Biblia Etíope · Biblia Etíope en Ge'ez

Génesis 14

ኦሪት፡ዘልደት።

1ወኮነ፡በመንግሥቱ፡ለአሜሮፌን፡ንጉሠ፡ሰናአር፡ወአርዮ፡ንጉሠ፡ሴላሳድ፡ወከዶሎጎሞር፡ንጉሠ፡ኤሎም፡ወ[ተርጋር]፡ንጉሠ፡አሕዛብ።

2ወፀብእውሙ፡ለባላቅ፡ንጉሠ፡ሶዶም፡ወለባሮስ፡ንጉሠ፡ጎሞር፡ወለሰናአር፡ንጉሠ፡[አ]ዶም፡ወሴሞዶር፡ንጉሠ፡ሴባዮ፡ወንጉሠ፡ባላ፡እንተ፡ይእቲ፡ሴጎር።

3ወእሉ፡ኵሎሙ፡ኀብሩ፡ላዕለ፡ቈለት፡ኤሌቄን፡እንተ፡ይእቲ፡[ባሕረ፡] ኤሎን።

4ዐሠርተ፡ወክልኤተ፡ዓመተ፡ተቀንዩ፡ለከዶሎጎሞር፡(ወ[ለ]ነገሥት፡እለ፡ምስሌሁ፡) ወአመ፡ኮነ፡ዐሠርቱ፡ወሠለስቱ፡ዓመት፡አፅረሩ።

5ወመጽኡ፡ከደሎጎሞር፡ወነገሦት፡እለ፡ምስሌሁ፡ወቀተልዎሙ፡ለእለ፡ያርብሕኒ፡በአስጣሮስ፡ወለቀራንዮን፡ወለሕዝብኒ፡ጽኑዓን፡ምስሌሆሙ፡ወለአምዮስ፡ወለሀገረ፡ሴዊ።

6ወለኬሮዎስ፡እለ፡በአድባረ፡ሴይር፡እስከ፡ጠረሜስ፡ወፋራን፡እንተ፡ውስተ፡ሐቅል።

7ወገቢኦሙ፡መጽኡ፡እንተ፡ዐዘቅተ፡ተስናን፡እንተ፡ይእቲ፡ቃዴስ፡ወቀተልዎሙ፡ለመላእክተ፡ዐማሌቅ፡ለኵሎሙ፡ወለአ[ሞሬ]ዎስ፡ወለእለ፡ይነብሩ፡ውስተ፡አስታና።

8ወወጽኡ፡ንጉሠ፡ሶዶም፡ወ[ንጉሠ፡] ጎሞራ፡ወንጉሠ፡አዳማ፡ወንጉሠ፡ሴባዮን፡ወንጉሠ፡ባላቅ፡እንተ፡ይእቲ፡ሴጎር፡ወተኣኀዙ፡በቈላተ፡ኤሌቄን፤

9ምስለ፡ከዶሎጎሞር፡ንጉሠ፡ኤሎም፡ወተርጋር፡ንጉሠ፡አሕዛብ፡ወአሜ[ር]ፌር፡ንጉሠ፡ሰናአር፡ወአርዮ፡ንጉሠ፡[ሴላሳድ]፡እሉ፡እሙንቱ፡አርባዕቱ፡ነገሥት፡ምስለ፡እልክቱ፡ኀምስቱ።

10ወውእቱሰ፡ቈላተ፡ኤሌቅ፡ምሉእ፡ዐዘቃተ፡ኵለንታሁ፡ወተሰብረ፡ንጉሠ፡ሶዶም፡ወንጉሠ፡ጎሞር፡ወቀተልዎሙ፡በህየ፡ወእለሰ፡ተሰብሩ፡ውስተ፡አድባር፡ጐዩ።

11ወነሥእዎሙ፡ለአፍራሰ፡ሶዶም፡ወጎሞር፡ወኵሎ፡ሥንቆሙ፡ወሖሩ።

12ወነሥእዎ፡ለሎጥሂ፡ወልደ፡እኁሁ፡ለአብራም፡ወንዋያቲሆሙ፡ወአተዉ፡ወምንባራቲሆሙሰ፡ሶዶም።

13ወቦ፡እለ፡በጽሑ፡እምእለ፡ድኅኑ፡ወዜነውዎ፡ለአብራም፡እንዘ፡ሀለዉ፡ኅቡረ፡ኀበ፡ዕፅ፡መንገለ፡አሞሮስ፡እኁሁ፡[ለኤስኮል፡ወ]ለአውናን፡እለ፡ቅሩባን፡እሙንቱ፡ለአብራም።

14ወሶበ፡ሰምዐ፡ከመ፡ተፄወወ፡ሎጥ፡[ወልደ፡] እኁሁ፡ኈለቆሙ፡ለእሊአሁ፡ለኵሎሙ፡ሰብአ፡ቤቱ፡ወኮነ፡፫፻፲ወ፰ወዴገኖሙ፡ወተለዎሙ፡እስከ፡ዳን።

15ወበጽሖሙ፡ሌሊተ፡ምስለ፡ደቁ፡ወቀተሎሙ፡ወዴገኖሙ፡እስከ፡[ኮ]ቤር፡እንተ፡እምፀጋማ፡ለደማስቆ።

16ወነሥኦሙ፡አብቅሊሆሙ፡ወነሥኦ፡ለሎጥሂ፡[ወልደ፡] እኁሁ፡ወንቀዮሙሂ፡ወአንስተኒ፡ወሕዝበኒ።

17ወወጽአ፡ንጉሠ፡ሶዶም፡ወተቀበሎ፡እምድኅረ፡ገብአ፡እምኀበ፡ቀተሎ፡ለከዶሎጎሞር፡ወለነገሥት፡እለ፡ምስሌሁ፡በቈላተ፡ሴዎ፡ወውእቱ፡ገዳም፡ዘመንግሥት፡ውእቱ።

18ወመልከ፡ጼድቅ፡አውጽአ፡ኅብስተ፡ወወይነ፡ካህኑ፡ለእግዚአብሔር፡ልዑል፡ውእቱ፡ንጉሠ፡ሴሌም፡ውእቱ።

19ወባረኮ፡ለአብራም፡ወይቤሎ፡ቡሩክ፡አብራም፡ለእግዚአብሔር፡ልዑል፡ዘፈጠረ፡ሰማየ፡ወምድረ።

20[ወቡሩክ፡እግዚአብሔር፡ልዑል፡] ዘአግብኦሙ፡ለጸላእትከ፡ውስተ፡እዴከ፡ወወሀቦ፡ዐሥራተ፡እድ፡እምኵሉ።

21ወይቤሎ፡ንጉሠ፡ሶዶም፡ለአብራም፡ሀበኒ፡ሰብአ፡ወአፍራሰ፡ኀደጉ፡ለከ።

22ወይቤሎ፡አብራም፡ለንጉሠ፡ሶዶም፡ኣሌዕል፡እዴየ፡ኀበ፡እግዚአብሔር፡ልዑል፡ዘገብረ፡ሰማየ፡ወምድረ፤

23ከመ፡ኢይንሣእ፡ኢፈትለ፡ወኢቶታነ፡አሥኣን፡እምንዋይከ፡ከመ፡ኢትበል፡አነ፡አብዐልክዎ፡ለአብራም።

24እንበለ፡ዘበልዑ፡ሰብእየ፡ወክፍሎሙ፡ለዕደዉ፡እለ፡መጽኡ፡ምስሌየ፡ኤስኮል፡[አውናን]፡ወምንባሬ፡እሉ፡እለ፡ይነሥኡ፡ክፍሎሙ።