4
1 ስምዑ፡ዘንተ፡ነገረ፡እጐልተ፡ባሳን፡እለ፡ውስተ፡አድባረ፡ሰማርያ፡እለ፡ይትኤገላ፡ነዳየ፡ወየሀይዳ፡ምስኪናነ፡እለ፡ይብላሆሙ፡ለአጋእስቲሆሙ፡ሀቡነ፡ንስተይ።
2 መሐለ፡እግዚአብሔር፡በቅዱሳኒሁ፡ናሁ፡ይመጽእ፡መዋዕል፡ላዕሌክሙ፡ይቤ፡እግዚአብሔር ።ወይነሥኡክሙ፡በንዋየ፡ሐቅል፡ወእለሂ፡ምስሌክሙ፡ለጸሀራት፡እኩያን፡ወጽልሕዋን።
3 ወያወፅኡክሙ፡ዕሩቃኒክሙ፡ወትትናጸሩ፡በበይናቲክሙ፡ወይገድፉክሙ፡ውስተ፡ደብረ፡ራማን።ከመዝ፡ይቤ፡እግዚአብሔር፡እግዚእ።
4 ቦእክሙ፡ቤቴል፡ወአበስክሙ፡በገልገላሂ፡አብዛኅክሙ፡ኀጢአትክሙ፡ወአምጻእክሙ፡መሥዋዕተክሙ፡በጽባሕ፡አመ፡ሠሉስ፡መዋዕል፡ዓሥራቲክሙ።
5 ወአንበብክሙ፡ኦሪተ፡በአፍአ፡ወሰመይክምዎ፡ምአመነ፡ንግሩኒ፡ዘአፍቀሩ፡ደቂቀ፡እስራኤል፡ይቤ፡እግዚአብሔር፡እግዚእ።
6 አነ፡እሁበክሙ፡ትጽረሱ፡ስነኒክሙ፡በኵሉ፡ፍናዊክሙ፡ወረኃበ፡እክል፡በኵሉ፡በሓውርቲክሙ፡ወኢተመየጥክሙ፡ኀቤየ፡ይቤ፡እግዚአብሔር።
7 ወአነ፡ከላእኩክሙ፡ዝናመ፡እምቅድመ፡ሠለስቱ፡አውራኅ፡ለማእረር፡ወኣዘንም፡ውስተ፡አሐቲ፡ሀገር፡ወውስተ፡ካልእት፡ሀገር፡ኢያዘንም።አሐደ፡ከመ፡ገጸ፡ይዘንም፡ወብሔር፡ኀበ፡ኢይዘንምሰ፡ይየብስ።
8 ወይትጋብኡ፡ክልኤ፡ሀገር፡ወሠሳስ፡ውስተ፡አሐቲ፡ሀገር፡ወይሰቲያ፡ማየ፡ወኢይረዊያ፡ወምስለ፡ክመዝ፡ኢተመየጥክሙ፡ኀቤየ፡ይቤ፡እግዚአብሔር።
9 ወአነ፡ቀሠፍኩክሙ፡በፈጻንት፡ወበብድብድ፡ወሰሚሮ፡አቅማኅክሙ፡ወወይንክሙ፡ወበለስክሙ፡ወዘይትክሙ፡በልዖ፡አናኳዕ፡ወምስለ፡ከመዝ፡ኢተመየጥክሙ፡ኀቤየ፡ይቤ፡እግዚአብሔር።
10 ወፈነውኩ፡ላዕሌክሙ፡ሞተ፡በፍኖተ፡ግብጽ፡ወቀተልክዎሙ፡በኲናት፡ለወራዙቲክሙ፡ወማህረኩ፡አፍራሲክሙ፡ወአምጻእኩ፡እሳተ፡ላዕለ፡ተዓይኒክሙ፡ወቀሠፍኩክሙ፡ወበዝኒ፡ኢተመየጥክሙ፡ኀቤየ፡ይቤ፡እግዚአብሔር።
11 ገፍታእኩክሙ፡ከመ፡ገፍትአ፡እግዚአብሔር፡ለሰዶም፡ወለገሞራ።ወኮንክሙ፡ከመ፡ትንታገ፡እሳት፡ዘአውፅእዎ፡እምአፍሓም፡ወበዝኒ፡ኢተመየጥክሙ፡ኀቤየ፡ይቤ፡እግዚአብሔር።
12 በእንተ፡ዝንቱ፡ከመዝ፡ይቤ፡እግዚአብሔር፡እሬስየከ፡እስራኤል፡እስመ፡ከመዝ፡እሬስየከ፡ታድሉ፡ከመ፡ትጸውዕ፡ስመ፡አምላክከ፡እስራኤል።
13 እስመ፡አነ፡ውአቱ፡ዘኣጸንዕ፡ነጐድጓደ፡ወእፈጥር፡ነፋሰ፡ወይዜንው፡ለሰብእ፡በእንተ፡መሲሑ፡ዘይገብር፡ጊዜ፡ጽባሕ፡ወይትሌዐል፡ውስተ፡ኑኃ፡ለምድር።እግዚአብሔር፡እግዚእ፡ዘኵሎ፡ይመልክ፡ስሙ።