1 ወአነ፡እቀውም፡ውስተ፡መዓቅብ፡ወአዐርግ፡ውስተ፡ኰኵሕ፡ወኣፀምእ፡ኣአምሮ፡ዘይነብበኒ፡እግዚአብሔር፡ወኣውሥኦ፡ለዘይዘልፈኒ።
2 ወተሰጥወኒ፡እግዚአብሔር፡ወይቤለኒ፤ጸሐፍ፡ነገረ፡ራእይ፡ውስተ፡ሰሌዳ፡ከመ፡ያፍጥን፡ዘያነብብ።
3 እስመ፡ዓዲሁ፡ሀለወ፡ራእይ፡በበዕድሜሁ፡ወይሠርቅ፡በማዕዶቱ፡ወአኮ፡ለከንቱ፤ወእመኒ፡ጐንደየ፡ጽንሖ፡እስከ፡ይመጽእ፡ወይበጽሕ፡ወኢይጐነዲ።
4 ወእመሰ፡ተመይጠ፡ኢትሠምር፡ቦቱ፡ነፍስየ፤ጻድቅሰ፡በአሚን፡የሐዩ።
5 ወብእሲሰ፡ነባቢ፡ወመስተሐቅር፡ኢየኀልፍ፡ወኢበምንትኒ፤አርሐበ፡ነፍሶ፡ሲኦል፡ወኢይጸግብ፡ከመ፡ሞት፡ወያስተጋብእ፡ኀቤሁ፡ኵሎ፡አሕዛበ፡ወይትወከፎሙ፡ለኵሎሙ፡አሕዛብ።
6 ዘንተ፡ኵሎ፡ይሜስሉ፡ላዕሌሁ፡ወይነግሩ፡ምሳሌሁ፡ወይብሉ፤አሌሎ፡ዘያስተጋብእ፡ሎቱ፡ዘኢኮነ፡ዘዚአሁ፤አስከ፡ምንትኑ፡ያከብድ፡ሎቱ፡ጋገ፡ዐቢየ።
7 እስመ፡ግብተ፡ይትነሣእ፡ወይነስኮ፡ወይተግሁ፡መማክርቲሁ፡ወትከውኖሙ፡አንተ፡ወየሐበልዩከ።
8 እስመ፡አንተ፡ሐብለይከ፡ብዙኀ፡አሕዛበ፡ወየሐበልዩከ፡ኵሎሙ፡እለ፡ተርፉ፡አሕዛብ፡በእንተ፡ደመ፡ሰብእ፡ወበዐመፃ፡አህጉር፡ወበሓውርት፡ወበእንተ፡ኵሎሙ፡እለ፡ይነብሩ፡ውስቴታ።
9 አሌሎ፡ለዘ፡ይትኤገል፡ትእግልተ፡እኩየ፡ለቤቱ፡ከመ፡ያስርር፡ውስተ፡አርያም፡እጐሊሁ፡ከመ፡ይፃአ ፡እምእደ፡እኩያን።
10 ወመከረ፡ኀሳረ፡ለቤትከ፡ወተዐደውከ፡ብዙኀ፡አሕዛበ፡ወዐመፀት፡ነፍስከ።
11 እስመ፡እብንኒ፡ትግዕር፡እምውስተ፡አረፍት፡ወሦክ፡ይወፅእ፡እምዕፅ።
12 አሌሎ፡ለዘ፡የሐንጽ፡አህጉረ፡በደም፡ወያጸንዕ፡አህጉረ፡በዐመፃ።
13 ኢኮነኬ፡ዝንቱ፡እምኀበ፡እግዚአብሔር፡ዘኵሎ፡ይመልክ፡ወኀልቁ፡ብዙኃን፡አሕዛብ፡በእሳት፡ ወተመንደቡ፡ብዙኃን፡አሕዛብ።
14 እስመ፡መልአ፡ኵሎ፡አእምሮ፡ስብሐተ፡እግዚአብሔር፡ወይደፍኖሙ፡ከመ፡ማይ፡ብዙኀ።
15 አሌሎ፡ለዘ፡ያሰትዮ፡ለቢጹ፡በዘ፡ይመውት፡ወያሰክሮ፡በዘ፡የኀስር፡ከመ፡ይነጽር፡ውስተ፡በአታተ፡ምሕራሞሙ።
16 እስመ፡ታሰቲ፡ኀሳረ፡ለክብርከ፡ወርወይ፤ወአንተሂ፡ልብ፡ረዐድ፡ወአንቀልቅል፡እስመ፡ዐገተ፡ከመ፡ጽዋዕ፡የማኑ፡ለእግዚአብሔር፡ወተጋብአ፡ኀሳረ፡ላዕለ፡ክብርከ።
17 እስመ፡ርኵሰ፡ሊባኖስ፡ይደፍነከ፡ወሕርትምና፡አርዌ፡ገዳም፡ያደነግፀከ፡በእንተ፡ደመ፡ሰብእ፡ወኀጢአተ፡ብሔር፡ወአህጉር፡ወኵሎሙ፡እለ፡ይነብሩ፡ውስቴታ።
18 ምንተ፡እንከ፡ይበቍዕ፡ግልፎ፡ዘገለፉ፡ወሰበኩ፡ወገብሩ፡ሐሰተ፡ምትሀተ፡ዐይን፡ወይትአመኖ፡ገባሪሁ፡ለዝኩ፡ዘለሊሁ፡ገብረ፡ከመ፡ይግበር፡ጣፆተ፡በሃመ።
19 አሌሎ፡ዘይብሎ፡ለዕፅ፤ንቃህ፡ወተንሥእ፤ወይብሎ፡ለእብን፤ተለዐል፤ወውእቱሂ፡ሐሰት፡ወይገብርዎ፡በወርቅ፡ወብሩር፡ወነፍሰ፡አልቦ።
20 ወእግዚአብሔርሰ፡ውስተ፡ጽርሐ፡መቅደሱ፡ወትፈርሆ፡እምቅድመ፡ገጹ፡ኵላ፡ምድር።