ፡ይነብሩ፡ውስተ፡ጋዜር፡ወነበሩ፡ከናኔዎን፡ውስተ፡ኤፍሬም፡እስከ፡ዮም፡እስከ፡አመ፡ዐርገ፡ፈርዖን፡ንጉሠ፡ግብጽ፡ወነሥኣ፡ወአውዐያ፡በእሳት፡ወለከናኔዎን፡ወለፌሬዜዎን፡ወለእለ፡ይነብሩ፡ውስተ፡ጋዜር፡ወግእዎሙ፡ወወሀባ፡ፈርዖን፡ለወለቱ፡ሕፄሃ፡ኪያሃ።