Biblia Etíope · Biblia Etíope en Ge'ez
Enoc 26
መጽሐፈ፡ሄኖክ።ወእምህየ፡ሖርኩ፡ማእከለ፡ምድር፡ወርኢኩ፡መካነ፡ቡሩከ፡ወጥሉለ፡ዘቦቱ፡አዕፅቅ፡ዘይነብር፡ወይሠርፅ፡እምዕፅ፡ዘተመትረ።ወበህየ፡ርኢኩ፡ደብረ፡ቅዱሰ፡ወመትሕተ፡ደብር፡ማይ፡ዘመንገለ፡ጽባሑ፡ወውኅዘቱ፡መንገለ፡ሰሜን።ወርኢኩ፡መንገለ፡ጽባሕ፡ካልአ፡ደብረ፡ዘይነውኅ፡ከመዝ፡ወማእከሎሙ፡ቈላ፡ዕሙቅ፡ወአልቦ፡ራኅብ፡ወላቲኒ፡የሐውር፡ማይ፡መንገለ፡ደብር፡ወመንገለ፡ዐረቡ፡ለዝ፡ካልእ፡ደብር፡ወይቴሐቶ፡ሎቱ፡ወአልቦ፡ኑኅ፡ወቈላ፡ታሕቱ፡ማእከሎሙ፡ወካልአት፡ቈላት፡ዕሙቃት፡ወይቡሳት፡መንገለ፡ጽንፈ፡ሠለስቲሆሙ።ወኵሉ፡ቈላቱ፡ዕሙቃት፡ወአልቦን፡ራኅብ፡እምኰኵሕ፡ጽኑዕ፤ወዕፅ፡ይተከል፡በላዕሌሆሙ።ወአንከርኩ፡በእንተ፡ኰኵሕ፡ወአንከርኩ፡በእንተ፡ቈላ፡ወጥቀ፡አንከርኩ።