Biblia Etíope · Biblia Etíope en Ge'ez
Enoc 58
መጽሐፈ፡ሄኖክ።ወአኀዝኩ፡እበል፡ሣልሰ፡ምሳሌ፡በእንተ፡ጻድቃን፡ወበእንተ፡ኅሩያን።ብፁዓን፡አንትሙ፡ጻድቃን፡ወኅሩያን፡እስመ፡ስብሕ፡ክፍልክሙ።ወይከውኑ፡ጻድቃን፡በብርሃነ፡ፀሐይ፡ወኅሩያን፡በብርሃነ፡ሕይወት፡ዘለዓለም፡ወማኅለቅት፡አልቦቱ፡ለመዋዕለ፡ሕይወቶሙ፡ወለቅዱሳን፡ኍልቈ፡መዋዕል፡አልቦሙ።ወየኀሥሥዎ፡ለብርሃን፡ወይረክብ፡ጽድቀ፡በኀበ፡እግዚአ፡መናፍስት፤ሰላም፡ለጻድቃን፡በኀበ፡እግዚአ፡ዓለም።ወእምድኅረዝ፡ይትበሀል፡ለቅዱሳን፡ከመ፡ይኅሥሡ፡በሰማይ፡ኅቡኣተ፡ጽድቅ፡ክፍለ፡ሃይማኖት፡እስመ፡ሠረቀ፡ከመ፡ፀሐይ፡ዲበ፡የብስ፡ወጽልመት፡ኀለፈ።ወብርሃን፡ዘኢይትኌለቍ፡ይከውን፡ወበኍልቈ፡መዋዕል፡ኢይበውኡ፡እስመ፡ቀዳሚ፡ተሐጕለ፡ጽልመት፡ወብርሃን፡ይጸንዕ፡በቅድመ፡እግዚአ፡መናፍስት፡ወብርሃነ፡ርትዕ፡ትጸንዕ፡ለዓለም፡በቅድመ፡እግዚአ፡መናፍስት።