1
በእንተ፡ምእመናን፡ዘፊልጵስዩስ
1 እምጳውሎስ፡ወጢሞቴዎስ፡አግብርተ፡ኢየሱስ፡ክርስቶስ፡ለኵሎሙ፡ቅዱሳን፡እለ፡ተቀደሱ፡በኢየሱስ፡ ክርስቶስ፡እለ፡ሀለዉ፡ፊልጵስዩስ፡ምስለ፡ቀሳውስት፡ወዲያቆናት።
2 ሰላም፡ለክሙ፡ወጸጋ፡እግዚአብሔር፡አቡነ፡ወእግዚእነ፡ኢየሱስ፡ክርስቶስ።
3 አአኵቶ፡ለአምላኪየ፡ዘልፈ፡በኵሉ፡ተዝካርክሙ፡ኪያየ።
4 ወእጼሊ፡በኵሉ፡ጊዜ፡በእንቲኣክሙ፡ወእገብር ጸሎተ፡ፍሥሓ።
5 በእንተ፡ተሳትፎትክሙ፡ኪያየ፡በትምህርተ፡ወንጌል፡እምቀዳሚት፡ዕለት፡እስከ፡ይእዜ።
6 እስመ፡እትአመን፡ከመ፡ውእቱ፡ዘወጠነ፡ለክሙ፡ግብረ፡ሠናየ፡ውእቱ፡ይፌጽም፡ለክሙ፡እስከ፡ዕለተ፡ኢየሱስ፡ክርስቶስ።
7 እስመ፡ርቱዕ፡ሊተ፡ዘንተ፡አኀሊ፡በእንቲኣክሙ፡እስመ፡ሀሎክሙ፡ውስተ፡ልብየ፡በመዋቅሕትየ፡ወበቅሥትየ፡ወበትምህርተ፡ጽድቅ፡እስመ፡ኀበርክሙ፡ምስሌየ፡በጸጋ።
8 ወእግዚአብሔር፡ሰማዕትየ፡ከመ፡አፈቅረክሙ፡በፍቅረ፡ክርስቶስ።
9 ወእጼሊ፡በእንተ፡ዝንቱ፡ከመ፡ይብዛኅ፡ወይፈድፍድ፡ተፋቅሮትክሙ፡በአእምሮ፡ወበኵሉ፡ጥበበ፡መንፈስ።
10 ከመ፡ትፍትኑ፡ወታመክሩ፡ዘይኄይስ፡ወዘይሤኒ፡ግብረ፡ከመ፡ትኩኑ፡ቅዱሳነ፡ዘእንበለ፡ዕቅፍት፡በዕለተ፡ክርስቶስ።
11 እንዘ፡ምሉኣን፡አንትሙ፡ፍሬ፡ጽድቅ፡በኢየሱስ፡ክርስቶስ፡ለስብሐተ፡እግዚአብሔር፡ወአኰቴቱ።
በእንተ፡ተሞቅሖቱ፡ለጳውሎስ
12 ወእፈቅድ፡አኃዊየ፡ታእምሩ፡ዜናየ፡ከመ፡ፈድፋደ፡ተለዐለ፡ውስተ፡ትምህርተ፡ወንጌሉ፡ለክርስቶስ።
13 ወተዐውቀ መዋቅሕትየ፡በክርስቶስ፡በኀበ፡ኵሉ፡ምኵናን፡ወበኀበ፡ኵሉ ሰብእ።
14 ወከመ፡ብዙኃን፡እምአኀዊነ፡ምእመናን፡በእግዚእነ፡ተዐገሡ፡በመዋቅሕትየ፡ወፈድፋደ፡ተኀበሉ፡አጥቢዖሙ፡ይንግሩ፡ቃለ፡እግዚአብሔር፡ዘእንበለ፡ፍርሀት።
15 ወቦ፡እለ፡በቅንአቶሙ፡ወቦ፡እለ፡በተቃኅዎቶሙ፡ወቦ፡እለ፡ፈቀዱ፡ይስብኩ፡በፍቅር፡ሠናይ፡ወይምሀሩ፡በእንተ፡ክርስቶስ።
16 እስመ፡የአምሩ፡ከመ፡ለምህሮ፡ወንጌል፡ተሠየምኩ፡ዓዲ።
