Biblia Etíope · Biblia Etíope en Ge'ez
Enoc 95
መጽሐፈ፡ሄኖክ።መኑ፡ይሁበኒ፡አዕይንትየ፡ከመ፡ይኩና፡ደመና፡ማይ፡ወእብኪ፡ዲቤክሙ፡ወእክዐው፡አንብዕየ፡ከመ፡ደመና፡ማይ፡ወአዕርፍ፡እምኀዘነ፡ልብየ።መኑ፡ወሀበክሙ፡ከመ፡ትግበሩ፡ጽልዐ፡ወእከየ፡ወይርከብክሙ፡ለኃጥኣን፡ኵነኔ።ኢትፍርሁ፡ጻድቃን፡እምኃጥአን፡እስመ፡ካዕበ፡ያገብኦሙ፡እግዚአብሔር፡ውስተ፡እዴክሙ፡ከመ፡ትግበ፡ላዕሌሆሙ፡ኵነኔ፡በከመ፡ፈቀድክሙ።አሌ፡ለክሙ፡እለ፡ታወግዙ፡ግዘታተ፡ከመ፡ኢትፍትሑ፡ወፈውስ፡ርኁቅ፡እምኔክሙ፡በእንተ፡ኀጢአተ፡ዚአክሙ።አሌ፡ለክሙ፡እለ፡ትፈድዩ፡እኩየ፡ለቢጽክሙ፡እስመ፡ትትፈደዩ፡በከመ፡ምግባሪክሙ።አሌ፡ለክሙ፡ለሰማዕታተ፡ሐሰት፡ወለእለ፡ይደልውዋ፡ለዐመፃ፡እስመ፡ፍጡነ፡ትትሐጐሉ።አሌ፡ለክሙ፡ለኃጥኣን፡እስመ፡ለጻድቃን፡ትሰድድዎሙ፡እስመ፡አንትሙ፡ትትሜጠዉ፡ወትሰደዱ፡እለ፡ዐመፃ፡ወይጸንዕ፡በላዕሌክሙ፡አርኡተ፡ዚአሆሙ።