Biblia Etíope · Biblia Etíope en Ge'ez
Enoc 92
መጽሐፈ፡ሄኖክ።ዘተጽሕፈ፡እምሄኖክ፡ጸሓፊ፡ዝኵሉ፡ትምህርተ፡ጥበብ፡እምኵሉ፡ሰብእ፡ስቡሕ፡ወመኰንነ፡ኵሉ፡ምድር፡ለኵሎሙ፡ውሉድየ፡እለ፡የኀድሩ፡ዲበ፡ምድር፡ወለትውልድ፡ደኀራውያን፡እለ፡ይገብሩ፡ርትዐ፡ወሰላመ።እትኅዝን፡መንፈስክሙ፡በአዝማን፡እስመ፡መዋዕለ፡ወሀበ፡ቅዱስ፡ዐቢይ፡ለኵሉ።ወይትነሣእ፡ጻድቅ፡እምንዋም፡ይትነሣእ፡ወየኀልፍ፡በፍኖተ፡ጽድቅ፡ወኵሉ፡ፍኖቱ፡ወምኋሪሁ፡ዘበኂሩት፡ወበሣህል፡ዘለዓለም።ይሠሀሎ፡ለጻድቅ፡ወሎቱ፡ይሁብ፡ርትዐ፡ዘለዓለም፡ወይሁብ፡ሥልጣነ፡ወይከውን፡በኂሩት፡ወበጽድቅ፡ወየሐውር፡በብርሃን፡ዘለዓለም።ወኀጢአት፡በጽልመት፡ትትሐጐል፡እስከ፡ለዓለም፡ወኢትትረአይ፡እንከ፡እምይእቲ፡ዕለት፡እስከ፡ለዓለም።