17 ወእለሰ፡በትዝኅርቶሙ፡ይነግሩ፡በእንተ፡ክርስቶስ፡አኮ፡በንጽሕ፡ዳእሙ፡ይትሐዘቡ፡ከመ፡ገቢሮሙ፡ኪያሁ፡ይወስኩ፡ሊተ፡ሕማመ፡በመዋቅሕትየ።
18 ወናሁ፡ተፈሣሕኩ፡በዝንቱ፡ወእትፌሣሕኒ፡ቦቱ፡ከመ፡በኵሉ፡ምክንያት፡ይንግሩ፡በእንተ፡ክርስቶስ፡እመኒ፡በአድልዎ፡ወእመኒ፡በአማን፡ወይጸውዑ፡ኀቤሁ፡ኵሎ፡ሰብአ።
19 ወአነ፡አአምር፡ከመ፡ዛቲ፡ግብር፡ታበጽሐኒ፡ኀበ፡ሕይወት፡በጸሎትክሙ፡ወበሀበተ፡መንፈሱ፡ለኢየሱስ፡ክርስቶስ።
20 በከመ፡ተሰፈውኩ፡ወተወከልኩ፡ከመ፡ኢይትኀፈር፡ወኢበምንትኒ፡ዳእሙ፡ገሃደ፡በፍሥሓ፡መንፈስ፡ከመ፡ዘልፍ፡ወይእዜኒ፡ዕበዩ፡ለክርስቶስ፡በሥጋየ፡እመኒ፡በሕይወትየ፡ወእመኒ፡በሞትየ።
21 አንሰ፡እመኒ፡ሐየውኩ፡ለክርስቶስ፡ወእመኒ፡ሞትኩ፡ርቡሕ፡ሊተ።
22 ወለእመኒ፡ሐየውኩ፡በሥጋየ፡ከመ፡እፍረይ፡በምግባርየ፡ወኀጣእኩ፡ዘአኀሪ፡ለነፍስየ፡እምእሉ፡ክልኤቱ፡ዘያጽሕቀኒ፡ፈቂዶቶሙ።
23 እፈቱሰ፡እፍልስ፡ወእትፈለጥ፡እምዓለም፡ከመ፡አሀሉ፡ኀበ፡ክርስቶስ፡ወፈድፋደ፡ይኄይስ፡ወይደሉ፡ሊተ፡ዝንቱ።
24 ወከመ፡አሀሉ፡ዓዲ፡በሕይወተ፡ሥጋየ፡ርቱዕ፡በእንቲኣክሙ።
25 ወእትአመን፡አእሚርየ፡ዘንተ፡ከመ፡እነብር፡ወእሄሉ፡ለፍሥሓክሙ፡ወለተልዕሎ፡ሃይማኖትክሙ።
26 ከመ፡አመ፡መጻእኩ፡ካዕበ፡ኀቤክሙ፡ይዕበይ፡ወይትወሰክ፡ክብርክሙ፡በላዕሌየ፡በኢየሱስ፡ክርስቶስ።
27 ወበዘይደሉ፡ለትምህርተ፡ክርስቶስ፡ይኩን፡ዳእሙ፡ግብርክሙ፡ወለእመ፡መጻእኩ፡ኀቤክሙ፡እሬኢ፡ዘንተ፡ወእመኒ፡እንዘ፡ኢሀሎኩ፡እሰምዕ፡በላዕሌክሙ፡ከመ፡ትቀውሙ፡በአሐዱ፡መንፈስ፡ወበአሐዱ፡ነፍስ፡እንዘ፡ትትጋደሉ፡በጻማ፡ሃይማኖተ፡ወንጌል።
28 ወእንዘ፡ኢያንቀለቅሉክሙ፡በምንትኒ፡እለ፡ይትቃወሙነ፡ከመ፡ይትዐወቅ፡ሕርትምናሆሙ፡ወለክሙሰ፡ሕይወት።
29 ወዘንተኒ፡ጸጋ፡እግዚአብሔር፡ዘጸገወክሙ፡አኮ፡ዳእሙ፡ከመ፡ትእመኑ፡ቦቱ፡አላ፡ዓዲ፡ከመሂ፡ትሕምሙ፡በእንቲኣሁ።
30 ወከማሁ፡ከመ፡ትትጋደሉ፡ዘከመ፡ርኢክሙኒ፡ኪያየ፡ወሰማዕክሙ፡በእንቲኣየ።