Biblia Etíope · Biblia Etíope en Ge'ez
Enoc 54
መጽሐፈ፡ሄኖክ።ወነጸርኩ፡ወተመየጥኩ፡ካልአ፡ገጸ፡ምድር፡ወርኢኩ፡ህየ፡ቈላ፡ዕሙቀ፡እንዘ፡ትነድድ፡እሳት።ወአምጽእዎሙ፡ለነገሥት፡ወለኀያላን፡ወወደይዎሙ፡ውስተ፡ዕሙቅ፡ቈላ።ወበህየ፡ርእያ፡አዕይንትየ፡ዘመባዕላቲሆሙ፡እንዘ፡ይገብርዎሙ፡መዓሠርተ፡ኀፂን፡ዘአልቦ፡መድሎት።ወተስእልክዎ፡ለመልአከ፡ሰላም፡ዘየሐውር፡ምስሌየ፡እንዘ፡እብ፡እሉ፡ማእሥራተ፡መባዕላት፡ለመኑ፡ይዴለዉ።ወይቤለኒ፡እሉ፡ይዴለዉ፡ለትዕይንተ፡አዛዝኤል፡ከመ፡ይትመጠውዎሙ፡ወይደይዎሙ፡መትሕተ፡ኵሉ፡ደይን፡ወአእባነ፡ጠዋያተ፡ይከድኑ፡መላትሒሆሙ፡በከመ፡አዘዘ፡እግዚአ፡መናፍስት።ሚካኤል፡ወገብርኤል፡ሩፋኤል፡ወፋኑኤል፡ውእቶሙ፡ያጸንዕዎሙ፡በይእቲ፡ዕለት፡ዐባይ፡በውስተ፡ዕቶነ፡እሳት፡ዘይነድድ፡ይወድይዎሙ፡ውእተ፡ዕለተ፡ከመ፡ይትበቀል፡እምኔሆሙ፡እግዚአ፡መናፍስት፡በዐመፃሆሙ፡በእንተ፡ዘኮኑ፡ላእካነ፡ለሰይጣን፡ወአስሐትዎሙ፡ለእለ፡የኀድሩ፡ዲበ፡የብስ።ወበውእቱ፡መዋዕል፡ይወጽእ፡መቅሠፍቱ፡ለእግዚአ፡መናፍስት፡ወይትረኀዉ፡ኵሉ፡መዛግብተ፡ማያት፡ዘመልዕልተ፡ሰማያት፡ወዲበ፡አንቅዕት፡እለ፡መትሕተ፡ሰማያት፡ወዘመትሕተ፡ምድር።ወይዴመሩ፡ኵሎሙ፡ማያት፡ምስለ፡ማያት፡ዘመልዕልተ፡ሰማያት፡ማይሰ፡ዘመልዕልተ፡ሰማይ፡ተባዕታይ፡ውእቱ፡ወማይ፡ዘመትሕተ፡ምድር፡አንስታይ፡ይእቲ።ወይደመሰሱ፡ኵሉ፡እለ፡የኀድሩ፡ዲበ፡የብስ፡ወእለ፡የኀድሩ፡መትሕተ፡አጽናፈ፡ሰማይ።ወበእንተዝ፡አእመርዋ፡ለዐመፃሆሙ፡እንተ፡ገብሩ፡በዲበ፡ምድር፡ወበእንተዝ፡ይትኀጐሉ።