Biblia Etíope · Biblia Etíope en Ge'ez
Génesis 31
ኦሪት፡ዘልደት።1ወሴምዐ፡ያዕቆብ፡ነገሮም፡ለደቂቀ፡ላባ፡ዘይቤሉ፡ነሥአ፡ያዕቆብ፡ኵሎ፡ንዋየ፡አቡነ፡ወእምንዋየ፡አቡነ፡አጥረዮ፡ለዝንቱ፡ኵሉ፡ክብር።
2ወርእዮ፡ያዕቆብ፡ለላባ፡ከመ፡አኮ፡ከመ፡ትካት፡ገጹ፡ምስሌሁ።
3ወይሌሎ፡አምላክ፡እግዚአብሔር፡ለያዕቆብ፡ግባዕ፡ብሔረ፡አቡከ፡ወኀበ፡አዝማዲከ፡ወእሄሉ፡ምስሌከ።
4ወጸውዖን፡ያዕቆብ፡ለልያ፡ወለራሔል፡ውስተ፡ሐቅል፡ኀበ፡ምርዓይ።
5ወይቤሎን፡ናሁ፡አነ፡እሬኢ፡ገጾ፡ለአቡክን፡ከመ፡ኢኮነ፡ምስሌየ፡ከመ፡ትካት፡ወአምላኩ፡ለአቡየ፡ሀሎ፡ምስሌየ።
6ታአምራ፡ከመ፡በኵሉ፡ኀይልየ፡ተቀነይኩ፡ለአቡክን።
7ወአቡክንሰ፡አሕዘነኒ፡ወወለጠ፡ዐስብየ፡ዘዐሥሩ፡አባግዕ፡ወኢያብሖ፡እግዚአብሔር፡ያሕሥም፡ላዕሌየ።
8ለእመ፡ይቤለኒ፡ዘሕብር፡ይኩን፡ዐስብከ፡ወይወልዳ፡ኵሎን፡አባግዕ፡ዘሕብር፡ወለእመ፡ይቤለኒ፡ጻዕዳ፡ይኩን፡ዐስብከ፡ይወልዳ፡ኵሎን፡ጸዐዳ።
9ወነሥአ፡እግዚአብሔር፡ኵሎ፡አባግዒሁ፡ለአቡክን፡ወወሀበኒዮን፡ሊተ።
10ወእምዝ፡አመ፡ይፀንሳ፡እሬኢ፡በአዕይንትየ፡በሕልም፡ወናሁ፡አብሓኵ፡ዘአባግዕ፡ወዘአጣሊ፡የዐርጉ፡ዲበ፡አጣሊ፡ወዲበ፡አባግዕ፡ጻዕዳ፡ወ[ዘ]ሕብርኒ፡ወዘሕብረ፡ሐመድ፡ወኰሠኰሥ።
11ወይቤለኒ፡መልአ[ከ]፡እግዚአብሔር፡በሕልም፡ያዕቆብ፡ያዕቆብ፡ወእቤ፡ነየ፡አነ፡ምንትኑ፡ውእቱ።
12ወይቤለኒ፡ነጽር፡በአዕይንቲከ፡ወርኢ፡አብሓኵ፡ዘአጣሊ፡ወዘአባግዕ፡የዐርጉ፡ዲበ፡አጣሊ፡ወዲበ፡አባግዕ፡ጸዐዳ፡ወዘሕብርኒ፡ወዘሕብረ፡ሐመድ፡ወዘኰሠኰሥ፡እስመ፡ርኢኩ፡ኵሎ፡ዘይገብር፡ላዕሌከ፡ላባ።
13አነ፡ውእቱ፡እግዚአብሔር፡አምላክከ፡ዘአስተርአይኩከ፡በብሔረ፡እግዚአብሔር፡በኀበ፡ቀባእከ፡ሊተ፡ሐውልተ፡ወበህየ፡በፃእከ፡ሊተ፡ብፅአተ፡ወይእዜኒ፡ተንሥእ፡ወሑር፡ውስተ፡ብሔር፡ዘተወለድከ፡ወእሄሉ፡ምስሌከ።
14ወአውሥኣሁ፡ወይቤላሁ፡ቦኑ፡እንከ፡ዘብነ፡ርስተ፡ቤተ፡አቡነ።
15አኮኑ፡ከመ፡ነኪር፡ንሕነ፡በኀቤሁ፡ወሤጠነ፡ወበልዐ፡ሤጠነ።
16ወኵሉ፡ክብር፡ዘነሥአ፡እግዚአብሔር፡እምቤተ፡አቡነ፡ለነ፡ውእቱ፡ወለውሉድነ፡ወይእዜኒ፡ኵሎ፡ዘይቤለከ፡እግዚአብሔር፡ግበር።
17ወተንሥአ፡ያዕቆብ፡ወነሥአ፡አንስቲያሁ፡ወደቂቆ፡ወጸዐኖሙ፡በአግማል።
18ወነሥአ፡ኵሎ፡ንዋዮ፡ወቍስቋሳቲሁኒ፡ዘአጥረየ፡በማእከለ፡አፍላግ፡ወኵሎ፡ዘዚአሁ፡ወሖረ፡ኀበ፡አቡሁ፡ይስሐቅ፡ውስተ፡ምድረ፡ከናአን።
