Jonás 1

1 ወኮነ፡ቃለ፡እግዚአብሔር፡ኀበ፡ዮናስ፡ወልደ፡አማቴ፡ወይቤሎ፡እግዚአብሔር፡ለዮናስ።

2 ተንሥእ፡ወሖር፡ነኔዌ፡ሀገረ፡ዐባየ፡ወስብክ፡ሎሙ፤እስመ፡ዐርገ፡ገዐረ፡እከዮሙ፡ኀቤየ።

3 ወሖረ፡ዮናስ፡ወተኀጥአ፡ብሔረ፡ተርሴስ፡እምገጸ፡እግዚአብሔር፤ ወወረደ፡ሀገረ፡ኢዮጴ፡ወረከበ፡ሐመረ፡ዘይነግድ፡ብሔረ፡ተርሴስ፤ ወተዐሰበ፡ወዐርገ፡ውስቴቱ፡ይንግድ፡ምስሌሆሙ፡ተርሴስ፡እምገጸ፡እግዚአብሔር።

4 ወአምጽአ፡እግዚአብሔር፡ነፋሰ፡ዐቢየ፡ውስተ፡ባሕር፡ወዐቢየ፡ማዕበለ፡ባሕር፤ወተመንደበ፡ሐመሮሙ፡ከመ፡ይሰበር።

5 ወፈርሁ፡ኖትያት፡ወአውየዉ፡ኵሎሙ፡ኀበ፡አማልክቲሆሙ፤ ወአስተዋፅኡ፡ወገደፉ፡ውስተ፡ባሕር፡ ንዋዮሙ፡ከመ፡ያቅልሉ፡ሐመሮሙ፤ወወረደ፡ዮናስ፡ውስተ፡ከርሠ፡ሐመር፡ወኖመ፡ወንኀረ።

6 ወወረደ፡ኀቤሁ፡ዘሐደፍፈ፡ወይቤሎ፤ምንት፡ያነውመከ፤ተንሥእ፡ወጸውዕ፡አምላከከ፡ከመ፡ያድኅነነ፡እግዚአብሔር፡ወኢንሙት።

7 ወተባሀሉ፡በበይናቲሆሙ፡ንዑ፡ንትዓፀው፡ወናአምር፡በበይነ፡መኑ፡ረከበተነ፡ዛቲ፡እኪት፤ወተዓፀዉ፡ወወረደ፡ዕፅ፡ላዕለ፡ዮናስ።

8 ወይቤልዎ፤ንግረነ፡በበይነ፡መኑ፡ረከበተነ፡ዛቲ፡እኪት፤ምንት፡ተግባርከ፡ወእምአይቴ፡መጻእከ፡ወአይቴ፡ተሐውር፡ወአይቴ፡ብሔርከ፡ወምንት፡ሕዝብከ።

9 ወይቤሎሙ፡ዮኖስ፤ገብረ፡እግዚአብሔር፡አነ፡ወአምላኪየ፡እግዚአብሔር፡አምላከ፡ሰማይ፡ዘገብረ፡ባሕረ፡ወየብሰ።

10 ወፈርሁ፡እሙንቱ፡ዕደው፡ዐቢየ፡ፍርሀተ፡ወይቤልዎ፤ምንተ፡ገበርከ፤ወአእመርዎ፡እሙንቱ፡ዕደው፡ከመ፡እምገጸ፡እግዚአብሔር፡ተኀጥአ፡እስመ፡ነገሮሙ።

11 ወይቤልዎ፤ምንተ፡እንከ፡ንረሲከ፡ወይኀድገነ፡ባሕር፤እስመ፡ይትሀወክ፡ባሕር፡ወይትነሣእ፡ማዕበል፡ዐቢይ።

12 ወይቤሎሙ፡ዮናስ፤ንሥኡኒ፡ወወርዉኒ፡ውስተ፡ባሕር፡ወየኀድገክሙ፡ባሕር፤አነ፡አእመርኩ፡ከመ፡በእንቲአየ፡መጽአክሙ፡ዝንቱ፡ማዕበል፡ዐቢይ።

13 ወተባአሱ፡ይትመየጡ፡መንገለ፡ምድር፡እሙንቱ፡ዕደው፡ወስእኑ፤እስመ፡ትትሀወክ፡ባሕር፡ወትትነሣእ፡ማዕበል፡ላዕሌሆሙ።

14 ወአውየዉ፡ኵሎሙ፡ኅቡረ፡ኀበ፡እግዚአብሔር፡ወይቤሉ፤ሓሰ፡ለከ፡እግዚኦ፡ኢታጥፍአነ፡በበይነ፡ነፍሱ፡ለዝንቱ፡ብእሲ፡ወኢትረሲ፡ላዕሌነ፡ደመ፡ጻድቅ፤እስመ፡አንተ፡እግዚኦ፡ዘከመ፡ፈቀድከ፡ገበርከ።

15 ወነሥእዎ፡ለዮናስ፡ወወረውዎ፡ውስተ፡ባሕር፡ወአርመመት፡ባሕር።

16 ወፈርህዎ፡ለእግዚአብሔር፡እሙንቱ፡ዕደው፡ዐቢየ፡ፍርሀተ፡ወሦዑ፡ለእግዚአብሔር፡መሥዋዕተ፡ወበፅዑ፡ብፅዓተ።