Biblia Etíope · Biblia Etíope en Ge'ez
Enoc 12
መጽሐፈ፡ሄኖክ።ወእምቅድመ፡ኵሉ፡ነገር፡ተከብተ፡ሄኖክ፡ወአልቦ፡ዘየአምሮ፡እምውሉደ፡ሰብእ፡በኀበ፡ተከብተ፡ወኅበ፡ሀሎ፡ወምንተ፡ኮነ።ወኵሉ፡ግብሩ፡ምስለ፡ቅዱሳን፡ወምስለ፡ትጉሃን፡በመዋዕለ፡ዚአሁ።ወአነ፡ሄኖክ፡ኮንኩ፡እባርኮ፡ለእግዚእ፡ዐቢይ፡ወለንጉሠ፡ዓለም፡ወናሁ፡ትጉሃን፡ይጼውዑኒ፡ሊተ፡ለሄኖክ፡ጸሓፊ፡ወይቤሉኒ።ሄኖክ፡ጸሓፌ፡ጽድቅ፡ሑር፡አይድዕ፡ለትጉሃነ፡ሰማይ፡እለ፡ኀደጉ፡ሰማየ፡ልዑለ፡ወምቅዋመ፡ቅዱሰ፡ዘለዓለም፡ወምስለ፡አንስት፡ማሰኑ፡ወገብሩ፡ዘከመ፡ይገብሩ፡ውሉደ፡ሰብእ፡ወነሥኡ፡ሎሙ፡አንስተ፡ወማሰኑ፡ዐቢየ፡ሙስና፡በዲበ፡ምድር።ወኢይከውን፡ሎሙ፡በዲበ፡ምድር፡ሰላም፡ወኅድገተ፡ኀጢአት፡እስመ፡ኢይትፌሥሑ፡በውሉዶሙ።ቀትለ፡ፍቁራኒሆሙ፡ይሬእዩ፡ወዲበ፡ሐጕለ፡ውሉዶሙ፡ይግዕሩ፡ወይስእሉ፡ለዓለም፡ወኢይከውን፡ሎሙ፡ምሕረት፡ወኢሰላም።