ተመስሎተ፡እግዚአብሔር
1 ወሑሩ፡በተፋቅሮ፡ከመ፡አፍቀረክሙ፡ክርስቶስ፡ወመጠወ፡ርእሶ፡በእንቲአክሙ፡መሥዋዕተ፡ወቍርባነ፡ለእግዚአብሔር፡ለመዐዛ፡ሠናይ።
2 ወሑሩ፡በተፋቅሮ፡ከመ፡አፍቀረክሙ፡ክርስቶስ፡ወመጠወ፡ርእሶ፡በእንቲአክሙ፡መሥዋዕተ፡ወቍርባነ፡ለእግዚአብሔር፡ለመዐዛ፡ሠናይ።
3 ወዝሙትሰ፡ወኵሉ፡ርኩስ፡ወትዕግልት፡ኢይሰማዕ፡በላዕሌክሙ፡በከመ፡ይደልዎሙ፡ለቅዱሳን።
4 ወኢነገረ፡ኀፍረት፡ወነገረ፡እበድ፡ወነገረ፡ስላቅ፡ዘኢይደሉ፡ዘእንበለ፡ዳእሙ፡አእኵቶ።
5 ወዘንተ፡አእምሩ፡ከመ፡ኵሉ፡ዘማዊ፡ወርኩስ፡ወመስተዐግል፡ወዘያጣዑ፡አልቦ፡መክፈልተ፡ውስተ፡ምንግሥተ፡ክርስቶስ፡ዘእግዚአብሔር።
6 አልቦ፡ዘያስሕተክሙ፡በነገረ፡ከንቱ፡እስመ፡በእንቲአሁ፡ይመጽእ፡መዓተ፡እግዚአብሔር፡ላዕለ፡ውሉደ፡ዐላዊ።
7 ኢትትመሰልዎሙኬ።
8 እስመ፡ትከት፡ጽልመት፡አንትሙ፡ወይእዜሰ፡ብርሃነ፡ኮንክሙ፡በእግዚእነ።ከመ፡ውሉደ፡ብርሃን፡ሑሩ።
9 እስመ፡ፍሬሁ፡ለብርሃን፡ኵሉ፡ምግባረ፡ሠናይ፡ወጽድቅ፡ወርትዕ።
10 ወአመክሩ፡ዘያሠምሮ፡ለእግዚአብሔር።
11 ወአትኅበሩ፡ምስለ፡እለ፡አልቦሙ፡ፍሬ፡ምግባሮሙ፡ዘጽልመት፡ኵለንታሆሙ፡አላ፡ገሥጽዎሙ።
12 እስመ፡ዘበጽሚት፡ይገብሩ፡ኀፍረተ፡ለነጊር።
13 ወዘሰ፡ክሡት፡ኵሉ፡ውስተ፡ብርሃን፡ይትዐወቅ፡እስመ፡ኵሉ፡ዘገሃድ፡ብርሃን፡ውእቱ።
14 እስመ፡ይቤ፡ንቃህ፡ዘትነውም፡ወተንሥእ፡እሙታን፡ወያበርህ፡ለከ፡ክርስቶስ።
15 ዑቁ፡እንከ፡ዘከመ፡ተሐውሩ፡ከመ፡ጠቢባን፡ወአኮ፡ከመ፡አብዳን።
16 እንዘ፡ታናሐስይዎ፡ለዝ፡ዓለም።እስመ፡እኩይ፡መዋዕሊሁ።
17 በእንተ፡ዝንቱ፡ኢትኩኑ፡አብዳነ።አላ፡ሐልዩ፡ፈቃደ፡እግዚአብሔር ።
18 ወኢትስክሩ፡ወይነ፡እስመ፡ምርዓት፡ውአቱ፡አላ፡ምልኡ፡መንፈስ፡ቅዱስ።
19 ወአንብቡ፡መዝሙረ፡ወስብሐተ፡ወማኅሌተ፡ቅድሳት፡ሰብሑ፡ወዘምሩ፡ለእግዚአብሔር፡በልብክሙ።
20 ወአእኵቱ፡ዘልፈ፡በእንተ፡ኵሉ፡በስመ፡እግዚእነ፡ኢየሱስ፡ክርስቶስ፡ለእግዚአብሔር፡አብ።
በእንተ፡ትሕትና፡ወሠሪዐ፡ቤት
21 አትሕቱ፡ርእሰከሙ፡ለቢጽክሙ፡በፍርሀተ፡እግዚአብሔር።
22 ወአንስትኒ፡ይትአዘዛ፡ለአምታቲሆን፡ከመ፡ዘለእግዚእነ።
23 እስመ፡ብእሲ፡ርእሳ፡ለብእሲት፡ከመ፡ክርስቶስ፡ርእሳ፡ለቤተ፡ክርስቲያን፡ወመድኅነ፡ሥጋ።
24 ወከመ፡ቤተ፡ክርስቲያን፡ትትኤዘዝ፡ለክርስቶስ፡ከማሁ፡አንስትኒ፡ይትአዘዛ፡ለአምታቲሆን፡በኵሉ።
25 ዕደውኒ፡ያፍቅሩ፡አንስቲያሆሙ፡ከመ፡ክርስቶስ፡አፍቀራ፡ለቤተ፡ክርስቲያን፡ወመጠወ፡ርእሶ፡በእንቲአሃ።
26 ከመ፡ይቀድሳ፡ወያንጽሓ፡በጥምቀተ፡ማይ፡ወበቃሉ።
27 ወይረስያ፡ሎቱ፡ክብርተ፡ለቤተ፡ክርስቲያኑ፡ከመ፡ኢይርከብ፡በላዕሌሃ፡ርስሐተ፡ወጥልቀተ።ዳእሙ፡ከመ፡ትኩን፡ንጽሕተ፡ወቅድስተ።
28 ከማሁ፡ዕደውኒ፡ይፍቅሩ፡አንስቲያሆሙ፡ከመ፡ነፍሶሙ።ዘአፍቀረ፡ብእሲቶ፡ርእሶ፡አፍቀረ።
29 ወአልቦ፡ዘይክል፡ጸሊአ፡ሥጋሁ፡ግሙራ።ሴስዩ፡ወተማኅፀኑ፡በከመ፡ክርስቶስ፡ለቤተ፡ክርስቲያኑ።
30 እስመ፡አባለ፡ሥጋሁ፡ንሕነ።
31 ወበእንተ፡ብእሲቱ፡የኀድግ፡ብእሲ፡አባሁ፡ወእሞ፡ወይተልዋ፡ለብእሲቱ፡ወይከውኑ፡ክልኤሆሙ፡አሐደ፡ሥጋ።
32 ዐቢይ፡ውእቱ፡ዝነገር፡ወአንሰ፡እብሎ፡ላዕለ፡ክርስቶስ፡ወላዕለ፡ቤተ፡ክርስቲያኑ።
33 ወባሕቱ፡አንትሙኒ፡ኵልክሙ፡ከማሁ፡አንስቲያክሙ፡አፍቅሩ፡ከመ፡ነፍስክሙ፡ወብእሲትኒ፡ትፍርሆ፡ለምታ።