1 ተረፈ፡ዘርእየ፡እንባቆም፡ነቢይ።
2 እስከ፡ማእዜኑ፡እግዚኦ፡ንኬልሕ፡ወኢትሰምዐነ፡ነአወዩ፡ኀቤከ፡ተገፊዐነ፡ወኢታድኅነነ።
3 ለምንት፡እንከ፡አርአይከነ፡ስራሐ፡ወሕማመ፡ከመ፡እርአይ፡ኀሳረ፡ወሕርትምና፤በቅድሜየ፡ኮነ፡ፍትሕ፡ወመኰንንኒ፡ይትሐለይ።
4 በእንተ፡ዝንቱ፡ዐለዉ፡ሕገከ፡ወኢይወፅእ፡ፍትሐ፡ጻድቅ፡እስመ፡ኃጥእ፡ይትኤገሎ፡ለጻድቅ፤ በእንተ፡ዝንቱ፡ይወፅእ፡ፍትሕ፡ግፍቱእ።
5 ርእዩኬ፡እለ፡ታሰተሐቅሩ፡ወነጽሩ፡ወአንክሩ፡መንክረ፡ወትማሰኑ፤እስመ፡ግብረ፡እገብር፡አነ፡በመዋዕሊክሙ፡ዘኢታአምሩ፡ወእመሂ፡ነገሩክሙ።
6 ናሁ፡እፌኑ፡ላዕሌክሙ፡ፋርስ፡መስተቃትላነ፡ሕዝበ፡መሪራነ፡ወረዋጽያነ፡እለ፡የሐውሩ፡በስፍሐ፡ምድር፡ከመ፡ይረሱ፡አብያተ፡ዘኢኮነ፡ዚአሆሙ።
7 ግሩም፡ራእዩ፡ወእምውስቴቱ፡ይከውን፡ፍትሑ፡ወተረፉሂ፡እምኔሁ፡ይወፅእ።
8 ወይሰርር፡ከመ፡ነምር፡አፍራሲሆሙ፡ወይበድሩ፡እምተኵላተ፡ዐረብ፤ወይሰርሩ፡ከመ፡ንስር፡ ዘይጔጕእ፡ለበሊዕ፡ወይበጽሑ፡እምርሑቅ፡አፍራሲሆሙ።
9 ወይበጽሖሙ፡ጥፍአት፡ለኃጥኣን፡እለ፡ይትቃወሙ፡ፍጽመ፡ቅድመ፡ገጾሙ፡ወያስተጋብኡ፡ ፄዋሆሙ፡ከመ፡ኆጻ።
10 ወውእቱሰ፡ይነግሥ፡ሎሙ፡ወይፈግዕ፡ላዕሌሆሙ፡ወኀያላን፡ተውኔቱ፡ወይሳለቅ፡ላዕለ፡ኵሉ፡አጽዋኒሆሙ፡ወይደፍኖሙ፡በመሬት፡ወይእኅዞሙ።
11 ወእምዝ፡ይመይጥ፡መንፈሶ፡ወየኀልፍ፡ወያመሥጥ፡ዛቲ፡ኀይሉ፡ለአምላክየ።
12 አኮኑ፡አንተ፡ቀደምከ፡እግዚኦ፡አምላክየ፡ቅዱስ፡ወኢትመውት፤እግዚኦ፡ለኵነኔ፡ሠራዕካሁ፡ወፈነውከኒ፡ከመ፡እዝልፍ፡በተግሣጹ።
13 በዐይን፡ንጹሕ፡ከመ፡ኢይነጽር፡ውስተ፡እኩይ፡ወሕማም፡ወጻዕር፤ለምንት፡እንከ፡ታረምም፡ እንዘ፡ትሬእዮሙ፡ለእለ፡ያስተአክዩ፡ወይውኅጦ፡ኃጥእ፡ለጻድቅ።
14 ወትሬስዮሙ፡ከመ፡ዓሣተ፡ባሕር፡ወከመ፡አርዌ፡ዘአልቦ፡መኰንነ።
15 በመሥገርቱ፡አውፅአ፡ይኅልቆ፡ወሰሐቦ፡በመርበብቱ፡ወአሰተጋብአ፡በመሥገርቱ።
16 በእንተ፡ዝንቱ፡ይትፌሣሕ፡ልቡ፤በእንተ፡ዝንቱ፡ይሠውዕ፡ለመሥገርቱ፡ወየዐጥን፡ለመርበብቱ፡እስመ፡ቦሙ፡አስብሑ፡መክፈልቶ፡ወኀርየ፡ሲሳዮ።
17 በእንተ፡ዝንቱ፡ይረብብ፡መሥገርቶ፡ወዘልፈ፡ይቀትሎሙ፡ለአሕዛብ፡ወኢይምሀኮሙ።
Habacuc 2