በእንተ፡ምእመናን፡ዘኤፌሶን
1 እምጳውሎስ፡ሐዋርያሁ፡ለእግዚእነ፡ኢየሱስ፡ክርስቶስ፡በፈቃደ፡እግዚአብሔር፡ለቅዱሳን፡እለ፡በኤፌሶን፡ወምእመናን፡በኢየሱስ፡ክርስቶስ።
2 ሰላም፡ለክሙ፡ወጸጋ፡እግዚአብሔር፡አቡነ፡ወእግዚእነ፡ኢየሱስ፡ክርስቶስ።
በእንተ፡ስብሐት፡ወበረከት
3 ይትባረክ፡እግዚአብሔር፡አቡሁ፡ለእግዚእነ፡ኢየሱስ፡ክርስቶስ፡ዘባረከነ፡በኵሉ፡በረከተ፡መንፈስ፡ቅዱስ፡ዘበሰማያት፡ቡክርስቶስ፡ኢየሱስ።
4 በከመ፡ኀረየነ፡ሎቱ፡እምቅድመ፡ይትፈጠር፡ዓለም፡ከመ፡ይረስየነ፡ቅዱሳነ፡ወንጹሓነ፡በቅድሜሁ፡በተፋቅሮ።
5 ወሠርዐነ፡ትርሲተ፡ወልዱ፡በእንተ፡ኢየሱስ፡ክርስቶስ፡በከመ፡ሥምረተ፡ፈቃዱ።
6 ለክብር፡ወለስብሐት፡በጸጋሁ፡ዘጸገወነ፡በወልዱ፡ፍቁሩ።
7 ዘበእንቲአሁ፡ረከብነ፡መድኃኒተ፡ወተኀድገ፡ኃጢአትነ፡በደሙ፡በከመ፡ብዕለ፡ጸጋሁ።
8 ዘአፈድፈደ፡ላዕሌነ፡በኵሉ፡ጥበብ፡ወምክር።
9 ወአርአየነ፡ምክረ፡ፈቃዱ፡በከመ፡ሥምረቱ፡ወዘሠርዐ፡በእንቲአሁ።
10 ወዐቀመ፡በዘይበጽሕ፡ዕድሜሁ፡ወአርአሶ፡ላዕለ፡ኵሉ፡ለክርስቶስ፡ለዘበሰማይ፡ወለዘበምድር።
11 ወከፈለነ፡በዘሠርዐነ፡እግዚአብሔር፡ወረድአነ፡በከመ፡ምክረ፡ፈቃዱ።
12 ከመ፡የሀበነ፡ምክረ፡ወስብሐተ፡ለእለ፡ተወከልነ፡በክርስቶስ፡ኢየሱስ።
13 ወአንትሙሂ፡ስማዕክሙ፡ቃለ፡ጽድቅ፡ትምህርተ፡ሕይወትክሙ፡ወአመንክሙ፡ወዐተቡክሙ፡በመንፈስ፡ቅዱስ፡ዘአሰፈወ።
14 ዘውእቱ፡አረቦነ፡ርስትነ፡ወመድኀኒተ፡ሕይወትነ፡በክብረ፡ስብሐቲሁ።
በእንተ፡ተዘክሮተ፡ምእመናን
15 ወበእንትዝ፡አነሂ፡ሰሚዕየ፡ሃይማኖተክሙ፡በእግዚእነ፡ኢየሱስ፡ክርስቶስ፡ወዘታፈቅርዎሙ፡ለኵሎሙ፡ቅዱሳን።
16 ኢያንተጉ፡አእኵቶቶ፡በእንቲአክሙ፡ወተዘከሮትክሙ፡በጸሎትየ።
17 ከመ፡አምላኩ፡ለእግዚእነ፡ኢየሱስ፡ክርስቶስ፡አበ፡ስብሐት፡የሀብክሙ፡መንፈሰ፡ጥበብ፡ወይክሥት፡ለክሙ፡ታእምሩ።
18 ወያብርህ፡አዕይንተ፡ልብክሙ፡ወታእምሩ፡ምንት፡ውእቱ፡ተስፋሁ፡ለጽዋዔክሙ፡ወምንት ፡ውእቱ፡ብዕለ፡ስብሐት፡ርስቱ፡በቅዱሳን።
19 ወምንት፡ፍድፋዴ፡ጽንዐ፡ኀይሉ፡ዘላዕሌነ፡ለእለ፡ነአምን፡በከመ፡ዕበየ፡ኀይሉ፡ዘገብረ፡በክርስቶስ።
20 ዘአንሥኦ፡እሙታን፡ወአንበሮ፡በየማኑ፡ውስተ፡ሰማያት።
21 መልዕልተ፡ኵሉ፡መላእክት፡ወመኳንንት፡ወኀይላት፡ወአጋእዝት፡ወኵሉ፡ስም፡ዘይሰመይ፡ወአኮ፡በዝ፡ዓለም፡ባሕቲቱ፡ወባሕቱ፡በዘይመጽእኒ፡ዓለም።
22 ወኵሎ፡አግረረ፡ሎቱ፡ታሕት፡እገሪሁ፡ወኪያሁ፡ዘውእቱ፡መልዕልተ፡ኵሉ፡ረሰዮ፡ርእሰ፡ ለቤተ፡ክርስቲያን።
23 እንተ፡ይእቲ፡ሥጋሁ፡ወውእቱ፡ፍጻሜሁ፡ለኵሉ፡ወይፌጽም፡ኵሎ፡በኵሉ።