Biblia Etíope · Biblia Etíope en Ge'ez
Enoc 40
መጽሐፈ፡ሄኖክ።ወርኢኩ፡እምድኅረዝ፡አእላፈ፡አእላፍት፡ወትእልፊተ፡ትእልፊት፡ወአልቦሙ፡ኍልቍ፡ወሐሳብ፡እለ፡ይቀውሙ፡ቅድመ፡ስብሐተ፡እግዚአ፡መናፍስት።ርኢኩ፡ወበ፬ክነፊሁ፡ለእግዚአ፡መናፍስት፡ርኢኢኩ፡፬ገጸ፡ካልአ፡እምእለ፡ይቀውሙ፡ወአስማቲሆሙ፡አእመርኩ፡ዘአይድዐኒ፡አስማቲሆሙ፡መልአክ፡ዘመጽአ፡ምስሌየ፡ወኵሎ፡ኅቡኣተ፡አርአየኒ።ወሰማዕኩ፡ቃሎሙ፡ለእልኩ፡፬ገጽ፡እንዘ፡ይሴብሑ፡ቅድመ፡እግዚአ፡ስብሐት።ቃል፡ቀዳማዊ፡ይባርኮ፡ለእግዚአ፡መናፍስት፡ለዓለመ፡ዓለም።ወቃለ፡ካልአ፡ሰማዕኩ፡እንዘ፡ይባርኮ፡ለኅሩይ፡ወለኅሩያን፡እለ፡ስቁላን፡በእግዚአ፡መናፍስት።ወሣልሰ፡ቃለ፡ሰማዕኩ፡እንዘ፡ይስእሉ፡ወይጼልዩ፡በእንተ፡እለ፡የኀድሩ፡ውስተ፡የብስ፡ወያስተበቍዑ፡በስሙ፡ለእግዚአ፡መናፍስት።ወቃለ፡ራብዐ፡ሰማዕኩ፡እንዘ፡ይሰድዶሙ፡ለሰይጣናት፡ወኢየኀድጎሙ፡ይባኡ፡ኀበ፡እግዚአ፡መናፍስት፡ከመ፡ያስተዋድይዎሙ፡ለእለ፡የኀድሩ፡ዲበ፡የብስ።ወእምድኅረዝ፡ተስእልክዎ፡ለመልአከ፡ሰላም፡ዘየሐውር፡ምስሌየ፡ዘውእቱ፡አርአየኒ፡ኵሎ፡ዘኅቡእ፡ወእቤሎ፡መኑ፡ውእቶሙ፡እሉ፡፬ገጽ፡ዘርኢኩ፡ወእለ፡ሰማዕኩ፡ቃሎሙ፡ወጸሐፍክዎሙ።ወይቤለኒ፡ዝቀዳማዊ፡ውእቱ፡መሐሪ፡ወርኁቀ፡መዓት፡ቅዱስ፡ሚካኤል፤ወካልእ፡ዘዲበ፡ኵሉ፡ሕማም፡ወዲበ፡ኵሉ፡ቍስል፡ዘውሉደ፡ሰብእ፡ውእቱ፡ሩፋኤል፤ወሣልስ፡ዘዲበ፡ኵሉ፡ኃይል፡ውእቱ፡ቅዱስ፡ገብርኤል፤ወራብዕ፡ዘዲበ፡ንስሓ፡ወለተስፋ፡እለ፡ይወርሱ፡ሕይወተ፡ዘለዓለም፡ውእቱ፡ፋኑኤል።ወእሉ፡፬መላእክቲሁ፡ለእግዚአብሔር፡ልዑል፡ወ፬ቃለ፡ሰማዕኩ፡በውእቶን፡መዋዕል።