Biblia Etíope · Biblia Etíope en Ge'ez
Enoc 24
መጽሐፈ፡ሄኖክ።ወእምህየ፡ሖርኩ፡ካልአ፡መካነ፡ምድር፡ወአርአየኒ፡ደብረ፡እሳት፡ዘያንበለብል፡መዓልተ፡ወሌሊተ።ወሖርኩ፡መንገሌሁ፡ወርኢኩ፡፯አድባረ፡ክቡራነ፡ወኵሉ፡፩እምነ፡፩እንዘ፡ይትዌለጥ፡ወአዕባነ፡ክቡራነ፡ወሠናያነ፡ወኵሉ፡ክቡር፤ወስብሕ፡ራእዮሙ፡ወሠናይ፡ገጾሙ፡፫መንገለ፡ጽባሕ፡ወጽኑዓን፡፩ዲበ፡፩ወ፫መንገለ፡ሰሜን፡ወጽኑዓን፡፩ዲበ፡፩ወቈላተ፡ዕሙቃተ፡ወጠዋያተ፡አሐቲ፡ለአሐቲ፡እይትቃረባ።ወሳብዕ፡ደብር፡ማእከሎሙ፡ለእሎንቱ፡ወኑኆሙሰ፡ይትማሰሉ፡ኵሎሙ፡ከመ፡መንበረ፡አትሮንስ፡ወየዐውድዎ፡ዕፀወ፡መዐዛ።ወሀሎ፡ውስቴቶሙ፡ዕፅ፡አልቦ፡ግሙራ፡አመ፡ፄነወኒ፡ወኢ፡፩እምውስቴቶሙ፡ወባዕዳንሂ፡ዘከማሁ፡ኢኮነ፡ዘይምዕዝ፡እምኵሉ፡መዐዛ፡ወቈጽሉ፡ወጽጌሁ፡ወዕፁ፡ኢይጸመሂ፡ለዓለም፡ወፍሬሁኒ፡ሠናይ፤ወፍሬሁሰ፡ከመ፡አስካለ፡በቀልት።ወውእተ፡ጊዜ፡እቤ፡ነዋ፡ዝንቱ፡ሠናይ፡ዕፅ፡ወሠናይ፡ለርእይ፡ወአዳም፡ቈጽሉ፡ወፍሬሆኒ፡ሞገስ፡ጥቀ፡ለርእየ፡ገጽ።ወውእተ፡ጊዜ፡አውሥአኒ፡ሚካኤል፡፩እምነ፡መላእክት፡ቅዱሳን፡ወክቡራን፡ዘምስሌየ፡ሀሎ፡ውእቱ፡ዘዲቤሆሙ።