19ወላባሰ፡ሖረ፡ኀበ፡ይቀርፅ፡አባግዒሁ፡ወሰረቀት፡ራሔል፡አማልክተ፡አቡሃ።
20ወያዕቆብሰ፡ኀብኦ፡ለላባ፡ሶርያዊ፡ወኢያይድዖ፡ከመ፡የሐውር።
21ወሖረ፡ውእቱ፡ወኵሉ፡ዘዚአሁ፡ወዐደወ፡ፈለገ፡ወኀደረ፡ገለዓድ።
22ወዜነውዎ፡ለላባ፡ሶርያዊ፡ከመ፡ሖረ፡ያዕቆብ።
23ወነሥኦሙ፡ላባ፡ለኵሎሙ፡አኀዊሁ፡ወዴገኖሙ፡ምሕዋረ፡ሰሙን፡መዋዕል፡ወረከቦሙ፡በደብረ፡ገለዓድ።
24ወመጽአ፡እግዚአብሔር፡ኀበ፡ላባ፡ሶርያዊ፡በሕልም፡ሌሊተ፡ወይቤሎ፡ዑቅ፡ኢትንብብ፡ሕሡመ፡ላዕለ፡ያዕቆብ።
25ወረከቦ፡[ላባ፡ለያዕቆብ፡] ወያዕቆብሰ፡ይተክል፡ደብተራ፡ውስተ፡ደብር፡ወአቀሞሙ፡ላባ፡ለአኀዊሁ፡ውስተ፡ደብረ፡ገለዓድ።
26ወይቤሎ፡ላባ፡ለያዕቆብ፡ምንተ፡ገበርኩ፡ጽምሚተ፡ዘትትኅጥአኒ፡ወትሰርቀኒ፡አዋልድየ፡ከመ፡ዘበኵናት፡ፄወዉ።
27ወሶበ፡ነገርከኒ፡እምፈነውኩከ፡በትፍሥሕት፡ወበሐሤት፡ወበማሕሌት፡ወበከበሮ፡ወመሰንቆ።
28ወሚመ፡ኢይደልወኒኑ፡ከመ፡እስዐም፡ደቂቅየ፡ወአዋልድየ፡ወይእዜሰ፡ከመ፡አብድ፡ገበርከ።
29ወይእዜኒ፡እምክህልኩ፡ገቢረ፡እኩየ፡ላዕሌከ፡ወባሕቱ፡አምላከ፡አቡ[ከ፡] ይቤለኒ፡ትማልም፡ዑቅ፡ርእሰከ፡ኢትግበር፡ሕሡመ፡ላዕለ፡ያዕቆብ።
30ወይእዜኒ፡ሑር፡እስመ፡ፌተውከ፡ከመ፡ትሑር፡ቤተ፡አቡከ፡ወለምንት፡ትሰርቀኒ፡አማልክትየ።
31ወአውሥአ፡ያዕቆብ፡ወይቤሎ፡ለላባ፡እስመ፡መስለኒ፡ዘተሀይደኒ፡አዋልዲከ፡ወኵሎ፡ንዋይየ።
32ወይእዜኒ፡ርኢ፡ለእመቦ፡ዘሀሎ፡ንዋይከ፡ኀቤየ፡ወንሣእ፡ወቦአ፡ላባ፡ወአልቦ፡ዘረከበ፡ወኢምንተ፡ወይቤ፡ያዕቆብ፡በኀበ፡ዘረከብከ፡አማልክቲከ፡ኢይሕየው፡ወናሁ፡በቅድመ፡እሎንቱ፡አኀዊነ፡ወኢያእመረ፡ያዕቆብ፡ከመ፡ራሔል፡ሰረቀት።
33ወቦአ፡ላባ፡ቤተ፡ልያ፡ወኢረከበ፡ወወፅአ፡ወቦአ፡ቤተ፡ያዕቆብ፡ወፈተነ፡ወቦአ፡ቤተ፡ክልኤሆን፡ዕቁባቲሁ፡ወኢረከበ፡ወቦአ፡ቤተ፡ራሔል።
34ወራሔልሰ፡ነሥአቶሙ፡ለአማልክተ፡አቡሃ፡ወወደየቶሙ፡ውስተ፡ሕንባላተ፡ገመል፡ወነበረት፡ላዕሌሁ።
35ወትቤሎ፡ለአቡሃ፡ኢይምሰልከ፡ዘአስተሐቀርኩከ፡እግዚእየ፡እስመ፡ኢይክል፡ተንሥኦ፡ቅድሜከ፡እስመ፡ትክት፡አነ፡ወፈተነ፡ላባ፡ኵሎ፡ቤታ፡ለራሔል፡ወኢረከበ፡አማልክቲሁ።
36ወተምዐ፡ያዕቆብ፡ወተላኰዮ፡ለላባ፡ወይቤሎ፡ምንት፡አበሳየ፡ወምንት፡ጌጋይየ፡ዘዴገንከኒ፤
