2
በእንተ፡ድኂን፡እምኀጢአት፡በክርስቶስ
1 ወአንትሙሂ፡እንዘ፡ምውታን፡እንትሙ፡በኃጢአትክሙ።
2 በዘቦቱ፡ሖርክሙ፡ትካት፡በንብረተ፡ሥርዓተ፡ዝዓለም፡ከመ፡ሥምረተ፡መልአክ፡መኰንነ፡ርእየተ፡ነፋስ፡ዘይኄይሎሙ፡ይእዜ፡ለደቂቀ፡ከሓድያን።
3 ወንሕነሂ፡ገበርነ፡ኵልነ፡ትካት፡በፍትወተ፡ሥጋነ፡ወገበርነ፡ፈቃደ፡ሥጋነ፡ወዘሐለይነ፡ወኮነ፡ውሉደ፡መንሱት፡ከመ፡ኵሉ፡ኃጥኣን።
4 ወእግዚአብሔር፡በብዕለ፡ስብሐቲሁ፡ወበብዝኀ፡ፍቅሩ፡ዘአፍቀረነ።
5 እንዘ፡ምውታን፡ንሕነ፡በኃጢአትነ፡አሕየወነ፡በክርስቶስ፡ወድኅነ፡በጸጋሁ።
6 ወአንሥአነ፡ወአንበረነ፡ምስሌሁ፡በሰማያት፡በኢየሱስ፡ክርስቶስ።
7 ከመ፡ያርኢ፡በዓለም፡ዘይመጽእ፡ብዝኀ፡ጸጋሁ፡በዘምሕረነ፡በኢየሱስ፡ክርስቶስ ።
8 እስመ፡በጸጋሁ፡ድኅነ፡ወበአሚን።ወዳእሙ፡ጸጋሁ፡ለእግዚአብሔር፡ውእቱ፡ወኢኮነ፡ዚአክሙ።
9 ወአኮ፡በምግባሪነ፡ከመ፡አልቦ፡ዘይትሜካሕ።
10 እስመ፡ተግባሩ፡ንሕነ፡ዘፈጠረነ፡በኢየሱስ፡ክርስቶስ፡ለምግባረ፡ሠናይ፡ዘአቅደመ፡ሠሪዐ፡እግዚአብሔር፡በዘቦቱ፡ነሐውር።
አዘክሮተ፡ሕይወት፡ቀዳሚ
11 ወተዘከሩ፡አንትሙ፡አሕዛብ፡ትካት፡በሕግ፡ዘሥጋ፡ሀሎክሙ፡ወይብሉክሙ፡ሰብአ፡ቍልፈት፡እለሰ፡ይብሉክሙ፡ከመዝ፡ሰብአ፡ግዝረት፡ወግዝረትሰ፡ግብረ፡እደ፡ሰብእ፡ዘይትገበር፡ውስተ፡ሥጋ።
12 ወኢታአምርዎ፡ለክርስቶስ፡ውእተ፡አሚረ፡ወነኪራን፡አንትሙ፡እምሕገ፡እስራኤል፡ወነግዳን፡እምሥርዐተ፡ተስፋ፡ወአልብክሙ፡ተስፋ፡ወኢታአምርዎ፡ለእግዚአብሔር፡በውስተ፡ዓለም።
ዘከመ፡ነሠተ፡ዐረፍተ፡ማእከል፡ዘጽልእ
13 ወይእዜሰ፡ባሕቱ፡አንትሙ፡እለ፡ትካት፡ርሑቃን፡ቀረብክሙ፡በደሙ፡ለክርስቶስ።
14 እስመ፡ውእቱ፡ሰላምነ፡ዘረሰዮሙ፡አሐደ፡ለክልኤሆሙ፡ወነሠተ፡አረፍተ፡ማእከል፡እንተ፡ጽልእ፡ በሥጋሁ።
15 ወሰዐረ፡ሕገ፡ትእዛዝ፡በሥርዓቱ፡ከመ፡ይረስዩሙ፡አሐደ፡ብእሴ፡ሐዲሰ፡ለክልኤሆሙ፡ወገብረ፡ሰላመ።
16 ወአብጽሖሙ፡ለክልኤሆሙ፡በአሐዱ፡ሥጋሁ፡ለኀበ፡እግዚአብሔር፡በመስቀሉ፡ወለጽልእ፡ ቀተሎ፡ቦቱ።
17 ወመጽአ፡ወወሀበነ፡ሰላመ፡ለርሑቃን፡ወሰላመ፡ለቅሩባን።
18 እስመ፡ውእቱ፡መርሐነ፡ወአቅረበነ፡ለክልኤቱ፡ለኀበ፡አቡሁ፡በመንፈስ፡ቅዱስ።
19 እምይእዜሰ፡ኢኮንክሙ፡ነግደ፡ወፈላሴ፡አላ፡አንትሙ፡ሰብአ፡ሀገሪቶሙ፡ለቅዱሳን፡ወሰብአ፡ቤቱ፡ ለእግዚአብሔር።
20 እስመ፡ተሐነጽክሙ፡ዲበ፡መሠረተ፡ሐዋርያት፡ወነቢያት፡እንዘ ፡ክርስቶስ፡ርእስ፡ማዕዘንተ፡ሕንጻ።
21 ዘቦቱ፡የኀድር፡ኵሉ፡ሕንጻ፡ወይጸንዕ፡ጽርሐ፡መቅደሱ፡ለእግዚአብሔር።
22 ወአንትሙሂ፡ቦቱ፡ተሐነጽክሙ፡ማኅደረ፡እግዚአብሔር፡በመንፈስ፡ቅዱስ።