1 ወኮነ፡ቃለ፡እግዚአብሔር፡ዳግመ፡ኀበ፡ዮናስ፡ወይቤሎ።
2 ተንሥእ፡ወሖር፡ነኔዌ፡ሀገረ፡ዐባይ፡ወስብክ፡ሎሙ፡በከመ፡ዘቀዲሙ፡ስብከት፡ዘእቤለከ፡አነ።
3 ወተንሥአ፡ዮናስ፡ወሖረ፡ነኔዌ፡በከመ፡ይቤሎ፡እግዚአብሔር፤ወነኔዌሰ፡ዐባይ፡ሀገር፡ውእቱ፡ ለእግዚአብሔር፡መጠነ፡ምሕዋረ፡ሠሉስ።
4 ወአልጺቆ፡ይባእ፡ሀገረ፡ሰበከ፡ምሕዋረ፡ዕለት፡ወይቤ፤እስከ፡ሠሉስ፡መዋዕል፡ትትገፈታእ፡ነኔዌ።
5 ወተአምኑ፡ሰብአ፡ነኔዌ፡በቃለ፡እግዚአብሔር፡ወሰበኩ፡ጾመ፡ወለብሱ፡ሠቀ፡ንኡሶሙ፡ወዐቢዮሙ።
6 ወሰምዐ፡ንጉሠ፡ነኔዌ፡ወተንሥአ፡እምነ፡መንበሩ፡ወለብሰ፡ሠቀ፡ወአእተተ፡አልባሲሁ፡ወነበረ፡ውስተ፡ሐመድ።
7 ወሰበከ፡ንጉሥ፡ለነኔዌ፡ወለዐበይቱ፡ወይቤ፤ሰብእ፡ወእንስሳ፡ወላህም፡ወአባግዕ፡ኢይብልዑ፡ወኢምንተኒ፡ወኢይትረፀዩ፡ወኢይስተዩ፡ማየ።
8 ወለብሱ፡ሠቀ፡ሰብእ፡ወእንሰሳ፡ወአውየዉ፡ኀበ፡እግዚአብሔር፡ኅቡረ፡ወኀደጉ፡ኵሎ፡እከየ፡ምግባሮሙ፡ወዐመፃ፡ዘውስተ፡እደዊሆሙ፡ወይቤሎ።
9 መኑ፡ያአምር፡እመ፡ይኔስሕ፡እግዚአብሔር፡ወይመይጥ፡መቅሠፍተ፡መዐቱ፡ወኢንመውት፡እንክ።
10 ወርእየ፡እግዚአብሔር፡ምግባሮሙ፡ከመ፡ነስሑ፡እምፍኖቶሙ፡እኩይ፤ወእግዚአብሔርኒ፡ነስሐ፡እምነ፡ዘነበበ፡እኩየ፡ከመ፡ይግበር፡ላዕሌሆሙ፡ወኢገብረ፡እኩየ።