37ወፈተንከኒ፡ኵሎ፡ንዋይየ፡ምንተ፡ረከብከ፡እምነ፡ቍስቋሰ፡ቤትከ፡ናስተኣኅዝኑ፡ቅድመ፡እሎንቱ፡አኀዊነ፡ወይዝልፉ፡ማእከሌነ።
38ዕሥራ፡ዓመት፡ሊተ፡እንዘ፡አዐቅብ፡አባግዒከ፡ወአጣሌከ፡ወኢማሕስአ፡በግዕ፡ኢበላዕኩ፡እምነ፡አባግዒከ።
39ወብላዐ፡አርዌኒ፡ኢያምጻእኩ፡ለከ፡አነ፡እፈዲ፡እምኀቤየ፡እመኒቦ፡ዘሰርቀ፡እመኒ፡መዓልተ፡ወእመኒ፡ሌሊተ።
40ውስተ፡ጠል፡እበይት፡ወነፍጸ፡ንዋም፡እምአዕይንትየ።
41ዕሥራ፡ዓመት፡ሊተ፡ዮም፡ውስተ፡ቤትከ፡ዘተቀነይኩ፡ለከ፡ዐሠርተ፡ወአርባዕተ፡ዓመተ፡ተቀነይኩ፡ለከ፡በእንተ፡ክልኤ፡አዋልዲከ፡ወስድስተ፡ዓመተ፡ውስተ፡አባግዒከ፡ወረሰይከ፡ሊተ፡ዐስብየ፡ዐሥሩ፡አባግዐ።
42ሶበ፡አኮ፡አምላከ፡አብርሃም፡አቡየ፡ዘሀሎ፡ምስሌየ፡ወሶበ፡አኮ፡በፍርሀተ፡ይስሐቅ፡ዕራቅየ፡እምፈነውከኒ፡ወርእየ፡እግዚአብሔር፡ጻማሆን፡ለእደውየ፡ወገሠጸከ፡ትማልም።
43ወአውሥአ፡ላባ፡ለያዕቆብ፡ወይቤሎ፡አዋልድኒ፡አዋልድየ፡ወደቂቅኒ፡ደቂቅየ፡ወእንስሳሂ፡እንስሳየ፡ወኵሉዝ፡ዘትሬኢ፡ዘዚአየ፡ውእቱ፡ወዘአዋልድየ፡ምንተ፡እንከ፡እሬስዮን፡ሎንቱ፡ዮም፡ወለውሉዶንሂ፡ዘወለዶ።
44ወይእዜኒ፡ነዓ፡ንትማሐል፡አነ፡ወአንተ፡ወይኩን፡ሰላም፡ማእከሌየ፡ወማእከሌከ።
45ወነሥአ፡ያዕቆብ፡እብነ፡ወአቀመ፡ሐውልተ።
46ወይቤሎሙ፡ያዕቆብ፡ለአኀዊሁ፡አልዱ፡እብነ፡ወአለዱ፡እብነ፡[ወገብሩ፡ወግረ፡] ወበልዑ፡ወሰትዩ፡በኀበ፡ይእቲ፡እብነ፡ወግር፡ወይቤሎ፡ላባ፡ዛቲ፡እብን፡ስምዕ፡ማእከሌየ፡ወማእከሌከ፡ዮም።
47ወሰመያ፡ላባ፡ወግረ፡ስምዕ፡ወያዕቆብኒ፡ሰመያ፡ከማሁ።
48ወይቤሎ፡ላባ፡ለያዕቆብ፡ናሁ፡ዛቲ፡ሐውልት፡እንተ፡ኣቀውም፡ስምዕ፡ማእከሌየ፡ወማእከሌከ፡ወበእንተ፡ዝንቱ፡ተሰምየ፡ስማ፡ወግረ፡ስምዕ።
49ወራእይ፡ዘአስተርአየኒ፡እግዚአብሔር፡ይርአይ፡ማእከሌየ፡ወማእከሌከ፡እስመ፡ንትራሐቅ፡አሐዱ፡ምስለ፡ካልኡ፤
50ከመ፡ኢትሣቅዮን፡ለአዋልድየ፡ወከመ፡ኢትንሣእ፡ብእሲተ፡ላዕሌሆን፤
51ወርኢ፡ናሁ፡አልቦ፡ዘሀሎ፡ምስሌነ።
52እመኒ፡(ኢ)ዐደውኩ፡ኀቤከ፡ዛቲ፡ወግር፡ወዛቲ፡ሐውልት፡ትትልወኒ፡በእኪት፡ወአንተኒ፡ለእመ፡(ኢ)ዐደውከ፡ኀቤየ።
53አምላከ፡አብርሃም፡ወአምላከ፡ናኮር፡ይፍታሕ፡ማእከሌነ፡ወመሐለ፡ሎቱ፡ያዕቆብ፡በፍርሀተ፡ይስሐቅ፡አቡሁ።
54ወሦዐ፡ያዕቆብ፡መሥዋዕተ፡በውስተ፡ደብር፡ወጸውዐ፡አኀዊሁ፡ወበልዑ፡ወሰትዩ፡ወቤቱ፡ውስተ፡ውእቱ፡ደብር።