Biblia Etíope · Biblia Etíope en Ge'ez

Deuteronomio 19

ኦሪት፡ዘዳግም።

1ወለእመ፡አጥፍኦሙ፡እግዚአብሔር፡አምላክከ፡ለአሕዛብ፡እለ፡ይሁበከ፡እግዚአብሔር፡ምድሮሙ፡ወተወረስክምዎሙ፡ወነበርክሙ፡ውስተ፡ምድሮሙ፡ወውስተ፡አህጉሪሆሙ፡ወውስተ፡አብያቲሆሙ፤

2ሠላሰ፡አህጉረ፡ትፈልጥ፡ለከ፡በማእከለ፡ምድርከ፡እንተ፡ወሀበከ፡እግዚአብሔር፡አምላክከ።

3ወታአምር፡ለሊከ፡ፍኖቶን፡ወትከፍል፡ደወለ፡ምድርከ፡ምሥልስተ፡ዘአስተከፈለከ፡እግዚአብሔር፡አምላክከ፡ወይኩን፡ህየ፡ምስካዩ፡ለቀታሊ፡ለኵሉ።

4ወዝንቱ፡ውእቱ፡ሕጉ፡ለቀታሊ፡እምከመ፡ሰከየ፡ህየ፡ይሕየው፡ለእመ፡በኢያእምሮ፡ቀተሎ፡ለካልኡ፡ወለእመ፡ኢኮነ፡ጸላኢሁ፡ቀዲሙ።

5ወለእመቦ፡ዘሖረ፡ምስለ፡ካልኡ፡ሐቅለ፡ይሕጥብ፡ዕፀ፡ወቈስለ፡እዴሁ፡በጕድብ፡እንዘ፡ይገዝም፡ዕፀ፡ወወድቀ፡ሐፂኑ፡እምውስተ፡ዕፁ፡ወወረደ፡ላዕለ፡ካልኡ፡ወቀተሎ፡ይሰኪ፡ውእቱ፡ውስተ፡አሐቲ፡እምነ፡እላንቱ፡አህጉር፡ወየሐዩ፤

6ከመ፡ኢይዴግኖ፡አበ፡ደም፡ወይትልዎ፡ለቀታሊ፡እስመ፡ተቃወ[ሞ፡] በልቡ፡ወይርከቦ፡ለእመ፡ርሕቆ፡ፍኖት፡ወይቀትሎ፡ነፍሶ፡እንዘ፡ኢኮነ፡አበሳሁ፡ለሞት፡እስመ፡ኢኮነ፡ጸላኢሁ፡ቀዲሙ።

7ወበበይነ፡ዝንቱ፡አዘዝኩከ፡አነ፡ትግበር፡ዘንተ፡ነገረ፡ወእቤለከ፡ሠላሰ፡አህጉረ፡ፍልጥ፡ለከ።

8ወለእመ፡አርኀበ፡ለከ፡እግዚአብሔር፡ደወለከ፡በከመ፡መሐለ፡እግዚአብሔር፡ለአበዊከ፡ወወሀበከ፡እግዚአብሔር፡ኵሎ፡ምድረ፡እንተ፡ይቤ፡እግዚአብሔር፡እሁቦሙ፡ለአበዊከ፤

9ለእመ፡ሰማዕከ፡ከመ፡ትግበር፡ኵሎ፡ዘንተ፡ትእዛዘ፡ዘአነ፡እኤዝዘከ፡ዮም፡ከመ፡ታፍቅሮ፡ለእግዚአብሔር፡አምላክከ፡ወከመ፡ትሑር፡በኵሉ፡ፍናዊሁ፡በኵሉ፡መዋዕል፡ወትዌስክ፡ለከ፡ዓዲ፡ሠላሰ፡አህጉረ፡ላዕለ፡እልክቱ፡ሠላስ።

10ወኢይትከዐው፡ደም፡ንጹሕ፡ውስተ፡ምድርከ፡እንተ፡ወሀበከ፡እግዚአብሔር፡አምላክከ፡መክፈልተከ፡ወኢየሀሉ፡ውስቴትከ፡ቀታሌ፡ነፍስ።

11ወለእመሰቦ፡ብእሲ፡ዘይጸልኦ፡ለካልኡ፡ወይፀንሖ፡ወእምዝ፡ተንሥአ፡ላዕሌሁ፡ወቀተሎ፡ነፍሶ፡ወሞተ፡ወሰከየ፡ውስተ፡አሐቲ፡እምነ፡እላንቱ፡አህጉር፤

12ወይልእኩ፡ሊቃናተ፡ሀገሩ፡ወያመጽእዎ፡እምህየ፡ወይሜጥውዎ፡ኪያሁ፡ለአበ፡ደም፡ወይቀትሎ።

13ወዐይንከ፡ኢትምሐኮ፡ወታነጽሕ፡ደመ፡ንጹሐ፡እምነ፡እስራኤል፡ወትከውን፡ሠናይት፡ላዕሌከ።

14ወኢትትኃሠሥ፡ደወለ፡ቢጽከ፡ዘሠርዑ፡አበዊከ፡በውስተ፡ርስትከ፡ዘተወረስከ፡ምድረ፡እንተ፡ወሀበከ፡እግዚአብሔር፡አምላክከ፡መክፈልተከ።

15ወኢይከውን፡አሐዱ፡ሰማዕት፡ከመ፡ይኩን፡ስምዐ፡ላዕለ፡ሰብእ፡በኵሉ፡ጌጋይ፡ወበኵሉ፡አበሳ፡ዘአበሱ፤ በአፈ፡ክልኤቱ፡ሰማዕት፡ወበአፈ፡ሠለስቱ፡ሰማዕት፡የኀልቅ፡ኵሉ፡ነገር።

16ወለእመ፡አምጽኡ፡ሎቱ፡ለሰብእ፡ሰማዕተ፡በዐመፃ፡ወነበበ፡ላዕሌሁ፡ሐሰተ፤

17ወይቀውሙ፡እልክቱ፡ክልኤቱ፡ዕደው፡እለ፡ይትኃሠሡ፡ቅድመ፡እግዚአብሔር፡ወቅድመ፡ካህናት፡ወቅድመ፡መኳንንት፡እለ፡ሀለዉ፡በእማንቱ፡መዋዕል፤

18ወየሐትቱ፡መኳንንት፡ወይጤይቁ፡(ወእልክቱኒ፡ክልኤቱ፡ሰማዕት፡) ወለዝክቱኒ፡አሐዱ፡ዐማፂ፡ዘኮነ፡ስምዐ፡በሐሰት፡ወቆመ፡ላዕለ፡ካልኡ፤

19ይግበርዎ፡ዘከመ፡ፈቀደ፡ይግበር፡እኪተ፡ላዕለ፡ካልኡ፡ወታሴስሉ፡እኩየ፡እምኔክሙ።

20ወባዕድ፡ሰሚዖ፡ይፍራህ፡ወኢይድግም፡እንከ፡ገቢረ፡ዘንተ፡ነገረ፡እኩየ፡በውስቴትክሙ።

21ወዐይንከ፡ኢትምሐኮ፡ነፍስ፡ህየንተ፡ነፍስ፡ወዐይን፡ህየንተ፡ዐይን፡ወስን፡ህየንተ፡ስን፡ወእድ፡ህየንተ፡እድ፡ወእግር፡ህየንተ፡እግር።