Biblia Etíope · Biblia Etíope en Ge'ez

Deuteronomio 8

ኦሪት፡ዘዳግም።

1ወዕቀቡ፡ከመ፡ትግበሩ፡ኵሎ፡ትእዛዘ፡ዘእኤዝዘክሙ፡አነ፡ዮም፡ከመ፡ትሕየዉ፡ወትትባዝኁ፡ወትባኡ፡ትትወረሱ፡ምድረ፡እንተ፡መሐለ፡እግዚአብሔር፡ለአበዊክሙ።

2ወተዘከር፡ኵሎ፡ፍኖተ፡እንተ፡ወሰደከ፡እግዚአብሔር፡አምላክከ፡ውስተ፡ገዳም፡ከመ፡ያሕምምከ፡ወከመ፡ያመክርከ፡ወከመ፡ያእምር፡ልበከ፡ለእመ፡ተዐቅብ፡ትእዛዞ፡ወለእመ፡አልቦ።

3ወአሕመመከ፡ወአርኀበከ፡ወእምዝ፡መና፡ሴሰየከ፡ዘኢያአምሩ፡አበዊከ፡ከመ፡ያርኢከ፡ከመ፡ኢኮነ፡በእክል፡ባሕቲቱ፡ዘየሐዩ፡ሰብእ፡አላ፡በኵሉ፡ቃል፡እንተ፡ትወፅእ፡እምነ፡አፉሁ፡ለእግዚአብሔር፡የሐዩ፡ሰብእ።

4አልባሲከኒ፡ኢበልየ፡በላዕሌከ፡ወእገሪከኒ፡ኢረስሐ፡ናሁ፡አርብዓ፡ዓም።

5ወአእምር፡በልብከ፡እስመ፡ከመ፡ይጌሥጽ፡ብእሲ፡ወልዶ፡ከማሁ፡ይጌሥጸከ፡እግዚአብሔር፡አምላክከ።

6ወዕቀብ፡ኵሎ፡ትእዛዞ፡ለእግዚአብሔር፡አምላክከ፡ከመ፡ትሑር፡በፍኖቱ፡ወትፍርሆ።

7እስመ፡እግዚአብሔር፡አምላክከ፡ያበውአከ፡ውስተ፡ምድር፡ቡርክት፡ወብዝኅት፡እንተ፡ወሓይዝተ፡ማይ፡ወዐዘቃቲሃ፡ከመ፡ቀላይ፡ወይትከዐው፡ውስተ፡ገዳም፡ወውስተ፡አድባር።

8ምድረ፡ስርናይ፡ወስገም፡ወአዕጻደ፡ወይን፡ወበለስ፡ወሮማን፡ምድረ፡ኤልያስ፡ዘዘይት፡ወመዓር፤

9ምድር፡እንተ፡ኢኮነት፡በአስተአክሎ፡ዘትበልዖ፡ለእክልከ፡ወአልቦ፡ዘተኀጥእ፡ምንተኒ፡ውስቴታ፡ምድር፡እንተ፡እበኒሃ፡ኀፂን፡ወእምውስተ፡አድባሪሃ፡ይኤልድዎ፡ለብርት።

10ወብላዕ፡ወጽገብ፡ወባርኮ፡ለእግዚአብሔር፡አምላክከ፡በውስተ፡ምድር፡ቡርክት፡እንተ፡ወሀበከ።

11ወዑቅ፡ርእሰከ፡ወኢትርስዖ፡ለእግዚአብሔር፡አምላክከ፡ከመ፡ትዕቀብ፡ትእዛዞ፡ወፍትሖ፡ወኵነኔሁ፡ኵሎ፡ዘአነ፡እኤዝዘከ፡ዮም።

12ዮጊ፡ሶበ፡በላዕከ፡ወጸገብከ፡ወነደቀ፡አብያተ፡ሠናያነ፡ወነበርከ፡ውስቴቶሙ፤

13ወበዝኃ፡ለከ፡አባግዒከ፡ወአልህምቲከ፡ወሶበ፡በዝኀ፡ለከ፡ወርቅ፡ወብሩር፡ወበዝኀ፡ለከ፡ኵሉ፡ንዋይከ፤

14ዮጊ፡ታዐቢ፡ልበከ፡ወትረስዖ፡ለእግዚአብሔር፡አምላክከ፡ዘአውፅአከ፡እምነ፡ምድረ፡ግብጽ፡እምነ፡ቤተ፡ቅኔት፤

15ወወሰደከ፡ውስተ፡ገዳም፡ዘዐቢይ፡ወግሩም፡ውእቱ፡ዘአራዊተ፡ምድር፡ዘይነስክ፡ወዐቃርብት፡ወጽምእ፡ወአልቦ፡ማየ፡ለሰትይ፡ዘአውፅአ፡ለከ፡እምውስተ፡እብን፡ኰኵሕ፡ነቅዐ፡ማየ፡ጥዑም።

16ዘሴሰየከ፡መና፡በገዳም፡ዘኢያአምሩ፡አበዊከ፡ከመ፡ያሕምምከ፡ወያመክርከ፡ወያሠኒ፡ላዕሌከ፡በደኃሪ፡መዋዕሊከ።

17ወኢትበል፡በልብከ፡በጽንዕየ፡ወበኀይለ፡እዴየ፡ገበርኩ፡ሊተ፡ዘንተ፡ኅይለ፡ዐቢየ።

18ወተዘከሮ፡ለእግዚአብሔር፡አምላክከ፡እስመ፡ውእቱ፡ይሁበከ፡ኀይለ፡ከመ፡ያቅም፡ኪዳኖ፡ዘመሐለ፡እግዚአብሔር፡ለአበዊከ፡በከመ፡ዮም።

19ወለእመ፡ረሲዐ፡ረሳዕካሁ፡ለእግዚአብሔር፡አምላክከ፡ወሖርከ፡ድኅረ፡ባዕድ፡አማልክት፡ወአምለካሆሙ፡ወሰገድከ፡ሎሙ፡ኣሰምዕ፡ላዕሌከ፡ዮም፡ሰማየ፡ወምድረ፡ከመ፡ጠፊአ፡ትጠፍእ።

20በከመ፡አሕዛብ፡ኵሎሙ፡እለ፡ደምሰሶሙ፡እግዚአብሔር፡እምቅድመ፡ገጽክሙ፡ከማሁ፡ትደመሰሱ፡እስመ፡ኢሰማዕክሙ፡ቃለ፡እግዚአብሔር፡አምላክክሙ።